Read Mizo_Old_version Exodus 26 Bible Online

Exodus 26 - Mizo_Old_version bible

Exodus 26

¹“Tin, biakbûk, puanzâr sâwm neiin i siam bawk tûr a ni; la zai sîn tak kawp, dumpâwl te, senduk te, senlâr te hmangin cherub lemte thiam taka siam chuantîrin i siam tûr a ni.

²Puanzâr chu a sei lam tawng sawmhnih leh tawng riat ṭheuh a ni ang a, puanzâr chu a hlai lam tawng li ṭheuh a ni ang. Puanzâr zawng zawng chu inchen vek tûr a ni.

³Puanzâr pangate chu inzawm tûr a ni a; tin, puanzâr panga vêkte pawh chu inzawm bawk tûr a ni.

⁴Tin, puanzâr zawm khat hmawrtawng ber tlângah chuan a beng a dumpâwlin i siam tûr a ni a; chutiang bawkin puanzâr zawm lehlam hmawrtawng ber tlângah chuan i siam bawk tûr a ni.

⁵Puanzâr pakhatah chuan beng sawmnga i siam tûr a ni a; tin, zawm khat puanzâr tlângah pawh chuan beng sawmnga i siam bawk tûr a ni a; chûng bengte chu a inep thliah tûr a ni.

⁶Tin, rangkachak chilh behna sawmnga i siam tûr a ni a, a chilh behnate chuan puanzârte chu i chilh bet tûr a ni a; tichuan, biakbûk chu pindan pakhat a lo ni tûr a ni.

⁷“Tin, biakbûk chung khuh nân kêl hmul puanzârte i siam tûr a ni. Puanzâr sâwm leh pakhat i siam tûr a ni.

⁸Puanzâr chu a sei lam tawng sawmthum ṭheuh a ni tûr a ni a; tin, puanzâr chu a hlai lam tawng li ṭheuh a ni tûr a ni: puanzâr te chu inchen vek tûr a ni.

⁹Tin, puanzâr pangate chu i ṭhui zawm vek tûr a ni a; tin, puanzâr paruk pawh chu ṭhui zawm vek tûr a ni a, puan in hma lama puanzâr a parukna chuan a khuh tûr a ni.

¹⁰Tin, puanzâr zawm khat tlângah chuan beng sawmnga i siam tûr a ni a; tin, puanzâr zawm lehlam tlângah pawh chuan beng sawmnga siam bawk tûr a ni a.

¹¹Tin, dâr chilh behna sawmnga i siam tûr a ni a; tin, chumi chilh behna chu puan tlânga a bengah chuan vuah tûr a ni a, puan in chu chilh zawm vek tûr a ni; pindan pakhat a lo nih theih nân.

¹²Puan in puanzâr uai thla la chuang, a zatve la chuang chu biakbûk kawmchârah a uai thla tûr a ni.

¹³Tin, puan in puanzâr a dung lam hmâwr tuak ve vea tawng khat ve ve la chuanga chu biakbûk bang lehlam lehlam khuh nân a uai thla tûr a ni.

¹⁴Tin, berâmpa vun chhum senin puan in chung khuhnate, savun ṭha chiin a chunga khuh lehnate i siam tûr a ni.

¹⁵“Tin, biakbûk ban rem khâwm tûrte chu ngîl taka dingin thingri thingin i siam tûr a ni.

¹⁶Tin, ban rem khâwm sei lam chu tawng sâwm ni sela; tin, a vâng lam chu tawng khat leh a chanve ni ṭheuh rawh se.

¹⁷Ban rem khâwm tinah chuan ke pahnih inzawmin a awm tûr a ni. Chutiang chuan biakbuk ban rem khâwm chhim chhawng chhim lampang atân chuan, ban rem khâwm sawmhnih i siam tûr a ni.

¹⁸Tin, biakbûk atân ban rem khâwm chhim chhawng chhim lampang atân chuan, ban rem khâwm sawmhnih i siam tûr a ni.

