Read Mizo_Old_version Exodus 30 Bible Online

Exodus 30 - Mizo_Old_version bible

Exodus 30

¹“Tin, rimtui hâlna tûr maichâm i siam tûr a ni; thingri thingin i siam tûr a ni.

²A dung lam tawng khat, a vâng lam tawng khat a ni tûr a ni a, kil li neia siam tûr a ni; tin, a sân lam chu tawng hnih ni sela. A kîte chu maichâm nên chuan inzawm vek tûr a ni.

³Tin, a chung te, a pang vêl te leh a kîte chu rangkachak hlîr hlak tîin i luan tûr a ni; tin, a kotlâng vêlah chuan rangkachak i dah tûr a ni.

⁴Tin, a kotlâng hnuai lamah, a sîr tuakah chuan rangkachak khâng pahnih i siam tûr a ni. A sîr pahnihah chuan i siam tûr a ni a, chûng chu a zâwnfung rawlhna tûr a ni ang.

⁵Tin, thingri thinga zâwnfungte siamin rangkachak tîin i luan tûr a ni.

⁶Tin, chu chu thuhriattîrna chunga ka rawn biak ṭhinna tûr che zahngaihna ṭhutphah hmaah, thuhriattîrna bâwm kianga puanzâr bulah i dah tûr a ni.

⁷Tin, Aronan chutah chuan englo rimtui tak hâl tûr rimtui a hâl tûr a ni a; tûk tin khâwnvârte a tihfai hun apiangin a hâl ṭhîn tûr a ni.

⁸Tin, Aronan tlai lamah khâwnvârte a chhit hun chuan rimtui chu a hâl ṭhîn tûr a ni; chu chu in thlahte thlenga LALPA hmaa rimtui a ni reng ang.

⁹Chutah chuan rimtui dang emaw, hâlral thilhlan emaw, ei tûr thilhlan emaw in hlân tûr a ni lo va; tin, chutah chuan in tûr thilhlan pawh in leih tûr a ni lo.

¹⁰Tin, Aronan kum khatah vawi khat ki chungahte chuan inremna a siam tûr a ni; inremna tûra sual thawina thisen chuan kum tin vawi khat in thlahte thlengin inremna chu a siam ṭhîn tûr a ni. Chu chu LALPA tân thianghlim tak a ni,” tiin.

¹¹Tin, LALPAN Mosia hnênah, “Israela thlahte awm zât i chhiar hun chuan, a awm zât i chhiar ang zêlin mi tinin an nunna tlanna chu LALPA an pe zêl tûr a ni, anmahni i chhiar huna an zînga hri a lên loh nân.

¹³Hei hi an pêk tûr chu a ni: chhiar tawhte zînga tel tûra kal apiangte chuan, hmun thianghlima sekel an pêk ṭhin ang sekel chanve an pe tûr a ni (sekel chu gera sawmhnih a ni). LALPA puala thilhlan atân sekel chanve.

¹⁴Chhiar tawhte zînga tel tûra kal apiang, kum sawmhnih achin chung lam zawng chuan LALPA puala thilhlan chu an pe tûr a ni.

¹⁵In nunna tlanna tûra LALPA puala thil in hlan chuan sekel chanve aia tam chu mi hausain a pe tûr a ni lo va, mi rethei pawhin chumi aia tlêm chu a pe tûr a ni lo.

¹⁶Tin, Israela thlahte tlanna man tangka chu lo lain, inbiakna puan ina rawngbâwl nân i lo ruat tûr a ni; in nunna tlan nâna LALPA hmaa Israela thlahte tâna i hriat rengna a lo nih theihna tûrin,” tiin a sawi a.

¹⁷Tin, LALPAN Mosia hnênah, “Insilna tûr dâr maihûn, a hûnchhan dâr nên i siam bawk tûr a ni. Chu chu inbiakna puan in leh maichâm inkârah i hûng tûr a ni a, chutah chuan tui i dah tûr a ni.

¹⁹Tin, Arona leh a fapaten chutah chuan an kete an sil ṭhîn tûr a ni.

²⁰Inbiakna puan in chhûnga an luh hunin emaw, LALPA tâna meia thilhlan hâl tûra maichâm bula rawngbâwl tûra an lo kal hunin emaw, tui chuan an insil tûr a ni; chuti lo chuan, an thi mai ang.

²¹Chutichuan, an thih loh nân an kut leh an kete chu an sil ṭhîn tûr a ni. Chu chu an tân kumkhua atâna thuruat a ni ang - amah leh a thlahte leh an thlahte thleng tân pawh,” tiin a sawi a.

²² LALPA vêkin Mosia hnênah, “Rimtui tui ber chi zînga mi - murra tui sekel zanga leh, thakthîng rimtui, chumi zâtve sekel zahnih leh sawmnga zet - leh fu rimtui sekel zahnih leh sawmnga leh,

²⁴thakthîng chi dang sekel zanga, hmun thianghlima sekel an pêk ṭhin ang, olive hriak hin khat nên rawn lain,

²⁵rimtui siamtu siam angin hriak thih chu hriak thianghlim atân i siam tûr a ni. Chu chu hriak thih chi hriak thianghlim a ni ang.

²⁶Tin, inbiakna puan in te, thuhriattîrna bâwm te,

²⁷dawhkân leh a bungbêl zawng zawngte, khâwnvâr dahna leh a hmanruate, rimtui hâlna maichâm te,

²⁸hâlral thilhlan maichâm leh a hmanrua zawng zawngte, maihûn leh a hûnchhante nên, chu chuan i hnawih vek tûr a ni.

²⁹Tin, thianghlim tak an lo nih theih nân i tithianghlim tûr a ni; chûng dek apiangte chu an lo thianghlim zêl ang.

³⁰Tin, ka tân puithiam hna thawka ka rawng an bâwl theih nân Arona leh a fapate chu hriak thihin i tithianghlim tûr a ni.

³¹Tin, Israela thlahte hnênah, ‘He hriak hi in thlahte thlenga ka hriak thianghlim thih mi chu a ni ang.

³²Mihring taksaah chuan leih tûr a ni lo va; hemi siam dân anga siam, a ang tak hian in siam tûr a ni hek lo. Hei hi zawng a thianghlim a; tichuan, in tân thianghlim a ni tûr a ni.

³³Tu pawhin a anpui siam sela emaw, mi dang tân tu pawhin lo hmang sela emaw, chu mi chu a chipuite zîng ata tihboral a ni ang,’ tiin sawi ang che,” tiin a sawi leh a.

³⁴Tin, LALPAN Mosia hnênah, “Rimtui tui tak - stakte te, onuka te, galbanum te - la ang che, rimtui tui tak beraw fîm tak nên; bûk inzât vekin.

³⁵Chu chu rimtui siamtu siam angin chia al, fîm leh thianghlim takin rimtui i siam tûr a ni.

³⁶A ṭhente chu râwt dip dep tûr a ni a, ka rawn biak ṭhinna tûr che inbiakna puan in chhûnga thuhriattîrna bulah chuan i dah tûr a ni. Chu chu in tân thil thianghlim tak a ni ang.

³⁷Tin, chumi rimtui i siam tûr, a siam dân tûr anga siam chu zawng nangmahni tân in siam tûr a ni lo ve, LALPA tâna thil thianghlimah i ngai tûr a ni.

³⁸Tu pawhin hnim atân ngawta chutiang a siam chuan chu mi chu a chipuite zîng ata tihboral a ni ang,” a ti a.