Read Mizo_Old_version Exodus 24 Bible Online

Exodus 24 - Mizo_Old_version bible

Exodus 24

¹Tin, ani chuan Mosia hnênah, “Nang nên, Arona nên, Nadaba nên, Abihua nên, Israel upa sawmsarih nên LALPA hnênah lo chho ula, ralkhat aṭangin chibai rawn bûk ang che u.

²Mosia chu amah chauhvin LALPA hnênah lo kal sela, anniho erawh chu lo kal hnai suh se; mipuite pawh a hnênah chuan lo chho suh se,” a ti a.

³Tichuan, Mosia chu a zuk kal a, LALPA thu zawng zawng leh rorêl dân tûr zawng zawng chu mipui hnênah a zuk sawi a; tin, mi zawng zawng chuan, “LALPA sawi zawng zawng chu kan ti ang e,” tiin a rualin an chhâng dual dual a.

⁴Tin, Mosia chuan LALPA thu zawng zawng chu a ziak vek a. Tin, a tûk zîng takah a tho va, tlâng bulah chuan maichâm a siam a; tin, lungphun sâwm leh pahnih, Israel hnam sâwm leh hnam hnih zâtin a phun bawk a.

⁵Tin, Israela thlahte zînga tlangvâlte chu a tîr a, chu mite chuan LALPA tân hâlrala thilhlante an hlân a, remna inthawiin sebâwngpatein an inthawi bawk a.

⁶Tin, Mosia chuan chûng thisen zâtve chu a la a, maihûnahte a dah a; tin, thisen zâtve dang chu maichâmah a theh a.

⁷Tin, thuthlunna bu chu a la a, mipuite hriatah chuan a chhiar a. Anni chuan, “LALPAN a sawi zawng zawng chu kan ti zêl ang,” an ti a.

⁸Chutichuan, Mosian thisen chu a la a, mipuite chu a theh a, “Hei hi LALPAN hêng thu zawng zawng chungchâng thua in hnêna thu a lo thlun tawh, thuthlunna thisen a nih hi,” a ti a.

⁹Chutichuan, Mosia leh Arona leh Nadaba leh Abihua leh Israel upa sawmsarihte chu an han chho va,

¹⁰Israela Pathian chu an han hmu a. Tin, a kephah hnuai chu sapphir lungrem ang mai, a thianzia chu vân thiang vek ang mai hi a ni a.

¹¹Tin, Israela thlahte zînga mi lianhote chungah chuan a kut a thlâk lo; tichuan, Pathian chu an hmu a, an eiin an in hlawm a.

¹²Chutichuan, LALPA chuan Mosia hnênah, “Tlângah hian ka hnênah lo chho la, lo awm rawh; tichuan, mipuite i zirtîr atâna lungphêka dân leh thupêk ka ziak chu ka lo pe ang che,” a ti a.

¹³Tin, Mosia leh a rawngbâwltu Josua chu an tho va; tin, Mosia chu Pathian tlângah chuan a han kal a.

¹⁴Tin, ani chuan upate hnênah chuan, “In hnêna kan lo kal hma chuan hetah hian min lo nghâk reng ang che u. Ngai teh u, Arona leh Hura in hnêna an awm hi. Tu pawhin thubuai eng emaw in neih chuan an hnênah hian in lo kal ṭhîn dâwn nia,” a ti a.

¹⁵Chutichuan, Mosia chu tlângah chuan a han chho va, chhûmin tlâng chu a chîm ta mup a.

¹⁶Tin, LALPA ropuina chu Sinai tlângah chuan a awm ta reng a, chhûm chuan ni ruk chhûng chu a chîm a. Tin, a ni sarih ni chuan chhûm aṭangin Mosia chu a han ko va.

¹⁷Tin, Israela thlahte mit hmuhah chuan LALPA ropuina lan dân chu, tlâng chhîpa thil kan ral hmang mei ang mai a ni a.

¹⁸Tin, Mosia chu chhûm zîngah chuan a va lût a, tlângah chuan a han lâwn a. Tin, Mosia chu tlângah chuan ni sawmli leh zan sawmli a han awm a.