Read Mizo_Old_version Exodus 12 Bible Online

Exodus 12 - Mizo_Old_version bible

Exodus 12

¹Tin, LALPAN Mosia leh Arona chu Aigupta ramah chuan a bia a,

²“Tûn thla hi in tân thla chhiar ṭanna a ni ang a; in tân kum khat chhûnga thla chhiar ṭanna a ni ang.

³Israel-ho pung khâwm zawng zawngte hnênah hian, ‘Tûn thla ni sâwm ni takah hian mi tinin an chhûngkaw khawsak ang zêlin an chhûngkaw tân berâmno pakhat la ṭheuh sela.

⁴Tin, an chhûngkua chu berâmno talhna tham ni lo khawpa tlêm lutuk an nih chuan, a ṭhenawm nên an chhûngkaw mihring zir zêlin berâmno pakhat inṭâwm sela; mi tin ei tâwk tûr ang zêl ngaihruatin berâmno chu in ruat tûr a ni.

⁵In berâmno chu a pa, kum khat hnuai lam, hmêlhem lo a ni tûr a ni a, berâm zînga mi emaw, kêl zînga mi emaw a ni tûr a ni.

⁶Tin, chumi thla ni sâwm leh ni li ni thlengin in dah tûr a ni a; tichuan, Israel-ho pung khâwm zawng zawng chuan tlai lamah an talh tûr a ni.

⁷Tin, a thisen chu an la ang a, an eina tûr in kawngka biang pahnihah leh kawngka lu chungah an tât tûr a ni.

⁸Tin, chumi zân chuan a sa chu rawh sela, chhang dawidim telh loh nên ei rawh se; hnim khâ nên an ei tûr a ni.

⁹Tin, a helin ei suh sela, tui pawhin chhûm hauh suh sela, a rawhin rawh zâwk rawh se, a lu leh a ke chawpin, a kawchhûng nên.

¹⁰Tin, a tûk atân chuan eng mah in dah tûr a ni lo va; a tûk thlenga bâng la awm chu meiah in rawh ral tûr a ni.

¹¹Tin, hetiang hian in ei tûr a ni: in puan vengin, pheikhawk bunin, tiang kengin. Tin, hmanhmawh takin in ei tûr a ni; LALPA kal hlên a ni dâwn si a.

¹²Chumi zân chuan Aigupta ram chhûng chu ka fang dâwn si a, Aigupta rama fa tîr zawng zawng, mi leh sa chu ka tihlum ang a; Aigupta rama pathian zawng zawng chu an ro ka rêlsak ang: LALPA ka nih hi.

¹³Tin, thisen chu in tân in awmna in chhinchhiahna a ni ang a; tin, thisen chu ka hmuh chuan ka kal hlên ang che u a; tichuan, Aigupta ram ka hrem hunah chuan nangmahni tiboraltu tûr in chungah hri rêng rêng a lo lêng lo vang.

¹⁴Tin, hemi ni hi in tân hriat rengna ni a ni ang a; LALPA tân kût niah in ruat tûr a ni. In thlahte thlengin kumkhaw thuruat atâna awm reng tûrin kût niah in hmang tûr a ni.

¹⁵“ ‘Ni sarih chhûng chu chhang dawidim telh loh in ei tûr a ni a; ni khat ni aṭang rêng chuan in in chhûng ata dawidim chu in thian fai vek tûr a ni. Tu pawh ni khat ni aṭanga a ni sarih ni thlenga chhang dawidim telh ei apiang chu, chu mi chu Israel-ho zîng ata tihboral a ni ang.

¹⁶Tin, ni khat niah inkoh khâwmna thianghlim in nei ang a, a ni sarih niah inkoh khâwmna thianghlim a awm leh ang; mi tinin an mamawh ei tûr buatsaih tih loh chu, chumi chhûng chuan hna rêng rêng thawh hlek tûr a ni lo, ei tûr buatsaih chauh tih thian a ni ang.

