Read Mizo_Old_version Exodus 23 Bible Online

Exodus 23 - Mizo_Old_version bible

Exodus 23

¹“Thuthang dik lo chu i sawi chhâwng mai mai tûr a ni lo. Hretu fel lo tak nihna tûrin mi suaksual zîngah chuan i kut chu rawlh ve suh.

²Thil sual tih tumin mipui chu i zui tûr a ni lo va; thubuaiah pawh a tam lam, a dik lo zâwk lamah chuan i ṭang ve mai tûr a ni hek lo.

³Mi rethei pawh a thubuaiah i ṭan bîk tûr a ni hek lo.

⁴“I hmêlma sebâwngpa emaw, a sabengtung emaw bo i hmuh chuan, a hnênah i khalh hâwnsak leh ngei tûr a ni.

⁵Nangmah hawtu che sabengtung a phurin a delh beh reng i hmuhin, puih duhna rêng nei lo mah la, i pui ngei tûr a ni.

⁶“I mi rethei chu a thubuaiah dik lo takin i rêlsak tûr a ni lo.

⁷Thu dik lovah zawng inthiarfihlîm daih rawh; tin, pawi sawi lo leh mi felte chu tihlum suh. Mi suaksualte chu thiam ka chantîr dâwn si lo va.

⁸Tin, thamna rêng rêng i la tûr a ni lo; thamna chuan khaw hmu lai mitte hi a tihdelsak ṭhîn a, mi fel thu chu a tihkhawlohsak ṭhîn.

⁹Hnam dang i hnehchhiah tûr a ni lo; nangni pawh Aigupta ramah khân hnam dang in lo nih tawh avângin hnam dang rilru put dân chu in hre si a.

¹⁰“Kum ruk chhûng chu i lovah buh tuh tûr a ni a, chuta a hâwng apiang chu khung zêl tûr a ni;

¹¹a kum sarih kum erawh chuan awmtîr la, dah tui rawh; tichuan, i mi retheiten an ei ve thei ang a; tin, an lâk bâng awm apiang chu ramsaten an ei ve dâwn nia. Chutiang bawkin i grêp huan leh i olive huan pawh i ti tûr a ni.

¹²Ni ruk chhûngin i hna i thawk tûr a ni a, a ni sarih ni chuan i châwl tûr a ni a; tichuan, i bâwngpa emaw, i sabengtung emaw an lo châwl thei ang a, i bawihnu fapate leh i hnam dangte pawh an lo hahdam ve thei dâwn nia.

¹³Tichuan, in hnêna ka sawi zawng zawng hi ngaihven ula, pathian dangte hming rêng rêng chu lam suh u, in kâ aṭangin chhuah pawh chhuak suh se.

¹⁴“Kum khatah vawi thum ka tân kût i nei tûr a ni.

¹⁵Chhang dawidim telh loh kût i nei tûr a ni. Thu ka lo pêk tâk che ang khân, ni sarih chhûng chu chhang dawidim telh loh, Abib thlaa hun ruatah khân i ei tûr a ni (Khami thlaah a nih kha Aigupta ram ata i lo chhuah); tichuan, ka hmaah tu mah hi kut ruakin in lo lang tûr a ni lo;

¹⁶tin, lova i tuh, i thawh rim rah hmasa ber, buhseng kût chu i nei tûr a ni; tin, kum ral veleh lovah i thawh rim rahte i khung vek hnuin pâwl kût i nei tûr a ni.

¹⁷Kum khatah vawi thum i mipate zawng zawng chu LALPA Pathian hmaah an rawn inlan ṭhîn tûr a ni.

¹⁸“Ka tân inthawina sa thisen chu chhang dawidim telh nên chuan i rawn hlân tûr a ni lo; ka tân kûtna sathau chu zankhuain, a tûk thlengin awmtîr reng tûr a ni hek lo.

¹⁹I lova thlai thar hmasa ber chu LALPA i Pathian inah i rawn dah tûr a ni. Kêlnosa a pui hnutetuiin i chhûm tûr a ni lo.

²⁰“Ngai teh, kawnga vêng zêl tûr che leh, hmun ka buatsaihah chuan hruai lût tûr chein i hmaah vântirhkoh ka rawn tîr dâwn e.

²¹Ama zai ngai zêl ulangin, a thusawi pawm thîn ang che u; a chungah hel suh u, in bawhchhiatnate chu a ngaidam duh dâwn si lo va; amahah chuan ka hming a awm a nia.

²²Amaherawhchu, a thusawi i pawmsak takmeuhva, ka sawi apiang i tih zêl chuan i hmêlmate hmêlma chu ka ni ve ang a, i dote dova chu ka ni ve ang.

²³Ka vântirhkoh chuan i hma a hruai zêl ang a, Amor-hote, Hit-hote, Periz-hote, Kanaan-hote, Hiv-hote, Jebus-hote awmnaah chuan a hruai ang che; anni chu ka tiboral daih dâwn e.

²⁴An pathiante chu chibai i bûk tûr a ni lo va, an rawng i bâwl tûr a ni hek lo an thiltih angte chu i ti ve tûr a ni hek lo; i tichimit vek tûr a ni a, an lungphunte chu i tikeh sawm vek zâwk tûr a ni.

²⁵Tin, LALPA in Pathian rawng chu in bâwl tûr a ni; tichuan, i chhang leh i tui chu mal a sâwm ang a; tin, in zîng ata hri hi ka tikiang daih dâwn nia.

²⁶I ram chhûngah hian nauchhiat leh ching rêng an awm lo vang a; i dam chhûng nite chu ka tihtlingtlâksak ang che.

²⁷“I hmaah chuan ka ṭihbaina ka tîr ang a, i kalna tûr rama mite zawng zawng chu ka timangang ang a; tichuan, i hmêlmate zawng zawng chu i hmaah ka tlânchhiattîr ang.

²⁸Tin, i hmaah khawinghal ka tîr ang a, chu chuan Hiv-hote, Kanaan-hote, Hit-hote chu i hmaah a ûm zêl ang.

²⁹Kum khat chhûng mai chuan ka hnawh chhuahsak lo vang che; chuti lo zawng, ram chu a lo ṭiau mai ang a, ramsate chu i tân a lo tam lutuk dah ang e.

³⁰I lo puna ram chu i luah khah hma chuan, zawi zawiin ka hnawh chhuahsak hret hret zâwk ang che.

³¹I ramri chu Tuifinriat Sen aṭanga Philistia-ho tuipui thlengin, thlalêr aṭanga Lui thlengin ka khamsak ang che. Chumi rama awmte chu in kutah ka pe dâwn si a; tichuan, anmahni chu i hnawt chhuak tûr a ni.

³²An hnênah thu i thlung tûr a ni lo va, an pathiante hnênah pawh i thlung tûr a ni hek lo.

³³I ram chhûngah an awm tûr a ni lo; chuti lo zawng, ka chungah hian an sualtîr dah ang che. An pathiante rawng i bâwl vaih zawngin i tân thang a ni ngei dâwn a ni,” a ti a.