Read Mizo_Old_version Exodus 32 Bible Online

Exodus 32 - Mizo_Old_version bible

Exodus 32

¹Tin, mipuite chuan Mosia chu tlâng ata lo chhuk thla har ta êmin an hria a, mipuite chu Arona hnênah an kal khâwm a, a hnênah chuan, “Khai, kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,” an ti a.

²Tichuan, Aronan an hnênah, “In nupuite, in fapate leh in fanute beh lai, rangkachak bengbehte kha han thlawn ula, ka hnênah han la rawh u,” a ti a.

³Chutichuan, mipuiho zawng zawng chuan rangkachak bengbeh an beh laite chu an thlawn vek a, Arona hnênah chuan an rawn la a.

⁴Tin, ani chuan an kut ata chu a lo la a, thîr zumin a han din a, bâwngno lemah a chhûng ta a. Tin, anni chuan, “Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!” an ti a.

⁵Tin, chu chu Aronan a han hmuhin, a hmaah chuan maichâm a siam ta a. Tin, Arona chu a tlângau va, “Naktûk hian LALPA tân kût awm rawh se,” a ti a.

⁶Tichuan, a tûk zîng takah an tho va, hâlrala thilhlante an hlân a, remna thilhlante an rawn la a; tichuan, mipui chu ei leh in tûrin an ṭhu khâwm a, infiam tûrin an tho leh a.

⁷Tin, LALPAN Mosia chu a bia a, “Zu chhuk tawh khai, i mite Aigupta ram ata i rawn hruai chhuahte khu an intichhe zo ta vek mai.

⁸Ka thupêkte chu an hawisan hma zet mai. Bâwngno lem an insiam a, an bia a, a hnênah chuan an inthawi a, ‘Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!’ an ti e,” a ti a.

⁹Tin, LALPAN Mosia hnênah, “He miteho hi ka enthla reng a, ngai teh, hnam luhlul tak an lo nih hi!

¹⁰Tichuan, lo ngawi rawh, anmahni kâng ral zo vek khawpin an chungah ka thinur chu ling hle teh se. Tin, nang hi chi ropui takah ka siam ang che,” a ti a.

¹¹Tin, Mosian LALPA a Pathian hnênah, “LALPA, thiltihtheihna nasa tak leh kut chak taka i mi, Aigupta ram ata i rawn hruai chhuahte chungah hian engah nge i thinurna chu a lin hle le?

¹²Aigupta miten engah tehlul nge, ‘An tâna ṭha lo tûr tlângahte thah tûr leh, lei chung ata kâng ral vek tûrin a hruai chhuak a lo nih hi,’ an la rawn tih ang le? I thinur nasa tak hi han tireh la, i mite chunga he thil ṭha lo tih i tum hi han lamlêt leh ang che.

¹³I chhiahhlawh Abrahama te, Isaaka te, Israela te hnêna, ‘Vâna arsi zâtin i thlahte chu ka la tipung ang a, he ram ka lo sawi tawh zawng zawng hi i thlahte ka la pe bawk ang a; tichuan, kumkhuain an luah hlen tawh ang,’ tia nangmah ngei inchhâla chhia i lo chham tawhnate kha hre reng ang che,” tiin a ngên chiam a.

¹⁴Tichuan, LALPAN, “Ka mite chungah thil ṭha lo ka ti ang,” a tih chu a lamlêt ta a.

¹⁵Tin, Mosia chu tlâng ata thuhriattîrna lungphêk pahnih kengin a lêt thla leh ta a; lungphêk a lehlam lehlam panga ziak chuan ve venate chu; a lehlam lehlam ve veahte chuan ziak a ni.

¹⁶Tin, lungphêkte chu Pathian kutchhuak a ni a; tin, a ziakte pawh chu Pathian ziak ngei, lungphêkte chunga ziak a ni.

¹⁷Tin, Josuan mipui au thâwm a han hriat chuan Mosia hnênah, “Riahhmun lamah indo thâwm ri a awm ka ti!” a ti a.

¹⁸Tin, ani chuan, “Hnehtu au thâwm a nih loh chu, hnehate au thâwm pawh a ni hek lo; hla sa thâwm a ni ka hriat zâwk ni,” a ti a.

