Read Mizo_Old_version Exodus 21 Bible Online

Exodus 21 - Mizo_Old_version bible

Exodus 21

¹“Tichuan, hêngte hi a ni an hnêna rorêl dân tûr i hriattîr tûrte chu:

²“Hebrai mi, chhiahhlawhah lo lei ang la, kum ruk rawng a bâwl ang a; tin, a kum sarih kum chuan intlan lo pawhin a chhuak mai thei ang.

³Amah ngawta lo lût a nih chuan amah ngawtin a chhuak leh mai ang; nupui nei a nih chuan a nupui pawh chu a chhuak tel ve bawk ang.

⁴A puin nupui lo neihsak sela; tin, fanu emaw, fapa emaw lo hrinsak sela; a nupui leh a fate chu a pu ta an ni ang a, ani erawh chu amah ngawtin a chhuak tûr a ni.

⁵Amaherawhchu, bawih chuan, ‘Ka pu te, ka nupui te, ka fa te hi ka hmangaih êm mai a; ka chhuak duh lo ve,’ a tih tlat chuan,

⁶a puin Pathian hnênah hruai sela, kawngkâah emaw, kawngka biangah emaw hruai sela, a puin a beng chu thir zumin vit sela; tichuan, kumkhuain a rawng a bâwl tawh ang.

⁷“Miin a fanu chu bawihnu atân hralh sela, chhiahhlawh mipate ang chuan a chhuak ve lo vang.

⁸A pu chuan a nupui atân lo hual sela, ani chuan a pu chu lo tilâwm leh thei ta si lo sela, a intlantîr leh tûr a ni, a lo bum avâng chuan hnam dangte hnêna zawrh leh theihna a nei hlek lo vang.

⁹Tin, a fapa tâna nupuia hualsak duh a nih chuan, fanute en ang bawkin a en tûr a ni.

¹⁰Nupui dang lo nei leh mah sela, a ei tûr sa te, a silhfên te, a nupui a nihna te kha a tihlêm chuansak tûr a ni lo ve.

¹¹Chu thil kawng thum chu a tih loh chuan tangka pe lovin a chhuak mai thei ang.

¹²“Tu pawhin mi lo vua sela, chu mi chu thi ta sela, tihhlum ve ngei ngei tûr a ni.

¹³Tin, miin tum rêng vâng ni lova, Pathian chaltawhtîr a nih erawh chuan, a tlân luhna tûr hmun ka ruatsak ang che.

¹⁴Amaherawhchu, miin tum lui rêngin a ṭhenawm chu fin vervêkin thah tum sela, thi tûrin ka maichâm ata chu hruai ang che.

¹⁵“Tu pawh a nu emaw, a pa emaw vua apiang chu tihhlum ngei tûr a ni.

¹⁶“Tu pawh mihring rua zuar emaw, a la kawl lai ngei emaw an hmuh chuan, chu mi chu tihhlum ngei tûr a ni.

¹⁷“Tu pawh a nu emaw, a pa emaw ânchhia lawh apiang chu tihhlum ngei tûr a ni.

¹⁸“Tin, mi lo inhnial sela, pakhat chuan lungtumin chhu sela emaw, a kuttumin chûm sela emaw, thih chu thi lo sela, amaherawhchu khumbetin tlûk phah sela,

¹⁹lo tho leh theiin tiang hawlin lo kal leh thei sela, a kut thlâktua chu chhuah tûr a ni. A hun sên hu kha erawh chu a rûl ang a, a dam feltîr viah tûr a ni.

²⁰“Tin, miin a chhiahhlawh emaw, a bawihnu emaw tiangin vua sela, a kutah chuan lo thi ta sela, amah chu hrem ngei tûr a ni.

²¹Amaherawhchu, ni khat emaw, ni hnih emaw dam sela, hrem tûr a ni lo vang; a chhiahhlawh chu a sum leh pai a ni si a.

²²“Tin, mi lo insual ta sela, hmeichhe nau pai vaw palh ang sela, a nau pai chu lo tla sela, chhiatna dang erawh chu awm lo sela, chu hmeichhe pasalin a ngen zât chu chawitîr ngei tûr a ni a; rorêltute ruat ang zât chu a pe tûr a ni.

²³Amaherawhchu, chhiatna dang lo awm sela chuan nun aia nun,

²⁴mit aia mit, hâ aia hâ, kut aia kut, ke aia ke,

²⁵tihkan aia tihkan, hliam aia hliam, vuak aia vuak i tuartîr tûr a ni.

²⁶“Tin, miin a chhiahhlawh mit emaw, a bawihnu mit emaw vuain, lo tichhe ta sela, a mit avâng chuan a chhuahtîr tûr a ni.

²⁷Tin, a bawihpa hâ emaw, a bawihnu hâ emaw lo vuak balsak sela, a hâ avâng chuan a chhuahtîr tûr a ni.

²⁸“Tin, sebâwngpain mipa emaw, hmeichhia emaw lo si hlum ta sela, chu sebâwngpa chu lunga den hlum ngei tûr a ni a, a sa chu ei tûr a ni lo; sebâwngpa neitua erawh chu hrem loh tûr a ni.

²⁹Amaherawhchu, sebâwngpa chuan tûn hma pawhin mi sîk lo hmang ṭhîn sela, a neitu chu lo hriattîr tawh bawk sela; nimahsela, khung duh chuang lovin, mipa emaw, hmeichhia emaw lo si hlum ta sela, chu sebâwngpa chu lunga den hlum tûr a ni a, a neitu pawh chu tihhlum bawk tûr a ni.

³⁰A tlana tlan tûrin lo tuk zâwk sela erawh chuan, a nunna aiah chuan an tuk zât apiang chu tlan nân pêk tûr a ni.

³¹Mi fapa emaw, mi fanu emaw pawh lo si hlum ni sela, hetiang dân bawk hian rêl tûr a ni.

³²Sebâwngpain bawihpa emaw, bawihnu emaw lo si hlum ta sela, an pu chu tangka sekel sawmthum a pe ang a; tin, sebâwngpa chu lunga den hlum tûr a ni ang.

³³“Tin, miin khuarkhurum chhîn lo hawng sela emaw, miin khuarkhurum lo siam sela emaw, lo chhîn lo sela, sebâwngpa emaw, sabengtung emaw lo tla ta sela,

³⁴chu khuarkhurum neitu chuan a rûl tûr a ni; ani chuan chûng ran neitu chu tangka a pe ang a, anin ran thi chu a ruang a hlâwm thung ang.

³⁵“Tin, mi pakhat sebâwngpain mi sebâwngpa lo si hlum sela, sebâwngpa dam zâwk chu an zuar ang a, a man chu an insem ang; tin, a thia pawh chu an insem ang.

³⁶Sebâwngpa chuan tûn hma pawhin mi sîk lo hmang ṭhîn sela, a neitu chuan khung duh si lo sela, sebâwngpa aiah chuan sebâwngpa vêk chu a pe ngei ngei tûr a ni a; tin, ran thi ruang chu a hlâwm ang.