Read Mizo_Old_version Exodus 29 Bible Online

Exodus 29 - Mizo_Old_version bible

Exodus 29

¹“Tin, puithiam hna thawka ka rawng an bâwl theihna tûra anmahni tihthianghlim nân, an chungah hetiang hian i ti tûr a ni: bâwngpatuai pakhat leh berâmpa sawisêl bo pahnih nên,

²chhang dawidim telh loh nên, chhangpêr dawidim telh loh hriaka chawhpawlh nên, chhangpêr pan dawidim telh loh hriaka chulh nên i rawn la tûr a ni; chhangphut dip tak chiin i siam tûr a ni.

³Chûng chu fawng pakhata dahin, fawng chawpin bâwngpa leh berâmpa pahnih nên chuan i rawn keng tûr a ni.

⁴Tin, Arona leh a fapate chu inbiakna puan in kawngka bulah chuan rawn hruaiin, tuiin i lo sil tûr a ni.

⁵Tin, silhfênte chu rawn lain, Arona chu kawr nên, puithiam kawrfual nên, puithiam kawr nên, âwmbel nên hâktîrin, puithiam kawr hrênna themthiam taka tah chuan i hrêng tûr a ni.

⁶Tin, puithiam lukhum chu khumtîrin, lukhum chungah chuan lukhum thianghlim chu i khumtîr tûr a ni.

⁷Tichuan, hriak thih mi rawn lain, a lûah leihin i thih tûr a ni.

⁸“Tin, a fapate chu rawn hruaiin kawr i hâktîr tûr a ni.

⁹Tin, Arona leh a fapate chu kâwnghrêna hrêngin, diar i khimtîr tûr a ni. Puithiam nihna chu kumkhua atâna ruat ngheh tlatin an chang tawh ang. Chutiang chuan Arona leh a fapate chu i tithianghlim tûr a ni.

¹⁰Tin, inbiakna puan in bulah bâwngpa i rawn la tûr a ni: Arona leh a fapate chuan bâwngpa lu chungah chuan an kut lo nghat rawh se.

¹¹Tichuan, inbiakna puan in kawngka bulah, LALPA hmaah chuan bâwngpa chu i lo talh tûr a ni.

¹²Tin, bâwngpa thisen chu lo lain, maichâm kîte chu i kutzungṭangin i hnawih tûr a ni; tin, maichâm bulah chuan thisen chu i leihbaw vek tûr a ni.

¹³Tin, a kawchhûng thau zawng zawng nên, a thin tuamtu râng nên lain maichâmah chuan i hâl tûr a ni.

¹⁴Bâwngpasa leh a vun leh a êk erawh chu daipâwn lamah i hâl tûr a ni; chu chu sual tâna hlan a ni.

¹⁵Berâmpa pakhat i rawn la bawk tûr a ni; tin, Arona leh a fapaten chu berâmpa lu chungah chuan an kut lo nghat rawh se.

¹⁶Tin, berâmpa chu lo talhin, a thisen chu lain, maichâm chung chu a vêlin i theh tûr a ni.

¹⁷Tin, berâmpa chu i chan tûr a ni a; tin, a kawchhûng leh a kete chu silin, a sahrangte nên, a lû nên i dah tûr a ni.

¹⁸Tin, berâmpa chu a pumin maichâmah chuan i hâl tûr a ni. Chu chu LALPA tâna hâlral thilhlan a ni a; LALPA tâna meia hlan rimtui chu a ni e.

¹⁹“Tin, berâmpa pakhat i rawn kai leh tûr a ni; Arona leh a fapaten chu berâmpa lu chungah chuan an kut lo nghat rawh se.

²⁰Tichuan, berâmpa chu lo talhin, a thisen chu lain, Arona beng ding lam tlângah te, a fapate beng ding lam tlângah te, an kut ding lam zungpuiah te, an ke ding lam zungpuiah te i tât tûr a ni a; tin, maichâm chung vêlah chuan thisen chu i theh tûr a ni.

²¹Tin, maichâm chunga thisen leh, hriak thih mi chu rawn lain, Arona leh a silhfênahte leh, a hnêna tel ve a fapate leh a fapate silhfênahte chuan i theh tûr a ni; tichuan, amah leh a silhfênte leh, a hnêna tel ve a fapate leh a fapate silhfênte chu tihthianghlim an lo ni tawh ang.

²²“Berâmpa thau nên, a mei thau tak nên, a kawchhûng thau nên, a thin tuamtu râng nên, a kal pahnih leh a bawhtu thau nên, a bawp ding lam nên i la bawk tûr a ni; chu chu tihhranna berâmpa chu a ni si a;

²³tin, fawnga chhang dawidim telh loh LALPA tâna chhiah mi chu chhangpêr pakhat nên, chhangpêr hriaka chawhpawlh pakhat nên, chhangpêr pan pakhat nên i telh tûr a ni;

²⁴tin, chûng chu Arona kut leh a fapate kutah chuan i dah vek tûr a ni a, LALPA hmaa thên thilhlan atân i thên tûr a ni.