¹⁷Tin, chhang dawidim telh loh kût ni chu in serh tûr a ni, chumi ni ngei chuan Aigupta ram ata in mipuihote chu ka hruai chhuak si che u a; chuvângin, in thlahte thlengin kumkhaw thuruat atâna awm reng tûrin chumi ni chu in serh tûr a ni.

¹⁸Thla khatna, chumi thla ni sâwm leh ni li ni, tlai lamah chuan chhang dawidim telh loh chu in ei ang a, chumi thla ni sawmhnih leh ni khat ni tlai thlengin.

¹⁹Ni sarih chhûng chu in in chhûngah rêng rêng dawidim a awm tûr a ni lo va; tu pawh dawidim telh ei apiang chu, chu mi chu hnam dang pawh, in rama piang pawh ni sela, Israel-ho pung khâwm zîng ata hi tihboral tûr a ni ang.

²⁰Dawidim telh rêng rêng chu in ei tûr a ni lo va; in chênna hmun apiangah chuan chhang dawidim telh loh in ei tûr a ni,’ tiin sawi ang che,” tiin.

²¹Tin, Mosian Israel upaho zawng zawng chu a koh khâwmtîr a, an hnênah, “Chhûngkaw tinin berâmnotête chu va la chhuak ta ula, kalhlênna tûr talh rawh u.

²²Tin, husop kau in la ang a, maihûna thisenah chuan in zu hnim ang a, kawngka lu chungah leh kawngka biang pahnihah chuan maihûna thisen chu tât ang che u. Tin, khawvâr hma loh chuan tu mah mahni in ata in chhuak tûr a ni lo ve.

²³LALPA chu Aigupta mite tihlum tûrin a lo kal tlang dâwn si a; tichuan, kawngka lu chung leh kawngka biang pahniha thisen kai a hmuh chuan, LALPA chuan kawngka chu a kal hlên ang a, in in chhûngah chuan nangmahni tihlum tûrin tiboraltu chu a rawn luhtîr lo vang.

²⁴Tin, hetiang hian nangmah leh i fate tâna kumkhuaa thuruat awm reng tûrin in rawn ti ṭhîn tûr a ni.

²⁵Tin, heti hi a ni ang a, LALPAN pêk a lo tiam tawh anga a pêk che u ram chu in thlen hunin, he rawngbâwlna hi in zâwm tûr a ni.

²⁶Tin, heti hi a ni ang a, in faten in hnêna, ‘He rawngbâwlna awmzia hi eng nge ni ngai le?’ an rawn tih chuan,

²⁷nangnin, ‘Hei hi LALPA kalhlên inthawina a nih hi, ani chuan Aigupta mite a tihhlum lai khân kan inte chu a rawn zuah a, Aigupta rama Israela thlahte in chu a rawn kal hlên a ni,’ in la ti dâwn nia,” a ti a. Tin, mipuite chuan an lû an kûn a, chibai an bûk ta a.

²⁸Tin, Israela thlahte chu an kal a, chutiang chuan an ti a; LALPAN Mosia leh Arona thu a pêk ang chuan an ti ta a.

²⁹Tin, heti hi a ni a, zanlaiah chuan LALPA chuan Aigupta rama fa tîr zawng zawng - lalṭhutphaha ṭhu Pharaoa fa tîr aṭanga rip chhûnga tâng fa tîr lamin - a zuk tihlum ta vek a, ran piang hmasa ber zawng zawngte nên.

³⁰Tin, Pharaoa chu amah leh a chhiahhlawh zawng zawngte leh, Aigupta mi zawng zawngte nên zânah chuan an tho ta a; tin, Aigupta ramah chuan ṭahna nasa tak a awm a; mitthi awm lohna in rêng rêng pakhat mah a awm si lo va.

³¹Tin, Mosia leh Arona chu a zân a zânin a kohtîr a, “Tho ula, ka miteho zîng ata hi chhuak rawh u, nangmahni leh Israela thlahteho nên hian; tin, kal ula, in sawi ang khân LALPA rawng chu va bâwl tawh u.

