Read Mizo_Old_version Exodus 35 Bible Online

Exodus 35 - Mizo_Old_version bible

Exodus 35

¹Tin, Mosian Israela thlah pung khâwmho zawng zawngte chu a ko khâwm a, an hnênah, “Hêng hi a nih hi LALPAN in tih tûra thu a pêk che u chu:

²Ni ruk chhûng hna thawh nân hman tûr a ni a, a ni sarih ni erawh chu in tân ni thianghlim, LALPA tâna chawlh dêrna Chawlhni a ni tûr a ni: tu pawh chumi nia hna thawk apiang chu tihhlum tûr a ni ang.

³Chawlhni chuan in chênna hmun rêng rêngahte chuan mei in chhêm tûr a ni lo,” a ti a.

⁴Tin, Mosian Israela thlahte pung khâwmho zawng zawng hnênah chuan, “Hei hi a nih hi LALPAN thu a pêk che u chu:

⁵‘In zîng ata LALPA tâna thilhlan tûr rawn la rawh u. Tu pawhin a thinlunga pêk châk apiang chuan LALPA tân hlan tûr chu rawn la rawh se: rangkachak te, tangkarua te, dâr te,

⁶la dumpâwl te, senduk te, senlâr te, lazai sîn te, kêl hmul te nên;

⁷tin, berâmpa vun chhum sen te, savun ṭha mi te, thingri thingte nên;

⁸tin, khâwnvâr atân hriak te, hriak thih mi atân leh hâl tûr rimtui tak atân englo rimtui nên;

⁹tin, puithiam kawr leh kawr âwma zeh tûrin onukion lungte leh lunghlute nên.

¹⁰“ ‘Tin, in zînga mi themthiam apiang chu lo kal sela, LALPAN siam tûra thu a pêk apiang chu siam rawh se:

¹¹biakbûk te, a puan in te, a khuhna te, a chilh behna te, a ban rem khâwm te, a bangrel te, a ban te, a nghahchhan ker kuakte nên;

¹²bâwm leh a zâwnfung te, zahngaihna ṭhutphah te, a daidanna tûr puanzâr nên;

¹³dawhkân leh a zâwnfung te leh a hmanrua zawng zawng te, chhangdah te nên;

¹⁴tin, êng atân khâwnvâr dahna te leh a hmanrua zawng zawng te, a khâwnvâr te, chhit ên atân hriak te nên;

¹⁵tin, rimtui hâlna maichâm leh a zâwnfung te, hriak thih mi te, hâl tûr rimtui tak te, biakbûk kawngkaa zâr tûr kawngka puanzâr te nên;

¹⁶hâlrala thilhlanna maichâm, a dâr lên leh a zâwnfungte leh a hmanrua zawng zawng te, maihûn leh a hûnchhan te nên;

¹⁷biakbûk hung chhûng kawtlaia puanzâr te, a ban te, a ban nghahchhan ker kuak te leh a hung chhûng kawngkaa puanzâr te nên;

¹⁸biakbûk kilh behna te, a hung chhûng kawtlai kilh behna te, a hrui te nên;

¹⁹hmun thianghlima rawngbâwlna tûra silhfên mawi taka tah te, puithiam hna an thawh huna hâk tûr puithiam Arona silhfên thianghlim leh a fapate silhfênte,’ tiin,” a ti a.

²⁰Tichuan, Israela thlah pung khâwmho zawng zawngte chu Mosia hnên ata an ṭîn ta vek a.

²¹Tin, mi tin thinlung taka phûr sârh apiang leh rilru taka phal apiang chu an lo kal a, inbiakna puan ina hman tûr leh, rawngbâwlna lam atâna thil hman ṭûl apiang leh, silhfên thianghlim tûr chu LALPA tân an rawn thawh hlawm a.

²²A hmei a pain pêk châk apiangte chu an lo kal a, banbun te, bengbeh te, hming nemna zungbun te, ṭhi te, rangkachak incheina tinrêngte an rawn la a; mi tin rangkachak hlan tûr nei apiangin LALPA tân an hlân ṭheuh va.

²³Tin, mi tin la dumpâwl te, senduk te, senlâr te, lazai sîn te, kêl hmul te, berâmpa vun chhum sen te, savun ṭha mi te nei apiangin an rawn keng hlawm a.

²⁴Mi tin tangkarua leh dârte thawh apiangin LALPA tâna thilhlan tûr an rawn keng a. Tin, mi tin thingri thing, hmanraw tinrêng atâna hman tlâk nei apiangin an rawn la a.

²⁵Tin, hmeichhe themthiamho zawng zawngte chuan la an kai a, chûng an la kaih dumpâwl te, senduk te, senlâr te, lazai sîn te chu an rawn keng hlawm a.

²⁶Tin, hmeichhe themthiam phûr sârhho zawng zawngte pawhin kêl hmul an kai a.

²⁷Tin, puithiam kawr leh kawr âwma zeh tûrin rorêltuten onukion lungte leh lunghlute an rawn keng a;

²⁸tin, chhit ên atân te, hriak thih mi atân te, hâl tûr rimtui tak atân hriak leh rimtuite pawh.

²⁹Israela thlahte chuan LALPA hnênah duh thua thilhlan an rawn hlân a; mi tin, a hmei a pa, LALPAN Mosia kuta thil siam tûra thu a pêk zawng zawngte siamna tûra thinlunga châk taka kengtute chuan.

³⁰Tin, Mosian Israela thlahte hnênah chuan, “Ngai teh u, LALPAN Juda hnama mi Hura fapa Uria, chu mi fapa Bezalela chu a thlang tawh e.

³¹Chu mi chu finna te, hriat thiamna te, hriatna te, kawng tinrênga themthiamna te nei tûrin Pathian Thlarauvin a tikhat tawh a,

³²thiltih tûr fing taka suangtuah thiamna te, rangkachak leh tangkarua leh dâr chher thiamna te,

³³lunghlute zeh tûra phel thiamna te, thing zai mawi dân thiamna te, kawng tinrênga themthiamna te nei tûrin.

³⁴Tin, amah nên, Dan hnama mi Ahisamaka fapa Oholiaba nên mite zirtîr theihna finna a pe ve ve a.

³⁵Anni chu kawng tinrênga themthiamna te, englo ziak thiamna te, themthiamna te, la dumpâwl te, senduk te, senlâr te, lazai sîn te zeh mawi thiamna te, puan tah thiamna te, hnathawh tinrêng thiamna te, thiltih tûr fing taka suangtuah thiamna te nei tûrin thinlung finnain a tikhat tawh e.