Read Mizo_Old_version Exodus 28 Bible Online

Exodus 28 - Mizo_Old_version bible

Exodus 28

¹“Tin, nangin i u Arona leh a fapate chu Israela thlahte zîng ata i hnênah hruai ang che, ani chuan puithiam rawngbâwl hna chu ka tân a thawh theih nân, Arona te, Arona fapa - Nadaba te, Abihua te, Eleazera te, Ithamara te nên chuan.

²Tin, i u Arona tân silhfên thianghlim, tiropuitu atân leh timawitu atân i siam tûr a ni.

³Tin, mi themthiamho, finna thlarauva ka tihkhah zawng zawngte chu bia la, puithiam rawngbâwl hna ka tân a thawh theihna tûrin Arona chu silhfênte siamsak rawh se.

⁴Tin, hêngte hi a ni silhfên atâna an siam tûrte chu: âwmbel te, kawr te, kawrfual te, kawr zeh mawi te, lukhum leh kâwnghrênte nên. Tin, i u Arona leh a fapate chuan puithiam rawngbâwl hna ka tân an thawh theih nân, silhfên thianghlim an siamsak tûr a ni.

⁵Tin, rangkachak te, la dumpâwl te, senduk te, senlâr te, lazai sîn tak kawpte nên an la tûr a ni.

⁶“Tin, puithiam kawr chu rangkachak te, la dumpâwl te, senduk te, senlâr te, lazai sîn tak kawpte hmangin, mi themthiam takin a buatsaih angin an siam tûr a ni.

⁷Tin, chumi kawr hmâwr hma lam leh hnung lama ṭhui belhbawm, dârbak pahnih neihtîr tûr a ni; a inzawm tlat theihna tûrin.

⁸Tin, kawr chunga kâwnghrên tûr themthiam taka tah, chumi kawr chi bawk tluan khat vek hman tûr a ni; chu chu rangkachak nên, la dumpâwl nên, senduk nên, senlâr nên, lazai sîn tak kawp nêna tah tûr a ni.

⁹Tin, onukion lung pahnih i la tûr a ni a, chutah chuan Israela thlahte hming i chuantîr tûr a ni:

¹⁰lung pakhatah chuan an hming paruk, lung dang pakhatah chuan a la awmate paruk; hming chu an pian dân indawtin i chuantîr tûr a ni.

¹¹Hming nemnaa chuang ang, lunga ziak thiam miin a ziak ṭhin ang hian, Israela thlahte hming ang zêlin lung pahnihah chuan i ziak tûr a ni. Rangkachaka phûm tûrin i siam tûr a ni.

¹²Tin, chumi lung pahnih chu Israela thlahte hriat rengna lung atân, puithiam kawr dârbakah chuan i bel tûr a ni. Tichuan, Arona chuan hriat rengna tûrin, LALPA hmaah an hmingte chu a koki khing hnihah chuan a bât ang.

¹³“Tin, rangkachak zaite i phiar tûr a ni a,

¹⁴rangkachak hlîr hlak khaidiat pahnih nên, hruihrual anga herhin i siam tûr a ni; tin, chumi khaidiat herhte chu phiarah chuan i zawm tûr a ni.

¹⁵“Tin, rorêlna âwmbel, mi thiam tak siam ang i siam tûr a ni. Puithiam kawr siam ang khân i siam tûr a ni a: rangkachak te, la dumpâwl te, a senduk te, a senlâr te, lazai sîn tak kawpte hmangin i siam tûr a ni.

¹⁶Kil li neia siama thuah tûr a ni: a dung lam khâp khat, a vâng lam pawh khâp khat bawk a ni tûr a ni.

¹⁷Tin, chutah chuan lunghlu, lunghlu tlar li i zep tûr a ni: tlar khatna chu sardion te, topazion te, smaragdos te;

¹⁸tin, tlar hnihna chu anthrax te, sappheiros te, sordonuks te;

¹⁹tin, tlar thumna chu huakinthos te, akates te, amethustos te;

²⁰tin, tlar lina chu berullos te, onukion te, jaspis te a ni tûr a ni. Rangkachakah chuan phûm ṭhêt tûr a ni.

²¹Tin, lungte chu Israela thlahte hming ang zêlin, sâwm leh pahnih chu an hming ang zêlin a ni tûr a ni; hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni tûr a ni.

²²Tin, âwmbel chungah chuan hruihrual ang khaidiatte, rangkachak hlîr hlak herh i siam tûr a ni a.

