Read Mizo_Old_version Exodus 4 Bible Online

Exodus 4 - Mizo_Old_version bible

Exodus 4

¹Tin, Mosia chuan, “Ngai teh, mi ring duhin ka thu an pawm lo vang; ‘LALPA chu i hnênah a inlâr ngût lo vang e,’ an ti mai âwm si a,” tiin a chhâng a.

²Tin, LALPA chuan a hnênah, “I kuta mi kha eng nge ni?” a ti a. Ani chuan, “Tiang,” a ti a.

³Tin, ani chuan, “Leiah khân han paih teh,” a ti a. Tin, leiah chuan a han paih a, rûlah a lo chang ta a; tin, Mosia chuan a tlânsan ta a.

⁴Tin, LALPA chuan Mosia hnênah, “I kut khân han ban la, a meiah han la teh (Tin, a kut chuan a han ban a, a han la a, a kutah chuan tiangah a lo chang leh ta a),

⁵LALPA, an thlahtute Pathian, Abrahama Pathian, Isaaka Pathian leh Jakoba Pathian chu i hnênah a rawn inlâr ngei a ni tih an rin theihna tûrin,” a ti a.

⁶Tin, LALPA chuan a hnênah, “I kut khân i âwm zuk zen teh,” a ti leh a. Tin, a âwm chu a zuk zen a; tin, a han phawrh chhuah leh chuan, ngai teh, a kut chu vûr anga vârin a lo phâr ta a.

⁷Tin, ani chuan, “I kut khân i âwm zuk zen leh teh (Tin, a âwm chu a zuk zen leh a; a âwm ata a han phawrh chhuah chuan, ngai teh, a tisa dang ang bawk chuan a lo awm leh ta a).

⁸Tin, heti hi a ni ang a, an rin duh loh chea, chhinchhiahna hmasa zâwk chu an pawm duh loh chuan, chhinchhiahna hnuhnûng zâwk tal chu an ring ang.

⁹Tin, heti hi a ni ang a, chûng chhinchhiahna pahnih ngei pawh an rin lohva, i thusawi pawh chu an pawm loh chhuan, lui tui i zuk thâl ang a, lei chârah i bun ang a; tin, lui ata tui i zuk thâl chu lei chârah chuan thisenah a lo chang dâwn nia,” a ti a.

¹⁰Tin, Mosia chuan LALPA hnênah, “Aw LALPA, kei zawng tûn hma lamahte leh i chhiahhlawh hnêna thu i rawn sawi hnuah pawh hian, mi ṭawnghmang thiam ka ni ve ngai lo a ni; mi ṭawng ban leh mi ṭawng mawh ka ni si a,” a ti a.

¹¹Tin, LALPA chuan a hnênah, “Mihring kâ hi tu siam nge ni a, ṭawngtheilo te, bengngawng te, mitvâr te, mitdel te pawh hi tu tih nge ni? Kei LALPA hian a ni lo vem ni?

¹²Chuvângin, kal mai rawh, i kâ chu keiman ka awmpui zêl ang a, i sawi tûr chu ka hrilh zêl ang che,” a ti a.

¹³“Ni lo ve, LALPA, mi dang tîr zâwk ta mai che,” a ti a.

¹⁴Tichuan, LALPA chu Mosia chungah a thinur ta a, a hnênah, “I unaupa Arona, Levia chi chu a awm lâwm ni? Ani zawngin ṭawnghmang a thiam tih ka hria a ni. Ngai teh, nangmah hmuak tûrin a lo kal nghe nghe asin. Tin, a hmuh che zawngin a thinlung chu a lâwm hle mai ang.

¹⁵Chutichuan, nangin amah chu bia langin, thute chu fah vek ang che; tichuan, i kâ leh a kâ chu keiman ka awmpui zêl ang a, in tih tûr chu ka hrilh zêl ang che u.

¹⁶Tin, ani chu mipui hnêna i thu sawi chhâwngtu a ni ang; tin, heti hi a ni ang a, i tân kâ a ni ang a, nang chu a tân Pathian ang i ni ang.

¹⁷Tin, nangin he tiang hi i keng ang a, chu chuan thil makte chu i ti ang,” a ti a.

¹⁸Tin, Mosia chu a kal a, a pu Jethroa hnênah a kîr leh ta a; tin, a hnênah, “Aigupta rama ka unau awmte chu an la dam emaw, an hnênah khawngaih takin ka va hâwng rih ang e,” a ti a. Tin, Jethroa chuan Mosia hnênah, “Thlamuang takin kal ta che le,” a ti a.

¹⁹Tin, LALPA chuan Midian ramah Mosia hnênah chuan, “Kal la, Aigupta ramah chuan va kîr leh tawh rawh le; nangmah tihhlum tumtute kha an thi vek tawh e,” a ti a.

²⁰Tin, Mosia chuan a nupui leh a fapate chu a hruai a, sabengtung chungah a chuantîr a; tin, Aigupta ramah chuan a kîr leh ta a. Tin, Mosian Pathian tiang chu a keng a.

²¹Tin, LALPA chuan Mosia hnênah, “Aigupta ram i thlen hun chuan, i kuta thil mak zawng zawng ka kentîr che hi Pharaoa hmaah chuan ti ngei ngei ang che; nimahsela, a thinlung ka tikhauh vang a; tichuan, mite chu a chhuahtîr phal lo vang.

²²Tin, nangin Pharaoa hnênah chuan, ‘LALPAN, “Israela hi ka fapa, ka fa tîr a ni e.

²³Tichuan, ka fapa chuan ka rawng a bâwl theih nân chhuahtîr rawh khai, ka ti a; tin, i chhuahtîr phal lo vei a, i fapa, i fa tîr chu ka tihlum ang,” a ti e,’ ti ang che,” a ti a.

²⁴Tin, heti hi a ni a, kalkawnga riahhmunah chuan LALPAN Mosia chu a zuk tlawh a, tihhlum a tum ta a.

²⁵Tin, Zipori chuan meilung a la a, a fapaa serh vun chu a tan a, Mosia ke a tawhtîr a; tichuan, “Ka tân pasal thisen chhuah hmang i lo nih hi le,” a ti a.

²⁶Chutichuan, “Serh tan avângin pasal thisen chhuah hmang i lo nih hi,” a ti a.

²⁷Tin, LALPAN Arona hnênah, “Mosia hmuak tûrin thlalêrah va kal rawh,” a ti a. Tin, a kal ta a, Pathian tlângah chuan a va hmu a, a fâwp a.

²⁸Tin, Mosia chuan LALPAN a tirh thu zawng zawng leh thil mak a tihtîr tûr zawng zawng chu Arona a hrilh vek a.

²⁹Tin, Mosia leh Arona chuan Israela thlahte upaho zawng zawng chu an ko khâwm vek a.

³⁰Tin, LALPAN Mosia hnêna a sawi zawng zawng kha Arona chuan a sawi chhâwng leh vek a; tin, mipuite hmuhah chuan thil makte chu a ti a.

³¹Tin, mite chuan an awih ta a; tin, LALPAN Israela thlahte chu a zuk kan a, an hrehawmziate a zuk hmu ta a ni tih an hriatin an lu an kûn a, chibai an bûk ta a.