³²In sawi ang khân in berâm rualte leh in sebâwng rualte pawh chu kalpui rawh u; kal tawh u; tin, kei pawh mal mi sâwm ve bawk rawh u,” a ti a.

³³Tin, Aigupta mite chuan chumi ram ata chu hmanhmawh taka tîr chhuak tûrin mite chu an tur ta chhên a; “Kan thi vek a ni ta mai,” an ti a.

³⁴Tin, mite chuan an chhang hmehte chu dawidim an telh hmain an la a, an chhang hmehna thlêngte chu an puanin an tuam a, an kokiah an bât ta mai a.

³⁵Tin, Israela thlahte chuan Mosia thu ang chuan an ti a; tin, Aigupta mite chu tangkaraw incheinate leh rangkachak incheinate leh, puante an dîl a.

³⁶Tin, LALPA chuan mite chu Aigupta mite a khawngaihtîr a; chutichuan, an dil apiang an neihtîr zêl a. Tichuan, Aigupta mite chu an rawk ta a.

³⁷Tin, Israela thlahte chu Rameses khua ata an chhuak a, Sukkoth hmun thlengin an kal ta a, naupangte tiam lovin, mipa puitling hlîr nuai ruk lai kein an kal a.

³⁸Tin, an hnênah chuan mipui inpawlhsawp tam tak an kal ve bawk a; tin, ran rual tam tak, berâm leh bâwngte an chhawm bawk a.

³⁹Tin, Aigupta ram ata an ken chhuah chhang hmeh hmangin chhang, dawidim telh lohte chu an ur a; Aigupta ram ata chu hnawh chhuaha an awm avâng leh, an awm rei theih tâk lohva, ei tûr takngial pawh an inbuatsaih hman tâk loh avânga dawidim telh loh a ni si a.

⁴⁰Tichuan, Israela thlahte Aigupta rama an awm chhûng chu kum zali leh kum sawmthum a ni.

⁴¹Tin, heti hi a ni a, kum zali leh kum sawmthum a lo ral chuan, chumi ni ngei chuan heti hi a ni a, LALPA mipuiho zawng zawngte chu Aigupta ram ata an chhuak ta a.

⁴²Chumi zân chuan Aigupta ram ata anmahni a hruai chhuah avângin, LALPA tâna zân serh tak ni tûr a ni a. Israela thlahte zawng zawngin, chhuan zawng zawng thlengin, chu zân chu LALPA zân atân serh hle tûr a ni.

⁴³Tin, LALPAN Mosia leh Arona hnênah, “Hei hi kalhlên thuruat dân tûr a ni ang: hnam dang chuan an ei ve tûr a ni lo va;

⁴⁴amaherawhchu, miin a chhiahhlawh, tangkaa a lei tawhate chu a serh i tansak tawh phawt chuan a ei ve thei ang.

⁴⁵Hnam dang leh chhiahhlawh rawihte erawh chuan an ei tûr a ni lo ve.

⁴⁶In khatah ei tûr a ni; pâwn lamah a sa rêng rêng ken chhuah tûr a ni lo va, a ruh rêng rêng pawh in titliak tûr a ni lo ve.

⁴⁷Israel-ho zawng zawngin an zâwm tûr a ni.

⁴⁸Tin, hnam dang in hnêna awm hian LALPA kalhlên hi tih ve a duh chuan, mipa zawng zawngte serh tan ni sela, tichuan rawn ti ve rawh se; ani chu chumi rama piang anga ngaih a ni ang. Amaherawhchu, serh tan loh mi chuan a ei hauh tûr a ni lo.

⁴⁹Chumi rama piang leh, hnam dang in zînga awmte tân hian dân angkhat a awm tûr a ni,” a ti a.

⁵⁰Israela thlahte zawng zawng chuan chutiang chuan an ti a, LALPAN Mosia leh Arona thu a pêk ang ngei chuan an ti ta a.

⁵¹Tin, heti hi a ni a, chumi ni ngei chuan, LALPAN Israela thlahte chu Aigupta ram ata mipuiho chu a hruai chhuak ta a ni.