Read Mizo_Old_version Exodus 17 Bible Online

Exodus 17 - Mizo_Old_version bible

Exodus 17

¹Tin, Israela thlahte pung khâwmho zawng zawng chu Sin thlalêr ata an chhuak leh a, LALPA thupêk angin riah bi nei thliah thliaha riakin, Rephidim-ah an inkhuar a; amaherawhchu, chutah chuan mipuite in tûr tui a awm ta lo va.

²Chuvângin, mipuite chuan Mosia chu an bei ta a, “Tui in tûr min pe rawh,” an ti a. Tin, Mosian an hnênah, “Engati nge mi beih mai? Eng vângin nge LALPA in fiah ni?” a ti a.

³Chutah chuan mipuite chu tuihâlin an awm a ni a; tichuan, mipuite chu Mosia chungah an phunnawi a, “Eng vângin nge kan fanaute leh kan rante nên hian tuihâla tihhlum tûrin Aigupta ata min hruai chhuah ni?” an ti a.

⁴Tin, Mosian, “Hêng mipuihote hi engtin nge ka tih ang? Lunga mi den hlum hial pawh an duh âwm hi,” tiin LALPA chu a au va.

⁵Tin, LALPAN Mosia hnênah, “Mipuiho hma lamah kal langin, Israela thlahte upaho ṭhenkhat hruai ve ang che; tin, i tiang, hmâna lui i vuakna kha keng langin, kal rawh.

⁶Ngai teh, Horeb-a lungpui chungah sâwn i hmaah ka lo ding ang a; tin, lungpui chu i han vua ang a; tichuan, mipuite in tûr tui chu a lo luang chhuak mai ang,” a ti a. Tin, Mosian Israela thlahte upaho mit hmuhah chuan chutiang chuan a han ti a.

⁷Chumi hmun hmingah chuan Masa leh Meriba a vuah a; Israela thlahten an beih avâng leh, “Kan zîngah hian LALPA chu a awm nge maw awm lo le?” tia LALPA chu an fiah avângin.

⁸Tin, Rephidim hmunah chuan Amalek-hovin Israel-ho chu an rawn bei ta a.

⁹Chutichuan, Mosian Josua hnênah, “Kan zînga mi hi thlang chhuak la, Amalek-ho hi va bei rawh u khai. Naktûkah tlâng chhîpah khian Pathian tiang kengin ka lo ding ang e,” a ti a.

¹⁰Tichuan, Mosian a hnêna a sawi ang chuan Josua chuan a ti a, Amalek-ho chu a va bei ta a. Tin, Mosia leh Arona leh Hura chu tlâng chhîpah an han lâwn a.

¹¹Tin, heti hi a ni a, Mosian a bân a phar veleh Israel-hote chuan an hneh ṭhîn a; a bân a lâk thlâk veleh Amalek-hote chu an chak ṭhîn a.

¹²Nimahsela, Mosia bânte chu a lo kham ta a; tichuan, lung an la a, a bulah chuan an dah a, chutah chuan a ṭhu ta a. Tin, Arona leh Hura chuan a kut chu an dâwmsak ta a, pakhatin lehlam a dâwm a, pakhatin a lehlam a dâwm a; chutichuan, ni tlâk thlengin a kutte chu a awm ngaiin a awm ta tlat a.

¹³Tin, Josua chuan Amaleka leh a hote chu khandaih hriamin a tudawl ta a.

¹⁴Tin, LALPAN Mosia hnênah, “Hemi thu hi hriat reng atân lehkhabuah ziak la, Josua hriatah sawi chhuak ṭhîn ang che; vân hnuaiah hian Amalek-ho hi an awm tih pawh hriat loh khawpin ka tichimit hlauh dâwn e,” a ti a.

¹⁵Tin, Mosian maichâm a siam a, a hmingah chuan Jehova-nisi a vuah a;

¹⁶“LALPAN chhia a chham ta: LALPAN chhuan awm chhûng zawng zawng chuan Amalek-ho chu a do vang,” a ti a.