¹⁹Tin, heti hi a ni a, riahhmun kiang a va thlen chuan, sebâwngno lem leh lâm chu a hmu ta a. Tichuan, Mosia thinrim chu a ling ta phut mai a, a lungphêk kente chu a paih ta ṭhuai a, tlâng hnuaiah chuan a paih keh ta a.

²⁰Tin, sebâwngno lem an siam chu a la a, meiah a rawh a, a râwt dip derh a, tuiah a phul chiam a, Israela thlahte chu a intîr ta a.

²¹Tin, Mosian Arona hnênah chuan, “Hênghote hian i chungah eng nge maw an tiha, hetiang thil sual nasa tak mai an chunga i thlentîr le?” a ti a.

²²Tin, Arona chuan, “Ka pu thinrim hi ling teh thut mai suh se a! Hêng mipuiho hi sual lam âwn tlat mi an ni tih i hria alâwm.

²³Ka hnênah, ‘Kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,’ an rawn ti a.

²⁴Tin, keiin an hnênah, ‘Tu pawh rangkachak nei apiangin rawn thlawn rawh se,’ ka ti a. Chutichuan, min rawn pe a, keiin meiah ka lo paih lût a; tichuan, he sebâwngno lem hi a lo chhuak ta mai alâwm maw le,” a ti a.

²⁵Tin, mipuite chu an duh duhin an tâl tih Mosian a hria a (Arona chuan an hmêlmate laka hmuhsitawma awm khawpin an duh duhin a lo tâltîr ta si a);

²⁶tichuan, Mosia chu riahhmun luhna kawngkaah a ding a, “Tu pawh LALPA lama ṭang apiang chu ka hnênah lo kal rawh se,” a ti a. Tichuan, Levia fate zawng zawng chu a hnênah an va kal khâwm a.

²⁷Tin, an hnênah, “LALPA, Israel-te Pathianin, ‘Mi tinin in khandaih pai ula, riahhmun chhûngah hian a luhna kawngka aṭanga kawngka lehlam thlengin vâk vêl ula, mi tinin in unaupa pawh, mi tinin in ṭhianpa pawh, mi tinin in ṭhenawmpa pawh that zêl rawh u,’ a ti a ni,” a ti a.

²⁸Tin, Levia fate chuan Mosia thu ang chuan an ti a. Tin, chumi ni chuan mi sângthum an thi a.

²⁹Tin, Mosian, “Vawiinah hian LALPA hnênah intihrang rawh u, a ni, mi tinin mahni fapa te, mahni unaupa te an lo do ta si a; tichuan, vawiinah hian malsâwmnain a rawn vûr thei dâwn che u nia,” a ti a.

³⁰Tin, heti hi a ni a, a tûkah chuan Mosian mipuite hnênah chuan, “Thil sual nasa tak mai in lo ti ta a. Chutichuan, LALPA hnênah ka han chho vang e; in sualnaah hian inremna ka siam thei mahna,” a ti a.

³¹Tichuan, Mosia chu LALPA hnênah a han kal leh a, “Aw, hênghote hian thil sual nasa tak mai an lo ti ta a, rangkachak pathiante chu an lo insiam ta.

³²Amaherawhchu, an sual i ngaidam thei ang emaw chu? I theih loh zawngin, i lehkhabua i lo ziak tawh ata kha mi thai bo tûrin ka ngên a che,” a ti a.

³³Tin, LALPAN Mosia hnênah, “Tu pawh ka chunga thil tisual apiang chu ka lehkhabu ata ka thai bo vang.

³⁴Tichuan, kal la, kalna tûr ka hrilh tawh che hmunah khân mipuihote hi va hruai phawt rawh. Ngai teh, ka vântirhkohvin i hma a hruai zêl ang. Amaherawhchu, ka rawn hrem hunah chuan an sualna ngeiah chuan ka rawn hrem dâwn a ni,” a ti a.

³⁵Tin, Arona din sebâwngno lem chu an siam avângin LALPAN mipuite chu a hrem ta a.