²³Tin, âwmbel chungah chuan rangkachak khâng pahnih i siam tûr a ni a; tin, chumi khâng pahnih chu âwmbel tlâng hmâwr ve veah chuan i vuah tûr a ni.

²⁴Tin, rangkachak khaidiat herh pahnih chu, âwmbel tlâng hmâwr ve vea khâng pahnihah chuan i thlung tûr a ni.

²⁵Tin, khaidiat herh hmâwr lehlam pahnihte chu rangkachak zai phiar pahnihah chuan i zawm tûr a ni a, chu chu puithiam kawr hma lama dârbakah chuan i thlung tûr a ni.

²⁶Tin, rangkachak khâng pahnih i siam tûr a ni a, chûng chu âwmbel kil pahnih, puithiam kawr dep chhûng lampangah chuan i vuah tûr a ni.

²⁷Tin, rangkachak khâng pahnih i siam tûr a ni a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan i vuah tûr a ni.

²⁸Tin, puithiam kawra khângahte chuan âwmbela khângte chu hrui dumpâwlin an chilh zawm tûr a ni, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân.

²⁹“Tin, Arona chuan hmun thianghlima a kal hunah LALPA hmaah a hriat reng theihna tûrin, a thinlung zâwn taka rorêlna âwmbelah chuan Israela thlahte hming chu a pu zêl tûr a ni.

³⁰Tin, rorêlna âwmbelah chuan Urim leh Thumim i dah tûr a ni a; chu chu Arona chuan LALPA hmaa a kal hunah chuan a thinlung zâwnah chuan a dah zêl tûr a ni. Tin, Arona chuan Israela thlahte rorêlna chu LALPA hmaa a kal hunah a thinlung zâwnah chuan a pu zêl tûr a ni.

³¹“Tin, puithiam kawrfual, a dumpâwl hlîr hlak i siam tûr a ni.

³²Tin, a lai takah lu thawn nân tihâwng tûr a ni a; chumi âwng chu a thlêr chhiat theih mai lohna tûrin, kawrbân bûl angin a tlâng vêl chu cheh tûr a ni.

³³Tin, a fêmahte chuan pawmgranet lem - a dumpâwl te, a senduk te, a senlâr tein - a fêm vêlin i siam tûr a ni a; tin, chumi inkârahte chuan rangkachak tengeng a vêlin i siam tûr a ni.

³⁴Kawrfual fêm vêlahte chuan rangkachak tengeng pakhat leh pawmgranet pakhat zêl i siam tûr a ni.

³⁵Tin, Arona chu rawng a bâwl laiin chutiang chuan a inthuam tûr a ni; tichuan, hmun thianghlima LALPA hmaa a luh leh a chhuah hunah a ri chu hriat theih a ni tûr a ni; chutichuan, a thi lo vang.

³⁶“Tin, rangkachak hlîr hlak phêk i siam tûr a ni a, a pangah chuan hming nemnaa chuang ang, ‘LALPA PUAL’ tih i chuantîr tûr a ni.

³⁷Chu chu hrui dumpâwlah chuan i bel tûr a ni a, puithiam lukhumah chuan bel tûr a ni; puithiam lukhum hma lamah a awm tûr a ni.

³⁸Chu chu Arona chalah a awm tûr a ni a, Israela thlahten an thilpêk thianghlim atâna an hlan tûr thil serha sualna awmte chu Arona chuan a phur zêl tûr a ni; chu chu LALPA hmaa chhân tlâka a awm theih nân a chalah a awm chawt tûr a ni.

³⁹Tin, kawr chu puan zai sîn tak, zeh mawiin i tah tûr a ni; tin, puan zai sîn takin puithiam lukhum i siam tûr a ni.

⁴⁰Tin, Arona fapate chu kawr i siamsak tûr a ni a; tin, kawnghrênte, diarte i siamsak bawk tûr a ni, tiropuitu leh timawitu atân.

⁴¹Chûng chuan i u Arona leh a fapate chu i thuam tûr a ni; tin, ka tân puithiam hna thawka rawng an bâwl theihna tûrin, anmahni chu hriak thihin, tihrangin, i tithianghlim tûr a ni.

⁴²Tin, an taksa saruak khuh nan puan zai sîn kekawr i siamsak tûr a ni; kâwng aṭanga malpui thleng ni sela.

⁴³Chu chu Arona leh a fapaten inbiakna puan ina an luh hun leh, hmun thianghlima rawngbâwl tûra maichâm bula an kal hunin an ha zêl tûr a ni; chuti lo chuan, suala ngaihin an thi dah ang e. Chu chu amah leh a hnua a thlahte thleng pawha kumkhuaa thuruat ngheh a ni ang.