Read Mizo_Old_version Exodus 13 Bible Online

Exodus 13 - Mizo_Old_version bible

Exodus 13

¹Tin, LALPAN Mosia a bia a,

²“Israela thlahte zînga fa tîr zawng zawng, chhûl keu hmasa ber apiang, mihring pawh, sa pawh ka tân serhah in ruat tûr a ni; ka ta a ni e,” tiin.

³Tin, Mosian mipuite hnênah chuan, “Vawiin, Aigupta ram ata bawih ata in chhuah ni hi hre reng ang che u; kut chak takin LALPAN hemi hmun ata hi a hruai chhuah che u hi; chhang dawidim telh rêng rêng chu ei tûr a ni lo ve.

⁴Abib thla, vawiin ni hian in chhuak a ni.

⁵Tin, heti hi a ni ang a, LALPAN Kanaan-hote, Hit-hote, Amor-hote, Hiv-hote, Jebus-hote ram, khawizu leh hnutetui luanna ram, in thlahtute chhechhama pêk a tiamah khân a hruai thlen hunah che u chuan, hemi thla hian he rawngbâwlna hi in zâwm tûr a ni.

⁶Ni sarih chhûng chu chhang dawidim telh loh in ei tûr a ni a; tin, a ni sarih ni chu LALPA tân kût ni a ni ang.

⁷Ni sarih chhûng chuan chhang dawidim telh rêng rêng chu a awmin awm hlek suh se; in awmna hmunah rêng rêng dawidim pawh a awmin awm hlek bawk suh se.

⁸Chumi niah chuan in fate hnênah, ‘Aigupta ram ata kan lo chhuah lai khân LALPAN thil min lo tihsak vâng a ni e,’ tiin in hrilh tûr a ni e.

⁹LALPA dân chu in kaa a awm reng theih nân, in kutah in tân chhinchhiahna leh in mit inkârah hriat rengna tûr a ni ang; kut chak takin LALPAN Aigupta ram ata a hruai chhuah che u hi.

¹⁰Chutichuan, he thuruat hi kum tin a hun takah in zâwm ṭhîn tûr a ni.

¹¹“Tin, heti hi a ni ang a, LALPAN in hnênah leh in thlahtute hnêna chhechhama pêk a tiam tawh che u anga Kanaan-hote rama a hruai thlen che ua, a pêk hun che u chuan,

¹²chhûl keu hmasa ber apiang leh in ran piang thla hmasa ber apiang chu LALPA tân in dah hrang zêl tûr a ni; a pate chu LALPA ta tûr a ni ang.

¹³Sabengtung piang hmasa ber apiang chu berâmnovin in tlan tûr a ni ang; in tlan duh loh erawh chuan a nghâwng chu in titliak tûr a ni; tin, in fate zînga mipa piang hmasa ber apiang chu in tlan tûr a ni.

¹⁴Tin, heti hi a ni ang a, nakin lamah te in faten, ‘Hei engtizia nge ni le?’ tia an la rawn zawh hun che u chuan nangnin an hnênah, ‘Kut chak takin LALPAN Aigupta ram ata bawiha kan awm kha min hruai chhuak a.

¹⁵Tin, heti hi a ni a, Pharaoan kan chhuah thu a tihkhirh êm avângin, LALPAN Aigupta rama fa tîr zawng zawng, mihring fa tîr apiang leh ran piang hmasa ber apiang chu a tihlum vek a. Chuvângin, a pa, chhûl keu hmasa ber apiang hian LALPA hnênah kan inthawi a nih hi; amaherawhchu, kan fapate zînga fa tîr zawng zawngte chu kan tlan a ni,’ ti ang che u.

¹⁶Tin, in kutah in tân chhinchhiahna a ni ang, in mit leh mit inkâra chal hrênnate nên; kut chak takin LALPAN Aigupta ram ata min hruai chhuak ta si a,” a ti a.

¹⁷Tin, heti hi a ni a, Pharaoan mite chu a chhuahtîr phal veleh chuan, Pathianin Philistia-ho ram lamah chuan, a hnai zâwk nain a hruai lo va; Pathianin, “Indonate an hmuhin an inchhîr ang a. Aigupta ramah an kîr leh hlauh dah ang e,” a ti si a.

¹⁸Amaherawhchu, Pathianin mite chu Tuifinriat Sen lam panin thlalêr lamah a hruai kikawi ta zâwk a; tin, Israela thlahte chu Aigupta ram ata chu inrâlring rengin an chhuak ta a.

¹⁹Tin, Mosian Josefa ruhte chu a chhawm a; Israela thlahte kha, “Pathianin a la rawn kan ngei ngei ang che u a; tin, ka ruhte hi heta ta hi in zâwn chho tûr a ni,” tiin chhia a lo chhamtîr tlat tawh si a.

²⁰Tin, Sukkoth hmun ata chu an chhuak a, thlalêr tawntirh Etham hmunah an riak a.

²¹Tin, LALPAN chhûn laiah chuan chhûm dingin an hma a hruai a, zânah chuan anmahni ên tûrin meialh dingin an hma a hruai a; chhûn leh zân an kal theih zêlna tûrin.

²²Chhûna chhûm ding leh zâna meialh ding chuan mipui chu a kalsan ngai hauh lo a ni.