²⁵Tin, an kut ata chu lâksakin, LALPA tâna rimtui atân maichâmah hâlral thilhlan chungah chuan i hâl tûr a ni. Chu chu LALPA tâna meia thilhlan a ni.

²⁶Tin, Arona tihhranna berâmpa irâwm chu lain, LALPA hmaa thên thilhlan atân i thên tûr a ni; chu chu i chanvo tûr ni rawh se.

²⁷Tin, Arona leh a fapate puala tihhranna berâmpa irâwm, thên thilhlan leh chawikân thilhlan, a bawp thên tawh leh chawikân tawh chu i tithianghlim tûr a ni.

²⁸Chu chu Israela thlahte laka kumkhuaa Arona leh a fapate chanvo tûra ruat a ni ang. Chu chu chawikân thilhlan a ni si a; remna thilhlana an inthawinate zînga Israela thlahten an chawikân thilhlan tûr chu a ni ang, LALPA tâna an chawikân thilhlan ngei chu.

²⁹“Tin, Arona silhfên tihthianghlimte chu a hnuah a fapaten an la rochung zêl ang, chûngte chuan an inthuama, hriak thih leh tihthianghlim an nih theih nân.

³⁰A fapa, a aiawha puithiam hna thawk tûra ruata chu, hmun thianghlima rawngbâwl tûra inbiakna puan ina a luh hunah, ni sarih chhûng chu inthuamin a awm tûr a ni.

³¹Tin, tihhranna berâmpa chu rawn lain, a sa chu hmun thianghlimah i chhûm tûr a ni.

³²Tichuan, Arona leh a fapate chuan berâmpasa leh fawnga chhangpêrte chu inbiakna puan in kawngka bulah ei rawh se.

³³Tin, chûng inremna thil, anmahni tihhran nân leh tihthianghlim nâna hlante chu an ei tûr a ni; amaherawhchu, thil thianghlim a nih avângin mi dang zawngin an ei ve tûr a ni lo.

³⁴Tin, chumi tihhranna sa emaw, chhang emaw chu a tûk thlenga a bâng a la awm chuan, a bâng chu meiin i hâl ral tûr a ni. Chu chu thil thianghlim a nih avângin ei tûr a ni lo ve.

³⁵Tichuan, thu ka pêk zawng zawng che ang hian Arona leh a fapate chungah chuan i ti tûr a ni. Ni sarih anmahni i tihrang tûr a ni.

³⁶Tin, ni tin sual hlan inthawina sebâwngpa, inremna tûrin i hlân tûr a ni. Tichuan, inremna i siam hunin maichâm chu i tifai dâwn nia; tin, a tithianghlim tûrin hriak i hnawih tûr a ni.

³⁷Maichâm atân inremna ni sarih siamin i tithianghlim tûr a ni a; tichuan, maichâm chu thil thianghlim tak a lo ni ang. Maichâm dek apiang chu a lo thianghlim zêl ang.

³⁸“Chutichuan, maichâm chunga i hlan tûr chu hei hi a ni: ni tin kum khat tling berâmno pahnih zêl.

³⁹Berâmno pakhat chu zîng lamah i hlân tûr a ni a, berâmno pakhat chu tlai lamah i hlân tûr a ni.

⁴⁰Bêramno pakhat hlannaah chuan chhangphut dip tak, epha hmun sâwma ṭhena hmun khat, hriak sâwr hin hmun lia ṭhena hmun khat nêna chawhpawlh i telh tûr a ni a; in tûr thilhlan atân uain hin hmun lia ṭhena hmun khat nên.

⁴¹Tin, berâmno pakhat chu tlai lamah i hlân tûr a ni a, chu chu zîng lama ei tûr thilhlan dân ang leh in tûr thilhlan dân angin rimtui, LALPA tâna meia thilhlan atân i hlân tûr a ni.

⁴²Chu chu in thlahte thlenga inbiakna puan in kawngka bula LALPA hmaa hâlral thilhlan fo tûr a ni ang a, chutah chuan a be tûr chein ka lo kal ṭhîn ang.

⁴³Israela thlahte pawh chutah chuan ka rawn be ṭhîn ang a; tichuan, Puan in chu ka ropuinaa tihthianghlim a ni ang.

⁴⁴Tin, inbiakna puan in leh maichâm chu ka tithianghlim ang. Arona pawh a fapate nên ka tâna puithiam hna thawka ka rawng an bâwl theihna tûrin ka tithianghlim bawk ang.

⁴⁵Tichuan, Israela thlahte zîngah chuan ka chêng ang a, an Pathian ka ni ang.

⁴⁶Chutichuan, anmahniho zînga ka chên theihna tûra Aigupta ram ata hruai chhuaktu LALPA an Pathian chu ka ni tih an hria ang. Kei hi LALPA an Pathian ka nih hi.