Read Mizo_Old_version Exodus 34 Bible Online

Exodus 34 - Mizo_Old_version bible

Exodus 34

¹Tin, LALPAN Mosia hnênah, “Lungphêk pahnih hmâna mi ang kha chher leh rawh; tin, lungphêkah chuan hmâna i tihkeh tâk lungphêka thu chuang ang kha ka ziak leh ang e.

²Naktûk zîngah inpeih tum ang che; tin, zîngah chuan Sinai tlângah lo chho la, tlâng chhîpah ka hmaan lo ding ang che.

³I hnênah tu mah lo kal ve suh se, tlângah rêng rêng chuan tu mah a lanin lo lang hauh suh se; berâm rualte leh bâwng rualte pawh tlâng pangah chuan tla hlek bawk suh se,” a ti a.

⁴Chutichuan, lungphêk pahnih hmâna mi ang kha a chher a. Tin, Mosia chu zîng takah a tho va, LALPAN thu a pêk angin Sinai tlângah chuan a han lâwn a; tin, lungphêk pahnih a keng a.

⁵Tin, LALPA chu chhûmah chuan a lo chhuk a; tin, a kiangah a va ding a, LALPA hming chu a lam ta a.

⁶Tin, LALPA chuan a hma lamah chuan a kal pêl a, “LALPA chu, LALPA chu, Pathian lainatnaa khat, mi khawngaih thei tak, thinnel tak, ngilneihna leh thutak ngah,

⁷mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualnate ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn chu,” tiin a puang ta a.

⁸Tichuan, Mosia chu a kaikûn thuai a, chibai a bûk ta a.

⁹Tin, ani chuan, “Tûnah hian i mittlung ka nih chuan, aw Lalpa, Lalpa chu kan hnênah khawngaih takin kal ve ang hmiang, hnam luhlul tak an ni na a; tichuan, kan khawlohna leh kan sualna ngaidam la, i ro chan atân min nei ang che,” a ti a.

¹⁰Tin, ani chuan, “Ngai teh, thu ka thlung e. Khawvêl zawng zawng leh tu hnam zîngah mah la tih ngai loh, i mite zawng zawng mit hmuhah hian thil mak ka ti dâwn e; tichuan, i vêla awmho zawng zawngte hian LALPA thiltih chu an hmu ang. I tâna ka thiltih tûr hi râpthlâk tak a ni dâwn si a.

¹¹Vawiina ka thupêk tûr che hi pawm rawh. Ngai teh, i hmaah chuan Amor-ho te, Kanaan-ho te, Hit-ho te, Periz-ho te, Hiv-ho te, Jebus-ho te ka hnawt chhuak dâwn e.

¹²Fîmkhur rawh; chuti lo chuan, i kalna tûr rama chêngte hnênah thu i thlung ang a, in zîngah hian thang a lo ni dah ang e.

¹³Amaherawhchu, an maichâmte chu in tichim vek tûr a ni a, an lungphunte chu tikeh sawm vekin, an Aseri-te chu in kit vek tûr a ni;

¹⁴pathian dang rêng rêng chu i be tûr a ni si lo va; LALPA chu a hming rêng pawh Thîkthuchhiaa a ni a, Pathian thîkthuchhia a ni si a;

¹⁵chuti lo chuan, chumi rama mite hnênah chuan thu i thlung ang a, an pathiante lakah an uirê ang a, an pathiante hnênah an inthawi ang a, an rawn sâwm chein an inthawina chu i ei dah ang e;

¹⁶tin, i fapate tân an fanute i nei ang a, an fanute chu an pathiante lakah an uirê ang a, i fapate pawh an pathiante lakah an uirêtîr dah ang e.

¹⁷Milem chhûn pathiante chu i siam tûr a ni lo.

¹⁸“Chhang dawidim telh loh kût i nei tûr a ni. Thu ka lo pêk tâk che ang khân, ni sarih chhûng chu chhang dawidim telh loh, Abib thla hun ruatah khân i ei tûr a ni; Abib thla khân Aigupta ram ata chu i lo chhuak a ni si a.

