Read Mizo_Old_version Exodus 36 Bible Online

Exodus 36 - Mizo_Old_version bible

Exodus 36

¹“Tin, Bezalela leh Oholiaba leh mi themthiam tu pawh, LALPAN thu a pêk ang zêla hmun thianghlima rawngbâwlna hna tinrêng thawk thei tûra finna leh hriat thiamna a pêk apiangte chuan an bei tûr a ni,” a ti a.

²Tin, Mosian Bezalela leh Oholiaba leh mi themthiamho, LALPAN an thinlunga finna a pêka, chumi hna bei peih tûra thinlung taka phûr sârh apiang chu a ko va.

³Tin, Israela thlahten hmun thianghlima rawngbâwl nâna thil siam tûra an rawn thawh zawng zawng chu Mosia hnên aṭangin an la zêl a. Tin, tûk tin duh thua thilhlante chu a hnênah an rawn hlân zêl bawk a.

⁴Tin, mi themthiamho zawng zawng, hmun thianghlim atâna hna tinrêng thawkte chuan an hnathawh lai chu an tlânsan ṭheuh va,

⁵Mosia hnênah, “LALPAN siam tûra thu a pêk siam nân mite chuan a chuang a liamin thil an rawn la e,” tiin an thlen a.

⁶Tin, Mosia chuan thu a pe a, “Hmun thianghlim atâna thil pêk tûr chu a hmei a pa, tu mahin rawn buatsaih tawh suh se,” tiin an riahhmunah chuan an tlângautîr ta a. Chutichuan, mite chuan an rawn lâk phal a ni ta lo va.

⁷An neih sa chu siam ṭûl apiang siamna tûr chuan a tâwk hle mai a, a tam lutuk mah a ni.

⁸Tin, an zînga mi themthiam hnathawkho zawng zawngte chuan biakbûk chu puanzâr sâwm neiin an siam a; chûng puanzârte chu lazai sîn tak kawp te, dumpâwl te, senduk te, senlâr te hmangin cherub lemte mi thiam tak siam chuantîrin a siam a.

⁹Puanzâr chu a sei lam tawng sawmhnih leh tawng riat ṭheuh a ni a, puanzâr chu a hlai lam tawng li ṭheuh a ni; puanzâr zawng zawng chu a inchen vek a.

¹⁰Tin, puanzâr pangate chu a zawm vek a, puanzâr panga dangte pawh chu a zawm bawk a.

¹¹Tin, puanzâr zawm khat hmâwrtawng ber tlângah chuan a beng a dumpâwlin a siam a; chutiang bawkin puanzâr zawm lehlam hmâwrtawng ber tlângah chuan a siam bawk a.

¹²Puanzâr pakhatah chuan beng sawmnga a siam a, puanzâr zawm khat tlângah pawh chuan beng sawmnga a siam bawk a; chûng bengte chu a inep thliah a.

¹³Tin, rangkachak chilh behna sawmnga a siam a, a chilh behnate chuan puanzârte chu a chilh bet a; tichuan, biakbûk chu pindan pakhat a lo ni ta a.

¹⁴Tin, biakbûk chung khuh nân kêl hmul puanzârte a siam a; puanzâr sâwm leh pakhat a siam a.

¹⁵Puanzâr chu a sei lam tawng sawmthum ṭheuh a ni a, puanzâr chu a hlai lam tawng li ṭheuh a ni; puanzâr sâwm leh pakhatte chu a inchen vek a.

¹⁶Puanzâr pangate chu a ṭhui zawm vek a, puanzâr paruk pawh chu a ṭhui zawm vek a.

¹⁷Tin, puanzâr zawm khat hmâwrtawng ber tlângah chuan beng sawmnga a siam a, puanzâr zawm lehlam tlângah chuan beng sawmnga a siam bawk a.

¹⁸Tin, puan in chu pindan pakhat a lo nih theih nân a chilh zawmna tûrin dâr chilh behna sawmnga a siam a.

¹⁹Tin, berâmpa vun chhum senin puan in chung khuhna te, savun ṭha miin a chunga khuh lehna te a siam a.

²⁰Tin, biakbûk ban rem khâwm tûrte chu ngîl taka dingin thingri thingin a siam a.

²¹Ban rem khâwm sei lam chu tawng sâwm a ni a, a vâng lam chu tawng khat leh a chanve ṭheuh a ni.

²²Ban rem khâwm tinah chuan ke pahnih inzawmin a awm a. Chutiang chuan biakbûk ban rem khâwm zawng zawng chu a siam a.

²³Tin, biakbûk atân chuan ban rem khâwmte a siam a, chhim chhawng chhim lampang atân chuan ban rem khâwm sawmhnih a siam a.

²⁴Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli a siam a: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih a siam a.

²⁵Tin, biakbûk sîr lehlam hmâr chhawng lam atân chuan ban rem khâwm sawmhnih a siam a,

²⁶tangkaraw tlang ker kuak sawmli nên: ban rem khâwm pakhat atân nghahchhan ker kuak pahnih a siam a.

²⁷Tin, biakbûk kawmchâr khawthlang chhawng lam atân chuan ban rem khâwm paruk a siam a,

²⁸Tin, biakbûk kawmchâr kil ve ve atân chuan ban rem khâwm pahnih a siam a.

²⁹Tin, a hnuai lamah chuan thlawp a ni a, chutiang bawkin a chhîp lam khâng hmasa ber thlengin thlawp a ni. A kil pahnihah chuan chutiang chuan a ti ve ve a.

³⁰Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm a, ban rem khâwm tin innghah nân ker kuak pahnih zêl a awm a ni.

³¹Tin, thingri thingin bangrel: biakbûk bang lehlam ban rem khâwm atân panga,

³²biakbûk bang lehlam ban rem khâwm atân panga, biakbûk kawmchâr khawthlang chhawng lam ban rem khâwm atân pawh panga a siam a.

³³Tin, bangrel laita, ban rem khâwm lai taka mi chu ban rem khâwm hmâwrtawng ber aṭangin, a lehlam hmâwrtawng ber thlenga thil tlang tûrin a siam a.

³⁴Ban rem khâwmte chu rangkachak tîin a luan a, bangrelte thil nân rangkachak khângte a siam a; tin, chûng bangrelte chu rangkachak tîin a luan a.

³⁵Tin, puanzâr tûr chu lazai sîn tak kawp te, a dumpâwl te, a senduk te, a senlâr te hmangin cherub lemte mi thiam tak siam chuantîrin a siam a.

³⁶Tin, chumi atân chuan thingri ban pali a siam a, chûng chu rangkachak tîin a luan a, a bânnate chu rangkachak a ni; tin, chûng nghahchhan atân chuan tangkaraw tlang ker kuak pali a chhûng a.

³⁷Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a siam a;

³⁸tin, chumi zârna tûr ban panga, a bânnate nên a siam a. Tin, ban lubâwkte leh a zârfungte chu rangkachak tîin a luan a; mahse, chûng nghahchhan ker kuak pangate chu dâr a ni a.