Read Mizo_Old_version Exodus 16 Bible Online

Exodus 16 - Mizo_Old_version bible

Exodus 16

¹Tin, Elim hmun ata chu an chhuak a, tin, Israela thlahte pung khâwmho zawng zawng chuan Aigupta ram ata an chhuah achin thla hnihna, ni sâwm leh ni nga niin Elim hmun leh Sinai tlâng inkâra Sin thlalêr an va thleng a.

²Tin, thlalêrah chuan Israela thlahte pung khâwmho zawng zawng chu Mosia chungah leh Arona chungah an lo phunnawi ta a.

³Tin, Israela thlahte chuan an hnênah, “Aigupta rama sa bêl bula kan ṭhut lai te leh chhang khamkhawp kan ei lai te khân LALPA kutah lo thi ta zâwk mai ila aw! Mipui pung khâwmho zawng zawngte hi thlalêrah hian rilṭâma tihhlum tûrin min hruai chhuak a nih hi le,” an ti a.

⁴Chutichuan, LALPAN Mosia hnênah, “Ngai rawh, vân aṭangin in tân chhang ka rawn sûrtîr ang e; tichuan, mipuiten ni tin ni khat atâna chanvo tâwk chauh zêl chu va chhar ṭhîn rawh se, ka dân an zâwm nge zâwm lo ka fiah theih nân.

⁵Tin, heti hi a ni ang a, a ni ruk ni chuan an va chhara chu an buatsaih ang a; tin, ni tina an chhar leh hnih zêl a ni ang,” a ti a.

⁶Tin, Mosia leh Aronan Israela thlahte zawng zawng hnênah chuan, “Tlai lamah chuan LALPA chu Aigupta ram ata hruai chhuaktu ngei che u a ni tih in hre dâwn e.

⁷Tin, zîngah pawh LALPA ropuina chu in hmu dâwn e; LALPA chunga in phunnawina kha a lo hriat tâk hi. Keinite chu eng nge kan niha, kan chunga in phunnawi mai ni?” an ti a.

⁸Tin, Mosian, “Chûng chu in la hria ang, LALPAN tlai lama sa ei tûr a pêk che ua, zîng lama chhang kham khawp a pêk hunah che u chuan; LALPA chuan a chunga in phunnawina kha a hre reng si a. Keinite chu eng nge kan nih ni? Kan chunga phunnawi in ni hlei nêm, LALPA chunga phunnawi asin in nih ni,” a ti a.

⁹Tin, Mosian Arona hnênah, “Israela thlah pung khâwm zawng zawng hnênah hian, ‘LALPA kiang hnaiah lo kal rawh u, in phunnawinate kha a lo hriat tâk hi,’ ti ang che,” a ti a.

¹⁰Tin, heti hi a ni a, Israela thlah pung khâwm zawng zawng hnêna Aronan thu a sawi lai tak chuan, thlalêr lam chu an han thlîr a; ngai teh, LALPA ropuina chu chhûmah a lo lang ta a.

¹¹Tin, LALPAN Mosia a bia a,

¹²“Israela thlahte phunnawinate kha ka lo hria a. An hnênah, ‘Tlai lamah chuan sa in ei ang a, a tûkah chuan chhang kham khawp zetin in ei tawh ang. Tichuan, kei hi LALPA in Pathian chu ka ni tih in hria ang, a ti e,’ ti ang che,” tiin.

¹³Tin, heti hi a ni a, tlai lamah chuan vahmîm an lo thlâwk chho chiam a, an riahhmun chu a dâp ta dul a; tin, a tûkah chuan an riahhmun vêlah chuan dai a lo tla dup a.

¹⁴Tin, dai tla chu a han hul veleh chuan, ngai teh, thlalêr lei chungah chuan thil pêr tê tê, vûr thal tiat lek lek tê hi a lo awm tuar mai a.

¹⁵Chu chu Israela thlahten an han hmuh chuan, “Eng nge maw ni chu le?” an ti hlawm a; eng nge ni tih an hre si lo va. Tin, Mosian an hnênah, “LALPAN chhang in ei atâna a pêk che u a nih hi.

¹⁶Hei hi a ni LALPAN, ‘Mi tinin mahni kham khawp ṭheuh chhar ulangin, mi pakhat tân omer khat zêl, in chhûngkaw mihring awm zât ang zêlin in chhar tûr a ni; mi tinin in puan in chhûnga awmte tân chuan in chhar tûr a ni,’ tia thu a pêk chu ni,” a ti a.