¹⁹Chhûl keu hmasa ber apiang chu ka ta a ni; tin, i ran pa zawng zawng, sebâwngpa leh berâmpa piang thla hmasa berte pawh.

²⁰Tin, sabengtung piang thla hmasa ber chu berâmnovin i tlan tûr a ni. Tin, i tlan duh loh leh a ring chu i ulh tliak tûr a ni. I fapa piang hmasa zawng zawng chu i tlan tûr a ni. Tichuan, ka hmaah tu mah hi kut ruakin in lo lang tûr a ni lo.

²¹Ni ruk chhûngin hna i thawk tûr a ni a, a ni sarih ni erawh chuan i châwl tûr a ni; lei leh lai leh buh seng lai pawhin i châwl tûr a ni.

²²Chawlhkâr kût, buh thar tirh kût chu, kum a lo ral a, buh khung vek hnua pâwl kût nên i nei tûr a ni.

²³I mipa zawng zawngte chu kum khatah vawi thum, Lalpa PATHIAN, Israel-te Pathian hmaah chuan an rawn inlan ṭhîn tûr a ni.

²⁴I hmaah hnam tin ka hnawt chhuakin, i ramrite chu ka zauh dâwn si a; kum khatah vawi thum LALPA i Pathian hmaa inlan tûra i han kal hunah chuan tu mahin i ram hi an rawn ît hek lo vang.

²⁵“Ka tân inthawina sa thisen chu chhang dawidim telh nên chuan i rawn hlân tûr a ni lo, kalhlên kût inthawina pawh chu a tûk thlengin awmtîr tûr a ni hek lo.

²⁶I lova thlai thar hmasa ber chu LALPA i Pathian inah i rawn dah tûr a ni. Kêlnosa, a pui hnutetuiin i chhûm tûr a ni lo,” a ti a.

²⁷Tin, LALPAN Mosia hnênah, “Hêng thute hi ziak rawh khai, hêng ang thute hian a nia i hnênah leh Israel-te hnêna thu ka thlun ni,” a ti a.

²⁸Tin, chutah chuan LALPA hnênah ni sawmli leh zan sawmli a awm a; chaw rêng rêng a ei lo va, tui pawh a in hek lo. Tin, lungphêkahte chuan thuthlunna thu, thu sâwm pêkte chu a ziak ta a.

²⁹Tin, heti hi a ni a, Mosia chu thuhriattîrna lungphêk pahnih chu a kuta kengin Sinai tlâng ata chu a chhuk a, tlâng ata a chhuk chuan, Mosia chuan chutia an inbiakna avâng chuan a hmai vun chu a lo êng ta tih a hre hauh lo va.

³⁰Tin, Arona leh Israela thlah zawng zawngten Mosia an han hmuh chuan, ngai teh, a hmai vun chu a lo êng a, an rawn hnaih ngam lo va.

³¹Tin, Mosian anmahniho chu a han au va; tin, Arona leh pung khâwmho rorêltu zawng zawngte chu a hnênah an lo kîr leh a; tin, Mosian anniho chu a lo bia a.

³²Chumi hnuah chuan Israela thlahte zawng zawng chuan an rawn hnaih a; tichuan, Sinai tlânga LALPA nêna an inbiakna zawng zawngte chu thu pein a lo hrilh chhâwng a.

³³Tin, Mosian anmahni chu a biak zawh chuan a hmai chu hmaikhuhnain a khuh ta a.

³⁴Amaherawhchu, Mosia LALPA be tûra a hmaa a luh hun apiang chuan, a lo chhuah leh hma loh chuan hmaikhuhna chu a hlîp ṭhîn a; tin, a lo chhuak leh ṭhîn a, a thupêkte chu Israela thlahte a hrilh chhâwng ṭhîn a.

³⁵Tin, Israela thlahte chuan Mosia hmai chu an han en a, Mosia hmai vun chu a lo êng ṭhîn a; tin, Mosia chu Pathian be tûra a luh leh hma chuan hmaikhuhna chuan a hmai a khuh leh ṭhîn a.