Read Mizo_Old_version Exodus 27 Bible Online

Exodus 27 - Mizo_Old_version bible

Exodus 27

¹“Tin, thingri thing maichâm, a dung lam tawng nga, a vâng lam tawng ngain i siam tûr a ni; chu maichâm chu kil li a ni tûr a ni a, a sân lam chu tawng thum a ni tûr a ni.

²Tin, a kil li chhîpahte chuan a kîte i siam tûr a ni a; maichâm nên chûng a kîte chu a inzawm vek tûr a ni. Dâr tîin i luan vek tûr a ni.

³Tin, meivâp ruh chhuahna bêlte, vut lawhnate, maihûnte, sa thurna thîrkawmte, mei lâknate i siam tûr a ni; chûng hmanrua zawng zawng chu dârin i siam tûr a ni.

⁴Tin, maichâm atân chuan dâr lên i siam tûr a ni; tin, chumi lên chung, a kil liahte chuan dâr khâng pali i siam tûr a ni.

⁵Tin, chu chu maichâm dawhzâwl hnuai lam vêl chuan i dah tûr a ni, chu lên chuan maichâm chanve chu a han thlen theih nân.

⁶Tin, maichâm atân zâwnfung, thingri thing zâwnfungte i siam tûr a ni a, chûng chu dâr tîin i luan tûr a ni.

⁷Tin, chûng zâwnfungte chu chung khângahte chuan thun luh tûr a ni a; tichuan, zâwnfungte chu a zâwnna tûrin maichâm sîr pahnihah chuan a awm ve ve tûr a ni.

⁸Maichâm chu thingphela hungin a kawrawngin i siam tûr a ni; tlânga ka entîr ang chiah che khân siam tûr a ni.

⁹“Tin, biakbûk hung chhûng kawtlai i siam tûr a ni. Chhim chhawng chhim lampangah chuan a sîr lehlam atân a hung chhûng kawtlaia puanzâr tûrte, lazai sîn tak kawpa siam tawng zaa sei a awm tûr a ni.

¹⁰Chumi atân chuan ban sawmhnih leh dâr tlang ker kuak sawmhnih a awm tûr a ni. Bana a bânnate leh a zârfungte chu tangkarua a ni tûr a ni.

¹¹Tin, chutiang bawkin, hmâr chhawng lampang dung lam puanzâr zâr tûrte chu tawng zaa sei a ni tûr a ni a, chumi atân chuan ban sawmhnih leh dâr tlang ker kuak sawmhnih a awm tûr a ni; bana a bânnate leh a zârfungte chu tangkarua a ni tûr a ni.

¹²Tin, a khawthlang lampang hung chhûng kawtlai vâng lam puanzâr tûrte chu tawng sawmngaa sei a ni tûr a ni, a ban sâwm leh a nghahchhan ker kuak sâwm nên.

¹³Tin, khawchhak lam chhawng, chhak lampang a hung chhûng kawtlai vâng lam chu tawng sawmngaa sei a ni tûr a ni.

¹⁴Kawngka sîr lehlama puanzâr zâr tûrte chu tawng sâwm leh tawng ngaa sei a ni tûr a ni: a ban pathum leh a nghahchhan kerkuak pathum a awm tûr a ni.

¹⁵Tin, kawngka sîr lehlama puanzâr zâr tûrte chu tawng sâwm leh tawng ngaa sei a ni tûr a ni a, a ban pathum leh a nghahchhan ker kuak pathum a awm tûr a ni.

¹⁶Tin, a hung chhûng kawtlai kawngkaa zâr tûr tawng sawmhniha sei, lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a awm tûr a ni. A ban pali leh a nghahchhan ker kuak pali a awm tûr a ni.

¹⁷A hung chhûng kawtlai ban zawng zawngte chu tangkaruaa zem chhuah vek tûr a ni a; a bânnate chu tangkarua a ni tûr a ni a, nghahchhan ker kuakte chu dâr a ni tûr a ni.

¹⁸A hung chhûng kawtlai dung lam chu tawng za ni sela, a vâng lam chu tawng sawmnga ni sela; tin, a sân lam chu tawng nga ni sela, lazai sîn tak kawpa hung ni sela; tin, a nghahchhan ker kuakte chu dâr tlang ni rawh se.

¹⁹Biakbûk sakna zawng zawnga a hmanrua zawng zawng leh, a kilhbehna zawng zawng leh, a hung chhûng kawtlai kilhbehna zawng zawng chu dâr vek a ni tûr a ni.

²⁰“Tin, khâwnvâr chu eng lai pawha a alh theih nân olive hriak fîm taka sâwr, chhit atân i hnênah rawn la ṭhîn tûrin Israela thlahte chu thu i pe tûr a ni.

²¹Inbiakna puan in chhûngah, thuhriattîr dahna bula puanzâr pâwn lamah chuan, Arona leh a fapaten LALPA hmaah chuan tlai aṭangin a tûk thlengin an buatsaih ṭhîn tûr a ni. Hei hi Israela thlahte tân kumkhuain, an thlahte thleng pawhin thuruat ngheh tlat a ni tûr a ni.