Read Mizo_Old_version Exodus 19 Bible Online

Exodus 19 - Mizo_Old_version bible

Exodus 19

¹Israela thlahte Aigupta ram ata an chhuah achin a thla thumna, chumi ni tak chuan Sinai thlalêr an thleng a.

²Rephidim hmun ata an chhuaha, Sinai thlalêr an va thlen chuan thlalêrah chuan an riak a; chutah chuan Israel-hote chu tlâng bulah chuan an riak a.

³Tin, Mosia chu Pathian hnênah a han chho va; tichuan, LALPA chuan tlâng aṭangin a bia a, a hnênah, “Jakoba chhûngte hnênah hetiang hian ti la, Israela thlahte hnênah pawh:

⁴‘Aigupta-hote chunga ka tih ziate leh, mupui thlaa ka put che ua, ka hnêna ka hruai thlen zia che u hi in hmu a.

⁵Chuvângin, ka thu in awih takzeta, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang; khawvêl pum pui hi ka ta a ni si a.

⁶Tichuan, ka tân puithiam chi, hnam thianghlim in ni ang,’ tiin hrilh ang che. Hêng thu hi Israela thlahte hnêna i sawi tûr chu a ni,” a ti a.

⁷Tin, Mosian mipui zînga upahote chu a ko khâwm a, LALPA thupêk zawng zawngte chu a hrilh vek a.

⁸Tin, mipuiho zawng zawng chuan, “LALPA sawi zawng zawngte chu kan ti zêl ang e,” tiin a rualin an chhâng dual dual a. Tichuan, Mosian mipuite thusawi chu LALPA a hrilh lehchhâwng a.

⁹Tin, LALPA chuan Mosia hnênah, “Ngai teh, ka biak lai tak che mipuiin an hriat ve theiha, kumkhuaa i thu chu an awih theihna tûrin chhûm chhah mupah i hnênah ka lo kal dâwn e,” a ti a. Tichuan, Mosian mipuite thusawi chu LALPA a hrilh lehchhâwng a.

¹⁰Tin, LALPAN Mosia hnênah, “Mipuiho hnênah va kal la, vawiin leh naktûk hian anmahni chu tithianghlim ang che, an puante su fai sela.

¹¹A ni thum ni atân inpuahchah rawh se. A ni thum ni chuan mipuiho zawng zawng mit hmuhah Sinai tlângah chuan LALPA a lo chhuk dâwn e.

¹²An hnênah, ‘Fîmkhur ula, tlângah khian han lâwn hauh suh ula, tlâng hmâwr pawh han dek hlek suh ang che u. Tu pawh tlâng han dek apiang chu tihhlum ngei ngei tûr an ni ang.

¹³Kut rêng rêngin deh tûr a ni lo va, lunga den hlum ngei ngei tûr a ni, a nih loh leh, kah tlang tûr a ni ang; sa pawh, mihring pawh an nung lo vang,’ tiin hrilh la. Tawtawrâwt a rîk ruai ruai hunah chuan tlângah khian an lâwn chho tûr a ni, tiin mipuiho tân ri khamsak ang che,” a ti a.

¹⁴Chutichuan, Mosia chu tlâng ata mipuiho zîngah chuan a chhuk a, mipuite chu a tithianghlim a; tin, an puante an su fai a.

¹⁵Tin, mipuihote hnênah chuan, “A ni thum ni atân chuan inpuahchah rawh u; hmeichhe kiangah rêng rêng kal suh u,” a ti a.

¹⁶Tin, heti hi a ni a, a ni thum ni zîngah chuan khawpuite a lo ri a, kâwlte a lo phe a, tlâng chhîpah chuan chhûm a lo zîng chhah mup a, tawtawrâwt ring êm êm maiin a lo ri a; tichuan, mipui riahhmuna awmho zawng zawng chu an khûr a.

¹⁷Tichuan, Mosian mipuiho chu Pathian be tûrin riahhmun ata chu a hruai chhuak hlawm a; tlâng bulah chuan an ding a.

¹⁸Tin, Sinai tlângah chuan LALPA chu meia a lo chhuk avângin a khu phui ta mup a. Chu meikhu chu rawh tuina meikhu ang maiin a khu chho ngut ngut a; tichuan, tlâng pum pui chu a nghîng dur dur a.

¹⁹Tin, tawtawrâwt ri chu a ring telh telh a, Mosia chuan thu a han sawi a, Pathian awin a lo chhâng a.

²⁰Tichuan, LALPA chu Sinai tlâng, tlâng chhîpah chuan a lo chhuk a. LALPA chuan Mosia chu tlâng chhîpah a ko chho va; tichuan, Mosia chu a han chho va.

²¹Tin, LALPA chuan Mosia hnênah, “Zuk chhuk langin, mipuite khu zuk zilh rawh; chuti lo zawng, LALPA hmêl hmuh tumin an lo lût tlang mai ang e, mi tam tak an boral mai tûr a nia.

²²Tin, puithiamho, LALPA kianga lo kal vete pawh chu intithianghlim ve rawh se; chuti lo zawng, an chungah LALPA chu a ṭuan mai ang,” a ti a.

²³Tin, Mosian LALPA hnênah, “Mipuiho hi Sinai tlângah hian an lo chho thei hlei nêm; nangin, ‘Tlâng vêlah hian ri khamsak la, tithianghlim ang che,’ tiin thu min pe alâwm,” a ti a.

²⁴Tin, LALPAN a hnênah, “Kal la, zuk chhuk tawh; tin, Arona nên lo chho leh ang che u. Amaherawhchu, puithiamho leh mipuiho chu LALPA hnêna lo kal tumin lo lût tlang mai suh se; chuti lo zawng, an chungah a ṭuan mai tûr a nia,” a ti a.

²⁵Chutichuan, Mosia chu mipuite hnênah chuan a zuk kal a, chûng thu chu a zuk hrilh a.