Read Mizo_Old_version Exodus 39 Bible Online

Exodus 39 - Mizo_Old_version bible

Exodus 39

¹Tin, la dumpâwl te, a senduk te, a senlâr te hmangin hmun thianghlima rawngbâwlna tûra silhfên mawi takte an siam a; Arona tân silhfên thianghlimte an siam bawk a, LALPAN Mosia thu a pêk ang khân.

²Rangkachak zai te, la dumpâwl te, a senduk te, a senlâr te, la zai sîn tak kawpte hmangin puithiam kawr chu a siam a.

³Rangkachak chu pan takin an chhu pêr a, la dumpâwl te, a senduk te, a senlâr te, la zai sîn tak tea mi themthiam takin a zeh tûrin an zai thlûr seng a.

⁴A dârbak ṭhui belhbawmin an siam a; a hmâwr ve vea ṭhui belhbawm a ni.

⁵Tin, chumi kawr chunga kâwnghrên tûr themthiam taka tah chu, chumi kawr chi bawk tluan khat vek a ni a: rangkachak zai te, la dumpâwl te, a senduk te, a senlâr te, la zai sîn tak kawptea tah a ni, LALPAN Mosia thu a pêk ang khân.

⁶Tin, Israela thlahte hming ang zêlin, nemnaa ziak ang chuanna rangkachak zai phiara phûm onukion lungahte chuan an ziak a.

⁷Tin, Israela thlahte hriat rengna lung atân puithiam kawr dârbakah chuan a bel a, LALPAN Mosia thu a pêk ang khân.

⁸Tin, âwmbel chu puithiam kawr siam ang bawk mi thiam tak siam angin rangkachak zai te, la dumpâwl te, a senduk te, a senlâr te, la zai sîn tak kawpte hmangin a siam a.

⁹Chu chu kil li nei a ni a, âwmbel chu an thuah a; a dung lam chu khâp a ni a, a vâng lam pawh khâp bawk a ni a, thuah a ni.

¹⁰Tin, chutah chuan lunghlute tlar liin an zep a: tlar khatna chu saridon te, topazio te, smaragdon te a ni a;

¹¹tlar hnihna chu anthrax te, sappheiros te, sardonukion te a ni a;

¹²tlar thumna chu huakinthos te, akates te, amethustos te a ni a;

¹³tlar lina chu krusolithos te, berullion te, onukion te a ni a: rangkachak zai phiara phûm fel ṭhêt a ni.

¹⁴Tin, lung chu sâwm leh pahnih, Israela thlahte hming ang zêlin a ni a: hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni.

¹⁵Tin, âwmbel chungah chuan hruihrual ang khaidiatte, rangkachak hlîr hlak herh an siam a.

¹⁶Rangkachak zai phiar pahnih leh rangkachak khâng pahnih an siam bawk a; tichuan, âwmbel tlâng hmâwr ve veah chuan khângte chu an vuah a.

¹⁷Tin, rangkachak khaidiat herh pahnih chu âwmbel tlâng hmâwr ve vea khâng pahnihah chuan an thlung a.

¹⁸Tin, khaidiat herh hmâwr lehlam pahnihte chu rangkachak zai phiar pahnihah chuan an zawm a, chu chu puithiam kawr hma lama dârbakah chuan an thlung a.

¹⁹Tin, rangkachak khâng pahnih an siam a, chûng chu âwmbel kil pahnih, puithiam kawr dep chhûng lampangah chuan an vuah a.

²⁰Rangkachak khâng pahnih dang an siam leh a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan an vuah a.

²¹Tin, puithiam kawra khângahte chuan âwmbela khângte chu hrui dumpâwlin an chilh zawm a, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân, LALPAN Mosia thu a pêk ang khân.

²²Puithiam kawrfual, a dumpâwl hlîr hlaka tah a siam a;

²³tin, kawrfual lai tak chu kawr bân bûl angin a tiâwng a, a âwng chu a thlêr chhiat theih mai lohna tûrin a tlâng vêl chu a chep a.

²⁴Kawrfual fêmahte chuan pawmgranet lem - a dumpâwl te, a senduk te, a senlâr te, la zai kawptein an siam a.

²⁵Tin, rangkachak hlîr hlak tengengte an siam a, chûng tengeng chu kawrfual fêmah a vêlin pawmgranet inkârahte chuan an dah a, pawmgranet inkâr zêlah an dah a ni:

²⁶tengeng pakhat leh pawmgranet pakhat zêl kawrfual fêmah a vêlin rawngbâwlna tûra inthuam nân an dah a, LALPAN Mosia thu a pêk ang khân.

²⁷Tin, Arona leh a fapate tân chuan la zai sîn taka tah kawrte an siam a,

²⁸la zai sîn taka siam puithiam lukhum te, la zai sîn taka siam diar ṭha tak te, la zai sîn tak kawpa siam la zai sîn kekawr te,

²⁹la zai sîn tak kawp te, a dumpâwl te, a senduk te, a senlârte hmanga puan zehmawi thiam taka zeh kawnghrên te nên, LALPAN Mosia thu a pêk ang khân.

³⁰Tin, lukhum thianghlim atâna rangkachak phêk chu rangkachak hlîr hlakin an siam a, a pangah chuan hming nemna a chuang ang, “LALPA PUAL” tih an chuantîr a.

³¹Tin, puithiam lukhum chung lama bel tûrin hrui dumpâwlin an thlung a, LALPAN Mosia thu a pêk ang khân.

³²Chutichuan, inbiakna puan in biakbûk hna zawng zawng chu an zo ta a. Tichuan, LALPAN ti tûra Mosia thu a pêk ang chiah zêlin Israela thlahte chuan an ti a.

³³Tin, Mosia hnênah biakbûk an rawn kalpui a, puan in te, a hmanrua zawng zawng te: a chilh behna te, a ban rem khâwm te, a bangrel te, a ban te, a nghahchhan ker kuak te nên;

³⁴berâmpa vun chhum sena siam a khuhna te, savun ṭha mia siam a khuhna te, a daidanna tûr puanzâr te nên;

³⁵thuhriattîrna bâwm leh a zâwnfung te, zahngaihna ṭhutphah nên;

³⁶dawhkân te, a hmanrua zawng zawng te, chhangdah te nên;

³⁷rangkachak hlîr hlaka siam khâwnvâr dahna te, a khâwnvâr, khâwnvâr dah tûr te, a hmanrua zawng zawng leh chhit ên atân a hriak nên;

³⁸rangkachak maichâm te, hriak thih mi te, hâl tûr rimtui tak te, puan in kawngkaa zâr tûr puanzâr te nên;

³⁹dâr maichâm te, a dâr lên te, a zâwnfung te, a hmanrua zawng zawng te, maihûn leh a hûnchhan te nên;

⁴⁰biakbûk hung chhûng kawtlaia puanzâr te, a ban te, a ban nghahchhan ker kuak te, a hung chhûng kawngkaa puanzâr te, a hrui te, a kilh behna te, inbiakna puan in biakbûk chhûnga a hmanraw thil zawng zawng nên;

⁴¹hmun thianghlima rawngbâwlna tûra silhfên mawi taka tah te, puithiam Arona leh a fapaten puithiam hna an thawh huna an hâk tûr silhfên thianghlimte nên.

⁴²LALPAN ti tûra Mosia thu a pêk ang zawng zawng chu Israela thlahte chuan an ti vek a.

⁴³Tin, Mosian chûng hnathawh zawng zawng chu a han en a, ngai teh, an lo zo vek tawh a; LALPA thupêk ang takin an zo vek a ni. Tichuan, Mosian anni chu mal a sâwm a.