Read Mizo_Old_version Exodus 14 Bible Online

Exodus 14 - Mizo_Old_version bible

Exodus 14

¹Tin, LALPAN Mosia a bia a,

²“Israela thlahte hnênah hian thu sawi rawh khai, kîr leh sela, Migdol hmun leh tuipui inkâr Pi-hahiroth hmun bul, Baal-Zephon hmun bulah chuan riak rawh se; chumi dep tuipui kamah chuan riak rawh u.

³Tichuan, Pharaoan Israela thlahte chungchâng thu-ah, ‘Ram lakah an mangang ta zet mai le, thlalêrah an tâng ta,’ a ti ang a.

⁴Tin, keiin Pharaoa thinlung chu ka tikhauh ang a; tichuan, anmahni chu a ûm ang a; tin, keiin Pharaoa lakah leh a sipaiho zawng zawng lakah chuan chawimawina chu ka hlawh ang; tichuan, Aigupta miten kei hi LALPA chu ka ni tih an hria ang,” tiin. Tin, chutiang chuan an ti a.

⁵Tin, mite chu an tlân bo zo ta tih Aigupta lal chu an hrilh a; tin, Pharaoa thinlung leh a chhiahhlawhte thinlung chu a inlamlêt leh ta a; tichuan, “Israel mite kan rawngbâwl lai kan chhuahtîr ta ngawt mai hi, engtiziaa hetianga ti ta nge maw kan nih chu le?” an ti ta a.

⁶Tin, an tawlailîr an buatsaih a, a mite chu a hnênah a hruai a.

⁷Tin, tawlailîr zaruk ṭha ṭhiau leh Aigupta rama tawlailîr zawng zawng, an zaa chunga hotute nên a hruai ta a.

⁸Tin, LALPAN Aigupta ram lal Pharaoa thinlung chu a tikhauh va, Israela thlahte chu a ûm ta a; Israela thlahte lah chu induh takin an chhuak a ni si a.

⁹Tin, Aigupta mite chuan sakawr zawng zawng leh Pharaoa tawlailîrte leh, a sakawr chung chuang mite leh a sipaihote nên chuan an ûm a; tin, Pi-hahiroth hmun bul, Baal-Zephon hmun depa tuipui kama an riak chu an va ûmpha ta a.

¹⁰Tin, Pharaoan a va pan hnaih chuan Israela thlahte chu an han dâk a; tin, ngai teh, Aigupta mite chuan an lam chu an rawn pan phei a. Tichuan, an hlau ta êm êm mai a, Israela thlahte chuan LALPA chu an au ta a.

¹¹Tin, Mosia hnênah, “Aigupta ramah khân thlân a awm loh avângin em ni thlalêrah hian thi tûra min hruai chhuah ni? Eng vângin nge ni hetianga min ti tûra Aigupta ram ata min hruai chhuah ni?

¹²Aigupta ramah pawh khân, ‘Aigupta mite rawngbâwl hian kan awm mai ang e,’ tiin i hnênah khân kan sawi rêng lo vem ni? Thlalêra thih tlaw ngawt mai te ai chuan Aigupta mite rawng kha lo bâwl ta ila a ṭha zâwk tûr,” an ti a.

¹³Tin, Mosian mipuite hnênah chuan, “Hlau suh u. Awm hle hle mai ula, LALPA chhandamna, vawiina a thawhsak tûr che u hi en ngawt mai rawh u. Vawiina Aigupta mi in hmuhte hi kumkhuain in hmu leh dâwn tawh lo ve.

¹⁴LALPAN a dosak ang che u a, nangni chu in awm hle hle mai ang,” a ti a.

¹⁵Tin, LALPAN Mosia hnênah chuan, “Eng vângin nge maw mi auh le? Israela thlahte hi kal zêl tûrin hrilh ta che.

¹⁶Tin, nang pawhin i tiang kha han la la, tuipui chungah khân lek la, tui chu lo inṭhen rawh se. Tichuan, tuipui chhûng lei chârah Israela thlahte chu an kal ang.

