Read Mizo_Old_version Exodus 31 Bible Online

Exodus 31 - Mizo_Old_version bible

Exodus 31

¹Tin, LALPAN Mosia hnênah, “Ngai teh, Juda hnama mi Hura fapa Uria, chu mi fapa Bezalela chu ka thlang tawh a.

³Tin, ani chu finna te, hriat thiamna te, hriatna te, kawng tinrênga themthiamna te, thiltih tûr fing taka suangtuah thiamna te, zeh tûra lunghlute phel thiamna te, thing zai mawi dân thiamna te, kawng tinrênga themthiamna te nei tûrin Pathian Thlarauvin ka tikhat tawh e.

⁶Tin, ngai teh, a hnêna thawk ve tûrin Dan hnama mi Ahisamaka fapa Oholiaba chu keimahin ka ruat leh e; thil siam tûra thu ka pêk zawng zawng che:

⁷inbiakna puan in te, thuhriattîrna bâwm te, chumi chunga zahngaihna ṭhutphah te, puan in chhûnga bungrua zawng zawng te;

⁸tin, dawhkân leh a hmanrua te, rangkachak hlîr hlaka siam khâwnvâr dahna, a hmanrua zawng zawngte nên, rimtui hâlna maichâm te;

⁹tin, hâlrala thilhlanna maichâm, a bungbêl zawng zawngte nên, maihûn leh a hûnchhan te;

¹⁰tin, silhfên mawi tak taka tah te, puithiam rawng an bâwl huna hâk tûr puithiam Arona silhfên thianghlim leh a fapate silhfên te;

¹¹tin, hriak thih mi te, hmun thianghlim atâna rimtui tui takte hi an siam theihna tûrin mi themthiamho zawng zawngte finna ka pe e. Tih tûra thu ka pêk zawng zawng che ang kha an ti tûr a ni,” tiin a sawi a.

¹²Tin, LALPAN Mosia hnênah, “Israela thlahte hnênah chuan, ‘Ka Chawlhnite hi in serh ngei ngei tûr a ni, in thlahte thlenga keimah leh nangmahni inkâra chhinchhiahna a ni si a; kei hi LALPA, nangmahni tithianghlimtu che u ka ni tih in hriat theih nân.

¹⁴Chuvângin, Chawlhni hi in serh tûr a ni, chu chu in tân ni thianghlim a ni si a. Tu pawh tibawlhhlawh apiang chu tihhlum ngei ngei tûr a ni; tu pawh chumi nia hna eng pawh thawk chu, chu mi chu a chipuite zîng ata tihboral tûr a ni.

¹⁵Ni ruk chhûng hna thawh nân hman tûr a ni a; a ni sarih ni erawh chu chawlh dêrna Chawlhni, LALPA tâna ni thianghlim a ni. Tu pawh Chawlhnia hna thawk apiang chu tihhlum ngei ngei tûr a ni.

¹⁶Chutichuan, Israela thlahte hian Chawlhni chu an thlahte thlenga kumkhuaa thuthlun nân, chu Chawlhni chu an serh tûr a ni.

¹⁷Keimah leh Israela thlahte inkârah hian kumkhuaa thuthlun chhinchhiahna a ni; ni ruk chhûngin LALPAN lei leh vânte a siam a; tin, a ni sarih ni chuan a châwl a, a intihahdam ta a ni si a,’ ti bawk ang che,” tiin a sawi a.

¹⁸Tichuan, Sinai tlânga amah a biak zawh chuan thuhriattîrna lungphêk pahnih, lungphêk, Pathian kutzungṭanga ziak chu Mosia a pe ta a.