Read Mizo_Old_version Exodus 18 Bible Online

Exodus 18 - Mizo_Old_version bible

Exodus 18

¹Tin, Jethroa, Midian rama puithiam, Mosia puzawn chuan Pathianin Mosia leh a mi Israel-hote thil a tihsakzia zawng zawngte leh, LALPAN Israel-hote chu Aigupta ram ata a hruai chhuah ziate chu a lo hria a.

²Tin, Mosia puzawn Jethroa chuan Mosia nupui Zipori, Mosian a hâwntîr kha, a fapate pahnih nên a hruai a; chu mi pakhat hming chu Gersoma a ni a, “Mi rama awm ka nih avângin,” a ti a;

⁴tin, pakhata hming chu Eliezera a ni, “Ka pa Pathian chu mi ṭanpuitu a ni a, Pharaoa khandaih lak ata chu mi chhanhim tâk avângin,” a ti a;

⁵tin, Mosia puzawn Jethroa chu Mosia fapate leh a nupui nên, Mosia hnênah thlalêra a riahna Pathian tlângah chuan an va kal a.

⁶Tin, ani chuan Mosia hnênah, “Kei i puzawn Jethroa hi i nupui nên, i fa pahnih nên kan lo kal e,” a ti a.

⁷Tin, Mosia chu a puzawn hmuak tûrin a va chhuak a, chibai a va bûk a. Chanchin te an inzâwt a; tichuan, puan inah an lût ta a.

⁸Tin, LALPAN Israel-ho avânga Pharaoa leh Aigupta-hote chunga a tih zia zawng zawngte leh, kawnglaka hrehawm an tuarzia zawng zawngte leh, LALPAN anmahni a chhanhimzia te chu Mosia chuan a puzawn chu a hrilh a.

⁹Tin, LALPAN Israel-hote chu Aigupta-ho lak ata a chhanhima, anmahni thil a lo tihsak tâkzia leh, an chunga a ṭhatna zawng zawng avângte chuan Jethroa chu a lâwm êm êm mai a.

¹⁰Tin, Jethroa chuan, “LALPA, Aigupta-ho lak ata leh Pharaoa lak ata chhanhimtu che u chu fakin awm rawh se; ani chuan Aigupta-ho thuhnuaia awm mipuite chu a chhanhim tâk hi.

¹¹Tûnah chuan LALPA chu pathian dang zawng zawngte ai chuan a ropui zâwk tih ka hre ta; a ni, Israel-te laka chapo takte chungah chuan a lo lang a ni,” a ti a.

¹²Tin, Mosia puzawn Jethroa chuan hâlral thilhlan leh Pathian tâna inthawina tûrte a va la a; tin, Arona leh Israel upaho zawng zawngte chu Mosia puzawn hnênah chuan Pathian hmaah chhang ei tûrin an kal a.

¹³Tin, heti hi a ni a, a tûkah chuan Mosia chu mipuite ro rêl tûrin a ṭhu a; tin, mipuite chu zîng ata tlai thlengin Mosia kiang vêlah chuan an ding reng a.

¹⁴Tin, Mosia puzawnin chutia mipuite tâna thil a tih zawng zawng chu a han hmuh chuan, “Mipuite hi thil eng nge maw i tihsak chu le? Engtizia nge nangmah chauh hi i ṭhut renga, zîng ata tawh tlai thlenga mipui zawng zawngte hi i kiang vêla an din reng?” a ti a.

¹⁵Tin, Mosian a puzawn hnênah, “Mipuite hi Pathian râwn tûrin ka hnênah an lo kal a ni ber e.

¹⁶Thu eng emaw an neih chuan ka hnênah hian an lo kal ṭhîn a; tichuan, keiin a ṭhenawmpa nêna an thu chu ka lo rêlsak a; tin, Pathian remruat leh a dânte chu ka lo hriattîr ṭhîn a ni,” a ti a.

¹⁷Tin, Mosia puzawn chuan a hnênah, “I thiltih dân chu a ṭha lo a ni.

¹⁸Nang leh hêng i hnêna mipui awmte hi in intichau zo ngei ang maw le. He hna hi i tân a hautak lutuk a ni; nangmah chauhva han tlin chi a ni hlei nêm.

¹⁹Ka thu hi ngaithla teh khai; rem ka han ruatpui ang chia, i hnênah Pathian awm rawh se: nang hi Pathian hmaah mipui aiawhin awm langin, an thubuaite chu Pathian hnênah thlen ang che.

²⁰Tin, thuruatte leh dân chu i zirtîr ang a, an awm dân tûr leh an tih dân tûrte chu i kawhhmuh zêl tûr a ni.

²¹Chu bâkah, mipui zîng ata mi hman tlâk deuh deuh, Pathian ṭih mite, mi dik takte, hlâwkna dik lo tak haw mite thlang chhuak langin; chutiang mite chu sâng pâwl chunga hotuah te, za pâwl chunga hotuah te, sawmnga pâwl chunga hotuah te, sâwm pâwl chunga hotuah te i ruat dâwn nia.

²²Chûngte chuan eng lai pawhin mite ro rêlsak rawh se. Tin, heti hi a ni ang, thu lian deuh apiang chu i hnênah an rawn thlen ṭhîn ang a, thu tê tham erawh chu anmahniin rêl rawh se. Chutichuan, i tân a lo awlsam zâwk ang a, anni chuan an chhâwk zâng hle dâwn che nia.

²³Chutianga i tiha, Pathian pawhin thu a pêk che chuan i tlin thei ang a; tichuan, hêng mipuiho zawng zawngte pawh hi lungawi takin mahni awmna lamah an ṭîn thei dâwn nia,” a ti a.

²⁴Chutichuan, Mosia chuan a puzawn thusawi chu a pawm a, a sawi ang zawng zawng chuan a ti ta a.

²⁵Tin, Mosia chuan Israel-ho zawng zawng zing ata chu mi hman tlâk deuh deuh a thlang chhuak a, mipui chunga hotuah a siam a, sâng pâwl chunga hotuah te, za pâwl chunga hotuah te, sawmnga pâwl chunga hotuah, te sâwm pâwl chunga hotuah te a ruat ta a.

²⁶Chûngte chuan eng lai pawhin mite ro an rêlsak ṭhîn a; thu lian deuh apiang chu Mosia hnênah an thlen ṭhîn a, thu tê tham erawh chu anmahnihovin an rêl ṭhîn.

²⁷Tichuan, Mosia chuan a puzawn chu a kaltîr a, a awmna ram lamah chuan a haw leh ta a.