Read Mizo_Old_version Exodus 22 Bible Online

Exodus 22 - Mizo_Old_version bible

Exodus 22

¹“Tin, miin sebâwngpa emaw, berâm emaw ru sela; tin, lo talhin emaw, lo zuar emaw ta sela, sebâwngpa pakhat aiah chuan sebâwngpa panga a chawi ang a, berâm pakhat aiah chuan berâm pali a chawi ang.

²Rûkru, mi ina lût chu lo manin lo vaw hlum ta sela, a vaw hlumtu chu a thisen chhuah ve tûr a ni lo ve.

³Niin a rawn chhuah hnan hman erawh chuan a thisen chhuah ve tûr a ni ang (Rûkru chuan kim takin a pe kîr leh tûr a ni; pêk tûr a neih loh erawh chuan rûk a rûk avângin amah chu an zuar tûr a ni).

⁴Rûkruin a thil rûk - sebâwngpa emaw, sabengtung emaw, berâm emaw - a nungin lo la nei reng sela, a leh hnih a chawi tûr a ni.

⁵“Miin mi lovah emaw, mi grêp huanah emaw a ran thlahin an huan thlai ei zawhtîr ta sela, ama lo ṭha ber emaw, ama grêp huan ṭha ber emawin a rûl leh tûr a ni.

⁶“Mei chhuahin hlîng ṭawmte emaw lo manin, buhphalte emaw, buh ding lai emaw, lo emaw lo kâng ta vek sela, mei chhuahtu ngeia chuan a rûl ngei tûr a ni.

⁷“Miin a tangka emaw, a bungrua emaw a ṭhenawm vawntîr sela; tin, chumi in ata chu miin lo ru ta sela, rûkru chu an man chuan a leh hnih a chawi tûr a ni.

⁸Rûkru chu an man si loh chuan, chumi in neitupa chu Pathian kiangah va kal sela, a ṭhenawmpa bungrua chu aman a lo lâk a nih leh nih loh va fiah rawh se,

⁹Bawhchhiatna tawh phawt chu sebâwngpa thu-ah emaw, sabengtung thu-ah emaw, berâm thu-ah emaw, silhfên thu-ah emaw, thil eng pawh bo chungchâng thu-ah rêng rêng - miin, ‘Hei chu ka ta a ni,’ lo ti ta sela, an pahniha thubuai chu Pathian hnênah thlen tûr a ni; Pathianin thiam loh a chantîr zâwk apiang chuan a ṭhenawmpa lakah chuan a leh hnih a chawi ang.

¹⁰“Miin sabengtung emaw, sebâwngpa emaw, berâm emaw, ran eng pawh a ṭhenawmpa lo enkawltîr sela; tin, lo thiin emaw, lo silin emaw, suamin emaw lo awm sela, tu mân hmu si suh sela,

¹¹ani chuan a ṭhenawmpa ran chu a khawih leh khawih loh thu-ah, an pahniha kârah chuan LALPA hming chhâlin chhia a chham tûr a ni; tichuan, a neitu chuan chu chu a lo pawm ang a, ani chuan a rûl lo vang.

¹²Amaherawhchu, rûksak ngei a nih chuan a neitu chu a rûl tûr a ni.

¹³Sain seh sela, a them chu hriattîr nân rawn keng rawh se; chumi sa seh ai chu a rûl tûr a ni lo.

¹⁴“Miin a ṭhenawmpa ran lo hawhsak sela, lo silin emaw, lo thi emaw ta sela, tin, a neitupa chu awm lo sela, a rûl ngei tûr a ni.

¹⁵A neitupa chu a awm ve reng erawh chuan a rûl tûr a ni lo. Man chawia hawh a nih erawh chuan an inhawh dân athu thu a ni ang.

¹⁶“Miin nula, nupuia la hual loh chu lo thlêmin lo mutpui sela, a man pein a nupui atân a nei ngei tûr a ni.

¹⁷A pain a neihtîr phal lul loh chuan nula man zah sum chu a pe rêng rêng tûr a ni.

¹⁸“Dawithiamnu rêng rêng i zuah tûr a ni lo.

¹⁹“Tu pawh ran mutpui apiang chu tihhlum ngei tûr a ni.

²⁰“Tu pawh LALPA hnênah chauh tih loh, pathian dang rêng rêng hnêna inthawi chu tihboral hlauh tûr a ni.

²¹Hnam dang i sawisa tûr a ni lo va, i hnehchhiah tûr a ni hek lo; nangni pawh Aigupta ramah khân hnam dang in nih kha.

²²“Hmeithai emaw, fahrah emaw in tirethei tûr a ni lo.

²³Anmahni chu in tihretheih vaiha, mi rawn auh phawt chuan, an mi auhna aw chu ka lo ngaithla ngei ang a;

²⁴tichuan, ka thinur chu a ling phut mai ang a, khandaihin ka rawn tihlum ang che u; tin, in nupuite chu hmeithai an ni ang a, in fate pawh fahrahin an awm mai ang.

²⁵“Ka miteho zînga mi in hnêna awm, retheite tangka i pûktîr chuan i leibatu angah i ngai tûr a ni lo va; a lakah a pung i phût tûr a ni hek lo.

²⁶I ṭhenawm silhfên chu lo hrênsak ta ang la, ni tlâk hmain i pe leh tûr a ni.

²⁷Inthuam nâna a neih chhun a ni a, a taksa tihlum nâna a puan a ni si a. Eng sinin nge a mut ang? Tin, heti hi a ni ang a, mi rawn auh chuan ka lo ngaithla ngei ang; kei zawng mi khawngaih thei tak ka ni si a.

²⁸“Pathian chu i hau tûr a ni lo va, i mite zînga rorêltute chu ânchhia i lawh tûr a ni hek lo.

²⁹I thlai thar hmasa ber leh i uain tui tla hmasa ber chu i hlân var tûr a ni. I fapa upa ber chu mi pe tûr a ni.

³⁰Chutiang bawkin i sebâwngpate leh i berâmte pawh chu i ti tûr a ni. Ni sarih chu a pui hnênah a awm ang a; a ni riat ni chuan mi pe tûr a ni.

³¹Tin, ka tân mi thianghlim in ni tûr a ni. Rama sa seh rêng rêngte chu in ei tûr a ni lo va; ui hnênah in theh mai tûr a ni.