¹⁷Tin, Israela thlahte chuan chutiang chuan an ti a, ṭhenkhatin an chhar tam a, ṭhenkhatin an chhar tlêm a.

¹⁸Tin, omer-in an han teh a, a chhar tamin a chuangin a nei lo va, a chhar tlêmin a tlachham hek lo; mi tinin mahni kham tâwk an chhar ṭheuh va.

¹⁹Tin, Mosian an hnênah, “Tu mahin a tûk lam atân chuan khêk suh ang che u,” a ti a.

²⁰Nimahsela, Mosia thu chu an pawm duh lo va. ṭhenkhat chuan a tûk lam atân an khêk a; tichuan, a lo lung a, a lo rimchhe ta a. Chuvângin, Mosia chu an chungah a thinrim ta hle a.

²¹Chutichuan, tûk tin mi tinin mahni kham khawp lek zêlin an chhar ṭhîn a; ni a lo tlângsân veleh a tui ral vek ṭhîn a.

²²Tin, heti hi a ni a, a ni ruk ni chuan chhang chu a leh hnih, mi pakhat tân omer hnih zêl an chhar a. Tin, chûng pung khâwmho rorêltu zawng zawngte chuan Mosia an va hrilh a.

²³Tin, ani chuan an hnênah, “Chu chu alâwm LALPAN, ‘Naktûk hi chawlh dêr ni, LALPA tâna Chawlhni thianghlim a ni e,’ a tih chu. Chuvângin, a âwma âwm in duh leh âwm ulangin, a chhuma chhum in duh leh chhûm rawh u; chumi bâng chu a tûk lam atân in dah dâwn nia,” a ti a.

²⁴Tin, Mosia hrilh ang chuan a tûk lam atân an dah hrang ta a; chu chu a rimchhe lo va, a lung hek lo.

²⁵Tichuan, Mosian, “Vawiin chuan hei hi ei rawh u, vawiin hi LALPA tân Chawlhni a nih hi; vawiinah zawng leia tla in hmu lo vang.

²⁶Ni ruk chhûng chuan in va chhar ṭhîn ang a; a ni sarih ni erawh chu Chawlhni a ni a, chhar tûr rêng rêng a awm lo vang,” a ti a.

²⁷Tin, heti hi a ni a, a ni sarih ni chuan mi ṭhenkhat chu chhar tûrin an va chhuak a, chhar tûr rêng rêng an hmu zo ta lo va.

²⁸Tichuan, LALPAN Mosia hnênah, “Ka thupêkte leh ka dânte hi eng chen nge maw pawm duh loh in tum ni aw!

²⁹LALPAN Chawlhni a pêk che u hi hre ta che u maw le! Chuvângin, ni ruk niin ni hnih tla tâwk tûr chhang a pe che u a nih hi. Mi tin mahni hmun ṭheuhvah awm hle hle mai rawh u; ni sarih ni chuan tu mah an awmna hmun ata chhuak hauh suh se,” a ti a.

³⁰Chutichuan, mite chu ni sarih ni chuan an châwl ta a.

³¹Tin, Israela chhûngte chuan chumi hmingah chuan Manna an vuah a. Koriander mu ang maia vâr ser a ni a; han ei chuan chhangpêr, khawizu nêna siam ang a ni.

³²Tin, Mosian, “Hei hi alâwm LALPAN, ‘Hei hi in thlahte thlengin omer khat vawng ṭha rawh u; Aigupta ram ata ka hruai chhuah lai che ua, thlalêra ka châwm ṭhinna che u chhang chu an rawn hmuh theih nân,’ tia thu a pêk chu,” a ti a.

³³Chutichuan, Mosian Arona hnênah, “Bêl va la langin, manna hi omer khat khung rawh, in thlahte thlenga vawn reng tûrin LALPA hmaah dah ang che,” a ti a.

³⁴LALPAN Mosia thu a pêk ang chuan Arona chuan vawn reng tûrin Thuhriattîrna hmaah chuan a dah a.

³⁵Israela thlahte chuan mihring chênna ram an thlen hma loh chuan, kum sawmli chhûng chu manna an ei ṭhîn.

³⁶Omer khat hi epha hmun sâwma ṭhena hmun khat hu a ni.