¹⁷Tin, keiin Aigupta mite thinlung chu ka tikhauh ang a; tichuan, an ûm zêl ang. Tin, Pharaoa lakah leh, a sipaiteho zawng zawng lakah leh, a tawlailîrte lakah leh a sakawr chung chuang mite lakah chuan chawimawina chu ka hlawh ang.

¹⁸Tin, Pharaoa lakah leh, a tawlailîrte lakah leh a sakawr chung chuang mite laka chawimawina ka hlawh hunah chuan, Aigupta miten kei hi LALPA chu ka ni tih an hria ang,” a ti a.

¹⁹Tin, Pathian vântirhkoh, Israel mite hma hruai ṭhîn kha an hnung lamah a insawn ta a; tin, chhûm ding kha an hma lam ata a insawn a, an hnung lamah a ding ta a.

²⁰Tin, Aigupta mite leh Israel mite inkârah a lo tla ta a; tichuan, lehlam tan chhûm leh zân thim a ni a, lehlam tan zân chu a tiêng thung a; chutichuan, zankhuain a tu lam mah mah an inpan lo va.

²¹Tichuan, Mosia chuan tuipui chungah a kut a han phar a; tin, LALPAN zankhuain khawchhak thli na takin a rawn tlehtîr a, tuipui chu a nem kîrtîr a, tuipui chu lei chârah a chantîr a; tin, tuite chu a lo inṭhen ta a.

²²Tin, Israela thlahte chu tuipui chhûng lei chârah chuan an kal ta a; tin, tuite chu an ding lampangah leh an vei lampangah chuan an tân bang a lo ni ta mai a.

²³Tin, Aigupta mite chuan an ûm a, Pharaoa sakawr zawng zawngte leh a tawlailîrte leh a sakawr chung chuang mite chuan tuipui chhûngah chuan an ûm lût ta a.

²⁴Tin, heti hi a ni a, khawfingchah veleh LALPAN Aigupta mite chu meialh ding leh chhûm dingah chuan a zuk timangang ta a.

²⁵An tawlailîr kete chu a thlawnsak a, an khalh chak thei ta lo va; chutichuan, Aigupta mite chuan, “Israel-hote hi i tlânsan ang u; LALPAN an lama ṭangin he mite hi Aigupta mite a dopui a nih hi,” an ti ta a.

²⁶Tin, LALPAN Mosia hnênah, “Aigupta mite, an tawlailîrte, an sakawr chung chuang mite chu tuiin a rawn chîm leh theihna tûrin, i kut kha tuipui chungah han phar rawh khai,” a ti a.

²⁷Tin, Mosian tuipui chungah chuan a kut chu a han phar a; tin, khua a vâr veleh tuipui chu a luan pângngaiin a luang leh ta a, Aigupta mite chu an tlân kîr leh lai takin. Tichuan, LALPAN Aigupta mite chu tuipui chhûngah chuan a paih thla ta a.

²⁸Tin, tuite chu a luang leh ta a; tichuan, tawlailîrte leh sakawr chung chuang mite, tuipuia ûm lûttu, Pharaoa sipaiho zawng zawngte lam chuan tuiin a chîm pil ta vek a; pakhat mah chhuak rêng rêng an awm hauh lo mai a.

²⁹Israela thlahte erawh chu tuipui chhûng lei chârah chuan an kal vek a; tin, tuite chu an ding lampangah leh an vei lampangah chuan an tân bang a lo ni ta mai a.

³⁰Chutiang chuan a ni, LALPAN Israel-hote chu chumi ni chuan Aigupta mite kut ata a chhanchhuah ni; tin, Israel-hote chuan Aigupta mi thite chu tuipui kamah chuan an hmu a.

³¹Tin, Israel-hote chuan LALPAN Aigupta mite chunga thil ropui tak a tih chu an hmu a; tin, mipuite chuan LALPA chu an ṭih a, LALPA leh a chhiahhlawh Mosia chu an ring ta a.