Read Mizo_Old_version Exodus 25 Bible Online

Exodus 25 - Mizo_Old_version bible

Exodus 25

¹Tin, LALPAN Mosia chu a bia a,

²“Israela thlahte hnênah thu va sawi la, ka hnênah thil rawn hlân rawh se. An thinlunga châk taka pe apiangte pêk chu ka tâna thilhlanah in la tûr a ni.

³Hêngte hi a ni an hnên aṭanga hlan tûra in lâk tûrte chu: rangkachak te, tangkarua te, dâr te,

⁴la dumpâwl te, la senduk te, la senlâr te, la zai sîn te, kêl hmul te;

⁵tin, berâmpa vun chhum sen te, savun ṭha chi vun te, thingri thing te;

⁶khâwnvâr atân hriak te, hriak thih mi atân leh hâl tûr rimtui tak atân englo rimtui te;

⁷puithiam kawr leh kawr âwma zeh tûrin onukion-te leh lunghlute nên.

⁸Tin, hmun thianghlim mi siamsak rawh se, an zînga ka chên ve theih nân.

⁹Biakbûk lem leh a chhûnga bungrua tûr zawng zawng lem ka entîr ang chiah che hian in siam tûr a ni.

¹⁰“Tin, thingri thingin bâwm siam sela; a dung lam chu tawng hnih leh a chanve ni sela, a vâng lam chu tawng khat leh a chanve ni rawh se.

¹¹Tin, rangkachak hlîr hlak tîin i luan tûr a ni a, a chhûng leh a pâwn i luan tûr a ni a; tin, rangkachakin a tlâng i kâwm tûr a ni.

¹²Chumi atân chuan rangkachak khâng pali i chhûng tûr a ni a, a ke paliah chuan vuah vek tûr a ni; chumi khâng pahnih chu a lehlamah vuah tûr a ni a, khâng pahnih chu a lehlamah vuah bawk tûr a ni.

¹³Tin, thingri thingin zâwnfungte i siam tûr a ni a, rangkachak tîin luan tûr a ni.

¹⁴Tin, bâwm chu zâwn theih tûrin a panga khângah chuan zâwnfungte chu i rawlh tûr a ni.

¹⁵Chu bâwma khângah chuan zâwnfungte chu a invuah reng tûr a ni; phawi chhuah hlek tûr a ni lo ve.

¹⁶Tin, bâwm chhûngah chuan thuhriattîrna ka la pêk tûr che chu i dah tûr a ni.

¹⁷“Tin, rangkachak hlîr hlakin zahngaihna ṭhutphah i siam tûr a ni; a dung lam chu tawng hnih leh a chanve ni sela, a vâng lam chu tawng khat leh a chanve ni rawh se.

¹⁸Tin, cherub pahnih rangkachakin i siam tûr a ni; zahngaihna ṭhutphah hmâwr ve vea mi chu a chherin i chher tûr a ni.

¹⁹A hmâwr lehlamah cherub pakhat siam la, a hmâwr lehlamah cherub pakhat siam bawk ang che; zahngaihna ṭhutphah nêna inbelhbawm khâwm vekin a hmâwr ve vea cherub pahnih chu in siam tûr a ni.

²⁰Tin, cherub-te chu inhmatawna zahngaihna ṭhutphah chu an thlaa hliapin, an thlate chu an zâr duai tûr a ni; zahngaihna ṭhutphah lam chu cherub-te chuan an hawi ve ve tûr a ni.

²¹Tin, bâwm chungah zahngaihna ṭhutphah chu i dah tûr a ni a; tin, bâwm chhûngah chuan thuhriattîrna ka la pêk tûr che chu i dah tûr a ni.

²²Chutah chuan i hnênah ka lo kal ang a; tin, thuhriattîrna bâwm chunga cherub pahnih inkâr, zahngaihna ṭhutphah chung lam aṭangin, Israel mite thu ka pêk tûr apiang chungchâng thu-ah chuan ka rawn be ṭhîn ang che.

²³“Tin, thingri thingin dawhkân i siam tûr a ni; a dung lam chu tawng hnih ni sela, a vâng lam chu tawng khat ni sela, a sân lam chu tawng khat leh a chanve ni rawh se.

²⁴Tin, chu chu rangkachak hlîr hlak tîin luan tûr a ni a; tin, rangkachakin a tlâng i kâwm tûr a ni.

²⁵Tin, kutphah bawka hlaiin a kâwm i siam tûr a ni a; tin, a kâwm chu rangkachakin a tlâng i kâwm leh tûr a ni.

²⁶Tin, chumi atân chuan rangkachak khâng pali i siam tûr a ni a; tin, chumi khâng chu dawhkân ke pali kil ṭheuhvah chuan vuah tûr a ni.

²⁷Dawhkân chu zâwna, a zâwnfung chu rawlh theih tûrin khângte chu a kâwm sia vuah tûr a ni.

²⁸Tin, dawhkân chu a zâwn theih nân zâwnfungte chu thingri thingin i siam tûr a ni a; tin, rangkachak tîin luan tûr a ni.

²⁹Tin, chumi atân chuan thlêng te, no te, uain thâwl te, a bun chhuahna tûr berhbute i siam tûr a ni. Chûng chu rangkachak hlîr hlakin i siam tûr a ni.

³⁰Tin, dawhkânah chuan ka hmaah chhangdah i hlui fo tûr a ni.

³¹“Tin, khâwnvâr dahna rangkachak hlîr hlakin i siam tûr a ni; chumi khâwnvâr dahna chu a ngul bul leh a ngul chu chher tûr a ni; a note, a parfungte, a pârte nên chuan inzawm vek tûr a ni.

³²Tin, a sîrahte chuan pêng paruk lo pêng chhuak sela: khâwnvâr dahna ngul sîr lehlamah chuan pêng pathum awm sela, khâwnvâr dahna ngul sîr lehlamah chuan pêng pathum awm bawk rawh se.

³³A lehlam pang pêngah chuan vaiumkhal kuhmûm ang no pathum, a pârfung leh a pâr i siam tûr a ni; tin, a lehlam pang pêngah pawh vaiumkhal kuhmûm ang no pathum, pârfung leh a pâr i siam tûr a ni; chutiang chuan khâwnvâr dahna pêng paruk atân i siam tûr a ni.

³⁴Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm tûr a ni.

³⁵Tin, chumi inzawm vek pêng pahnih hnuaiah chuan pârfung awm sela; tin, chumi inzawm vek pêng pahnih hnuaiah chuan pârfung awm sela; tin, chumi inzawm vek pêng pahnih hnuaiah chuan pârfung awm sela; khâwnvâr dahna ngula pêng parukah chuan a awm vek tûr a ni.

³⁶Chûng a pârfungte leh a pêngte chuan a zawm vek tûr a ni a; a pum chuan rangkachak hlîr hlaka chher tûr a ni.

³⁷Tin, chumi atân chuan khâwnvâr pasarih i siam tûr a ni; tichuan, khâwnvârte chu an dah ang a, a hma zâwnte chu a ên theih nân.

³⁸Tin, chumi atâna hman tûr chaichehte leh meivâp dahnate chu rangkachak hlîr hlak a ni tûr a ni.

³⁹Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat i hmang tûr a ni.

⁴⁰Tichuan, tlânga a lem ka entîr ang chiah che khân engkim i siam tûr a ni tih hre reng rawh khai.