¹⁹Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli i siam tûr a ni: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih i siam tûr a ni.

²⁰Tin, biakbuk sîr lehlam hmâr chhawng lam atân chuan ban rem khâwm sawmhnih i siam tûr a ni;

²¹chûng atân chuan tangkaraw tlang sawmli ker kuak nên, ban rem khâwm pakhat atân nghahchhan ker kuak pahnih leh, ban rem khâwm dang pakhat atân nghahchhan ker kuak pahnih i siam bawk tûr a ni.

²²Tin, biakbûk kawmchâr khawthlang chhawng lam atân chuan ban rem khâwm paruk i siam tûr a ni.

²³Tin, biakbûk kawmchâr kil ve ve atân chuan ban rem khâwm pahnih i siam tûr a ni.

²⁴Tin, a hnuai lamah chuan thlawp tûr a ni a, chutiang bawkin a chhîp lam khâng hmasa ber thlengin tih vek tûr a ni. Chutiang chuan a pahnih chuan tih ve ve tûr a ni. Chûng chu a kil pahnih atân a ni tûr a ni.

²⁵Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm tûr a ni; ban rem khâwm pakhat atân nghahchhan ker kuak pahnih; tin, ban rem khâwm dang atân pawh chuan nghahchhan ker kuak pahnih zêl.

²⁶“Tin, thingri thingin bangrel, biakbûk bang lehlam ban rem khâwm atân panga, biakbûk bang lehlam ban rem khâwm atân panga;

²⁷tin, biakbûk kawmchâr khawthlang chhawng lam ban rem khâwm atân pawh panga i siam tûr a ni.

²⁸Tin, bangrel laita, ban rem khâwm lai taka mi chuan ban rem khâwm hmâwrtawng ber aṭangin a lehlam hmâwrtawng ber thlengin a thil tlang tûr a ni.

²⁹Tin, ban rem khâwmte chu rangkachak tîin i luan tûr a ni a, bangrelte thil nân rangkachak khângte i siam tûr a ni; tin, chûng bangrelte chu rangkachak tîin i luan bawk tûr a ni.

³⁰Chutichuan, tlânga ka entîr dân ang chiah che khân biakbûk chu i sa tûr a ni.

³¹“Tin, puanzâr tûr lazai sîn tak kawp te, a dumpâwl te, a senduk te, a senlârte hmangin cherub lemte mi thiam tak siam chuantîrin i siam tûr a ni.

³²Chu chu thingri ban pali rangkachak tîa luanah chuan i zâr tûr a ni, a bânna chu rangkachaka siam tûr a ni; tin, tangkaraw tlang ker kuak palia inphun tûr a ni.

³³Tin, chumi puanzâr chu puanzâr chilh behnate hnuai lamah chuan i zâr tûr a ni a, chumi puanzâr chhûng lamah chuan thuthlunna bâwm chu i dah lût tûr a ni; tichuan, puanzâr chuan hmun thianghlim leh hmun thianghlim ber chu a daidansak dâwn che u nia.

³⁴Tin, zahngaihna ṭhutphah chu hmun thianghlim berah thuthlunna bâwm chungah chuan i dah tûr a ni.

³⁵Tin, puanzâr pâwn lamah chuan dawhkân i hûng tûr a ni a; tin, biakbûk chhim chhawng lam dawhkân epah chuan khâwnvâr dahna i hûng tûr a ni; tichuan, dawhkân chu hmâr lampangah chuan i dah tûr a ni.

³⁶“Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam taka zeh nên i siam tûr a ni.

³⁷Tin, puanzâr zârna tûr chuan thingri ban panga i siam tûr a ni a, chûng chu rangkachak tîin i luan tûr a ni; a bânnate chu rangkachaka siam tûr a ni: chûng hûnna atân chuan dâr tlang ker kuak panga i chhûng tûr a ni.