Read Mizo_Old_version Exodus 15 Bible Online

Exodus 15 - Mizo_Old_version bible

Exodus 15

¹Chutichuan, Mosia leh Israela thlahte chuan LALPA chawimawiin he hla hi an sa a, an sawi dual dual a: “LALPA chawimawiin hla ka sa ang, ropui takin a hneh tâk hi! Sakawr leh a chunga chuang chu tuipuiah a paih thla ta a!

² LALPA chu ka chakna leh ka hla a ni, Ani chu ka chhandamna a lo ni ta bawk a; Ka Pathian a ni a, amah chu ka fak ang; Ka pa Pathian a ni a, amah chu ka chawimawi ang.

³ LALPA chu indo mi a ni; A hming pawh LALPA a ni.

⁴Pharaoa tawlailîrte leh a sipaihote chu tuipuiah a paih thla ta a; Tin, a sipai hotu thlante pawh Tuifinriat Senah an tla hlum zo ta.

⁵Tui thûk takin a chîm zo ta; Lung angin tui thûk takah an pil ta.

⁶I kut ding lam chu, aw LALPA, thiltihtheihnain a ropui a, I kut ding lam chuan, aw LALPA, hmêlma chu a tisawm ta dep a.

⁷I ropuina nasa tak chuan nangmah dotute chu i tiboral vek a; I thinrim i rawn hrithla a, buhpâwl ang maiin an kâng ral zo ta a.

⁸I hnâra thawin tuite chu a lo intiang a, Tuite chu englo dah khâwm thûr angin a ding luah a; Tuifinriat chhûng daiha tui thûk takte chu a lo khal zo ta a.

⁹Hmêlma chuan, ‘Ka ûm ang a, ka ûmphâk ngei ang, râllâk sum chu ka sem ang; Anmahniah chuan ka châk daih ka hmu tawh ang. Ka khandaih ka phawi ang a, ka kutin anmahni chu ka tiboral ang,’ a ti a.

¹⁰I thli chu i han tlehtîr ta mai a, tuifinriatin a chîm pil ta vek a; Tui thûk takahte chuan suan angin an pil ta vang vang a.

¹¹Aw LALPA, pathiante zîngah hian nang ang hi tu nge awm le? Thianghlimna lama ropui leh, Fak tlâk nihna lama zahawm leh, thil makte ti ṭhîn hi nang ang tu nge awm le?

¹²Nangin i kut ding lam i han phar a, Leiin anmahni chu a lem zo ta a.

¹³Nangin i khawngaihnain mipui i tlante kha i hruai a; I chênna thianghlimah chuan i chaknain i hruai ta a.

¹⁴Mi tinrêngin an hria a, an khûr thlu zo va, Philistia rama chêngte chu thlaphânnain a man ta.

¹⁵Tichuan, Edom rama hotute chuan mak an ti hle a; Moab mi chakte chu khurhnain a rawn man a; Kanaan rama awm zawng zawngte chu an tui zo ta.

¹⁶ṭihna leh hlauhnain a tlâkbuak a; I bân chaknain lung ang maiin a tingawi hle hle a, Aw LALPA, i mite an kai vek hma loh chuan, Mi i leite an kai vek hma loh chuan.

¹⁷Nangin anmahni chu i hruai lût ang a, i ro luah tlângah chuan i phun ang, Aw LALPA, nangin i awmna tûra hmun i buatsaihah chuan, Aw LALPA, hmun thianghlim i kut ngeiin a lo dinnaah chuan.

¹⁸ LALPA chuan chatuanin ro a rêl tawh ang,” tiin.

¹⁹Pharaoa sakawrte chu a tawlailîrte chawpin a sakawr chung chuang mite nên chuan tuipuiah an lût thla a, LALPAN tuifinriat tuite chuan a vûr ta a; Israela thlahte erawh chu tuipui chhûng lei chârah chuan an kal vek a.

²⁰Tin, zâwlnei Miriami, Arona farnuin khuangtê a keng a; tin, hmeichhia zawng zawngin khuangtê kenga lâmin an zui chhuak ve ta hlawm a.

²¹Tin, Miriami chuan, “LALPA chawimawiin hla sa rawh u, ropui takin a hneh tâk hi! Sakawr leh a chunga chuang chawpin tuipuiah a paih thla ta a,” tiin hlain a hruai a.

²²Tichuan, Mosian Israel-hote chu Tuifinriat Sen ata a hruai chhuak a, Sur thlalêr lam panin an chhuak ta a; tin, thlalêrah chuan ni thum zet an kal a, tui an hmu zo ta lo va.

²³Tin, Mara hmun an va thleng a, Mara hmuna tuite chu a lo khâk avâng chuan an in thei lo va; chu vâng chuan a hmingah Mara vuah a ni.

²⁴Tichuan, mipuite chu, “Eng nge ni kan in dâwn le?” tiin Mosia chungah an phunnawi ta a.

²⁵Tin, ani chuan LALPA chu a au va; tin, LALPA chuan thing pakhat hi a han kawhhmuh a, chu chu tuiah chuan a zuk paih lût a; tichuan, tui chu a lo tui ta a. Chutah chuan thuruat leh rorêlna a siamsak a; chutah chuan anmahni fiahna a siam a,

²⁶“LALPA i Pathian aw hi ngun taka i ngaihthlâka, a mit hmuha ṭha a tih zâwngte i tiha, a thupêkte i ngaihsâna, a thuruat zawng zawngte i pawm chuan, Aigupta mite chunga hri ka lêntîr tâk angte kha i chungah rêng rêng ka lêntîr ve lo vang. Kei LALPA a tidamtu che ka nih hi,” a ti a.

²⁷Tin, Elim hmun an va thleng a, chutah chuan tuihna nei sâwm leh pahnih leh tûm thing sawmsarih a awm a; tin, chuta tui kamahte chuan an riak ta a.