Read Mizo_Old_version Exodus 33 Bible Online

Exodus 33 - Mizo_Old_version bible

Exodus 33

¹Tichuan, LALPAN Mosia chu a bia a, “Chhuak ula, Abrahama te, Isaaka te, Jakoba te hnêna, ‘I thlahte hnênah ka la pe ang,’ tia chhia ka lo chham tâk ramah chuan, nang leh Aigupta ram aṭanga i rawn hruai chhuahte nên hian heta ta hi han chho tawh u,

²hnutetui leh khawizu luanna ramah chuan. Tin, in hmaah vântirhkoh ka rawn tîr ang a; tichuan, Kanaan-ho te, Amor-ho te, Hit-ho te, Periz-ho te, Hiv-ho te, Jebus-ho te chu ka hnawt chhuak ang. Kei zawng in zîngah ka han chho ve dâwn lo ve, hnam luhlul tak in lo ni si a; kawnglakah ka tiboral hlauh dah ang che u,” a ti a.

⁴Tin, mipuite chu chu thu lâwmawm lo tak an hriat chuan an ṭap hlawm a, tu mah rêng rêng an inchei duh ta lo va.

⁵Tin, LALPAN Mosia hnênah, “Israela thlahte hnênah, ‘Hnam luhlul tak in ni e. In zîngah rei lo tê pawh ka han tel ve zawngin ka tiboral ngei ang che u. Chuvângin, in incheinate kha hlîp vek rawh u; tichuan, ka tih dân tûr che u ka hre thei ang, a ti,’ ti ang che,” a ti a.

⁶Tin, Israela thlahte chuan an incheinate chu Horeb tlâng aṭang chuan an hlîp thla hlen ta a.

⁷Tin, Mosian puan in kha a chhawm zêl a, riahhmun pâwn lam hla deuh takah a zâr ṭhîn a; chu chu inbiakna puan in a ti a. Tin, heti hi a ni a, tu pawh LALPA zawng duh apiang chu riahhmun pâwn lama inbiakna puan inah chuan an va kal ṭhîn a.

⁸Tin, heti hi a ni a, Mosia chu puan in pana a chhuah hunin mipui zawng zawng chu an tho vek a, mi tin mahni puan in kawngkaah an ding ṭheuh va, Mosia puan ina a luh thlengin an thlîr reng ṭhîn.

⁹Tin, heti hi a ni a, Mosia chu puan ina a luh veleh chhûm ding chu a lo chhuk a, puan in kawngkaah chuan a lo ding ṭhîn a; tin, LALPAN Mosia chu a rawn be ṭhîn.

¹⁰Tin, mipui zawng zawngin chhûm ding chu puan in kawngkaa ding an hmu a; tichuan, mipui zawng zawng chu an tho va, mahni puan in kawngka ṭheuhvah chuan chibai an lo bûk ṭhîn a.

¹¹Tin, miin a ṭhian a bia ang mai hian LALPAN Mosia chu inhmatawnin a be ṭhîn a. Tin, riahhmun lamah chuan a lo kîr leh ṭhîn a; a rawngbâwltu Josua, Nuna fapa, tlangvâl erawh chu puan in chhûng ata chu a lo chhuak leh ve ṭhîn lo.

¹²Tin, Mosian LALPA hnênah chuan, “Ngai teh, nangin ka hnênah, ‘He mite hi han hruai chho rawh,’ i ti a ni a; tu nge ni ka hnêna i rawn tirh ve dâwn mi la hrilh si lo. Nang lah chuan, ‘I hmingah ka hre chiang che alâwm; tin, ka mittlungin i awm tih ka hre bawk alâwm,’ i ti a.

¹³Chuvângin, i mit ka tlun si chuan, nangmah ka hriat chian theih nân che leh i mittlunga ka awm theih nân, tûnah hian i kawngte hi khawngaih takin mi hriattîr ang che. Tin, he hnam hi i mite ngei an ni tih ngaihtuah ang che,” a ti a.

¹⁴Tin, ani chuan, “In zingah ka tel ve zêl ang a; tichuan, ka chawlhtîr ang che u,” a ti a.

¹⁵Tin, ani chuan a hnênah, “Kan zînga i tel ve zêl si loh chuan heta ta hi min hruai chhuak ma ta che.

¹⁶Kei leh i mite hi i mittlungin kan awm a ni tih hi engtin nge hriatna a awm theih tâk ang? Lei chunga mihring zawng zawngte hi kei leh i mite nên kan inthliar hranna tûr chuan, nang kan hnêna i kal ṭhin hi a ni lo vem ni?” a ti a.

¹⁷Tin, LALPAN Mosia hnênah, “Chu pawh chu i sawi ang chuan ka ti ang e; ka mit i tlung si a, i hmingah ka hre chiang bawk si chia,” a ti a.

¹⁸Tin, ani chuan, “I ropuina chu khawngaih takin mi han entîr teh,” a ti a.

¹⁹Tin, ani chuan, “Ka ṭhatna zawng zawng chu i hmaah ka lantîr ang a, LALPA hming chu i hmaah ka puang zêl ang. Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” a ti a.

²⁰Tin, ani chuan, “Ka hmêl zawng i hmu thei lo vang; mi hmua nung reng thei tu mah rêng rêng an awm si lo va,” a ti a.

²¹Tin, LALPAN, “En teh, ka kianga hi hmun pakhat a awm hi, lungpui chungah hian i ding ang a.

²²Tin, heti hi a ni ang a, ka ropuinain a rawn kal pelh chhûng che chuan, lungpui khi chhûngah hian ka dah ang chia, ka kal pelh hma loh che chuan ka kutin ka khuh ang chia.

²³Tin, ka kut chu ka han la leh ang a; tichuan, ka hnung lam chu i hmu ang; ka hmêl erawh chu hmuh tûr a ni lo ve,” a ti a.