Read Mizo_Old_version Exodus 38 Bible Online

Exodus 38 - Mizo_Old_version bible

Exodus 38

¹Thingri thingin hâlral thilhlan maichâm chu a siam a; a dung lam chu tawng nga a ni a, a vâng lam chu tawng nga a ni a, kil li a ni; a sân lam chu tawng thum a ni.

²A kil li chhîpahte chuan a kîte a siam a; chûng kîte chu maichâm nên a inzawm vek a; dâr tîin a luan vek a.

³Maichâm atâna hmanrua zawng zawng - bêl te, vutlawh te, maihûn te, sa thurna thîrkawm te, mei lâknate - a siam a; chûng hmanrua zawng zawngte chu dârin a siam a.

⁴Tin, maichâm dawhzâwl hnuai lam vêl chuan a chanve thlengin a siam a.

⁵Zâwnfungte rawlh nân dâr lên hungna kil lia vuah tûr khâng pali a chhûng a.

⁶Tin, zâwnfungte chu thingri thingin a siam a, dâr tîin a luan a.

⁷Tin, a zâwnna tûrin maichâm sîra khângahte chuan zâwnfungte chu a rawlh lût a; maichâm chu thingphela hungin a kawrawngin a siam a.

⁸Dâr maihûn, a hûnchhan dâr nên, inbiakna puan in kawngka bula hmeichhe rawngbâwl ṭhînte dârthlalangin a siam a.

⁹Tin, biakbûk hung chhûng kawtlai a siam a; chhim chhawng chhim lampanga a hung chhûng kawtlaia puanzâr zâr tûr chu, la zai sîn tak kawpa siam tawng zaa sei a ni.

¹⁰Chumi atân chuan ban sawmhnih leh dâr tlang ker kuak sawmhnih a awm a; bana a bânnate leh a zârfungte chu tangkarua a ni.

¹¹Hmâr lampanga puanzâr zâr tûr chu tawng za a ni a, a bante chu sawmhnih leh dâr tlang ker kuak sawmhnih a ni a; bana a bânnate leh a zârfungte chu tangkarua a ni.

¹²Tin, thlang lampanga puanzâr zâr tûrte chu tawng sawmnga a ni a, a bante chu sâwm a ni a, a nghahchhan ker kuak chu sâwm a ni.

¹³Chhak chhawng chhak lampanga puanzâr zâr tûrte chu tawng sawmnga a ni.

¹⁴Kawngka sîr lehlama puanzâr zâr tûrte chu tawng sâwm leh tawng ngaa sei a ni a, a ban pathum leh a nghahchhan ker kuak pathum a ni a;

¹⁵a sîr lehlam panga mi pawh chutiang bawk chu a ni; biakbûk hung chhûng kawtlai kawngka sîr lehlam lehlama puanzâr zâr tûrte chu tawng sâwm leh tawng nga a ni; a bante chu pathum a ni a, a nghahchhan ker kuakte pawh pathum a ni.

¹⁶Biakbûk hung chhûng kawtlai vêla puanzâr zâr tûr zawng zawngte chu la zai sîn tak kawp vek a ni.

¹⁷A ban nghahchhan ker kuakte chu dâr a ni a, bana a bânnate leh a zârfungte chu tangkarua a ni a, a lubâwkte chu tangkaraw tîa luan a ni; tin, biakbûk hung chhûng kawtlai ban zawng zawng zârfungte chu tangkarua vek a ni.

¹⁸Biakbûk hung chhûng kawtlai kawngkaa puanzâr zâr tûr chu puan zehmawi thiam taka zeh a ni a, la zai sîn tak kawp te, a dumpâwl te, a senduk te, a senlârtea siam a ni. A sei lam chu tawng sawmhnih a ni a, a sân lam chu biakbûk hung chhûng kawtlai puanzâr zâr tûrte nêna induh chiah, tawng nga bawk a ni.

¹⁹Tin, a bante chu pali a ni a, a nghahchhan ker kuakte chu pali a ni a, dâr vek a ni; a bânnate chu tangkarua a ni a, a lubâwkte leh a zârfungte chu tangkaraw tîa luan a ni.

²⁰Biakbûk leh a kawtlai hung chhûng kilh behna zawng zawngte chu dâr vek a ni.

²¹Biakbûk, thuhriattîrna biakbûk atâna hmanrua, Mosia thupêk anga puithiam Arona fapa Ithamara hova Levia chiten an chhiarte chu hêngte hi a ni.

²²Juda hnama mi Hura fapa Uria, chu mi fapa Bezalela chuan LALPAN Mosia hnêna siam tûra thu a pêk zawng zawng kha a siam vek a.

²³A hnênah chuan Dan hnama mi Ahisamaka fapa Oholiaba, englo ziak thiam, kut themthiam, la dumpâwl te, senduk te, senlâr te, la zai sîn tak te zehmawi thiamin a thawk ve a.

²⁴Hmun thianghlim atâna hman ṭûl apianga rangkachak hman zawng zawng, rangkachak hlana chu talent sawmhnih leh pakua leh, hmun thianghlima sekel an pêk ṭhin anga chhiar chuan sekel zasarih leh sawmthum a ni.

²⁵Tin, mipui chhiar tawhte zînga tel apiangte tangka pêk chu talent za leh, hmun thianghlima sekel an pêk ṭhin anga chhiar chuan, sekel sângkhat leh zasarih leh sawmsarih leh panga a ni:

²⁶kum sawmhnih achin chung lam chhiar tawhte zînga tel tûra kal, nuai ruk leh sângthum leh zanga leh sawmngate chu, hmun thianghlima sekel pêk ṭhin anga chhiar chuan, beka khat ṭheuh (chu chu sekel chanve a ni) pe ang an ni.

²⁷Tin, tangka talent za chu hmun thianghlim ban nghahchhan ker kuak leh, puan zârna ban nghahchhan ker kuak chhûn nân an hmang a; ban nghahchhan ker kuak za chhûn nân talent za an hmang a, ban nghahchhan pakhat chhûn nân talent khat zêl an hmang a ni.

²⁸Tin, sekel sângkhat leh zasarih leh sawmsarih leh panga chu hmangin bana bânnate a siam a, lubâwkte chu tangkaraw tîin a luan a, a zârfungte a siam bawk a.

²⁹Tin, an dâr hlante chu talent sawmsarih leh sekel sânghnih leh zali a ni.

³⁰Tin, chûng chu inbiakna puan in kawngka ban nghahchhan ker kuakah te, dâr maichâmah te, a dâr lên leh maichâma hmanraw thil zawng zawngah te,

³¹biakbûk hung chhûng kawtlai vêl ban nghahchhan ker kuakah te, biakbûk hung chhûng kawngka ban nghahchhan ker kuakah te, biakbûk chilh behna zawng zawngah te a siam vek a.