Read Mizo_Old_version Exodus 40 Bible Online

Exodus 40 - Mizo_Old_version bible

Exodus 40

¹Tin, LALPAN Mosia hnênah,

²“A thla khatna ni khat niah chuan inbiakna puan in biakbûk chu i din tûr a ni.

³A chhûngah chuan thuhriattîrna bâwm i dah tûr a ni a, bâwm chu puanzârin i daidang tûr a ni.

⁴Dawhkân kha la lûtin, a chunga thil awmte chu i dah fel tûr a ni; khâwnvâr dahna kha la lûtin, a khâwnvârte chu i dah tûr a ni.

⁵Rimtui hâlna rangkachak maichâm kha thuhriattîrna bâwm hmaa dahin, biakbûk kawngka puanzâr kha i zâr tûr a ni.

⁶Tin, hâlrala thilhlanna maichâm kha inbiakna puan in biakbûk kawngka bulah i hûng tûr a ni.

⁷Tin, inbiakna puan in leh maichâm inkârah chuan maihûn hûngin, chutah chuan tui i dah tûr a ni.

⁸Tin, biakbûk vêl chuan a hung chhûng kawtlai siamin, a hung chhûng kawtlai kawngka puanzâr chu i zâr tûr a ni.

⁹“Tin, hriak thih mi lain, biakbûk leh a chhûnga awm zawng zawngte chu hnawihin, i tithianghlim tûr a ni, a bungbêl zawng zawngte nên; tichuan, a lo thianghlim ang.

¹⁰Tin, hâlrala thilhlanna maichâm leh a hmanrua zawng zawngte chu hriak hnawihin, maichâm chu i tithianghlim tûr a ni; tichuan, maichâm chu thianghlim tak a lo ni ang.

¹¹Tin, maihûn leh a hûnchhan chu hriak hnawihin i tithianghlim tûr a ni.

¹²“Tin, Arona leh a fapate chu inbiakna puan in kawngka bula rawn hruaiin tuiin i sil tûr a ni.

¹³Arona chu silhfên thianghlimte chu i sintîr tûr a ni; tichuan, puithiam hna thawka ka tân rawng a bâwl theihna tûra hriak thihin, i tithianghlim tûr a ni.

¹⁴Tin, a fapate pawh rawn hruaiin kawr i haktîr tûr a ni.

¹⁵Puithiam hna thawka ka tân rawng an bâwl theihna tûrin, an pa hriak i thih ang khân anmahni chu hriak i thih tûr a ni; hriak thiha an awm hi, an thlahte thleng pawha kumkhuaa puithiam tûra ruat an ni reng tawh ang tih, an tân chhinchhiahna a ni ang,” tiin a sawi a.

¹⁶Chutiang chuan Mosian a ti a; LALPAN tih tûra a pêk ang zawng zawng chuan a ti vek a.

¹⁷Tin, heti hi a ni a, a kum hnihna thla tîr ber, chumi thla ni khat ni tak chuan biakbûk chu an din ta a.

¹⁸Tin, Mosia chuan biakbûk chu a han din a, a nghahchhan ker kuakte a han rem a, a ban rem khâwmte chu a han din a, a bangrelte chu a han rawlh a, a bante chu a han tung a.

¹⁹Tin, biakbûk chungah chuan puan in a zâr a, chumi puan in chung chu a khuhnain a khuh leh a, LALPAN Mosia thu a pêk ang khân.

²⁰Thuhriattîrna chu a la a, bâwm chhûngah a dah a, bâwmah chuan a zâwnfungte a rawlh a, bâwm chungah chuan zahngaihna ṭhutphah a dah a.

²¹Tin, bâwm chu biakbûk chhûngah chuan a dah a, a daidanna puanzâr chu a zâr a, thuhriattîrna bâwm chu a daidang ta a, LALPAN Mosia thu a pêk ang khân.

²²Dawhkân chu inbiakna puan in chhûng, biakbûk hmar lampang, puanzâr pâwn lamah chuan a hûng a;

²³dawhkânah chuan LALPA hmaah chhang chu a dah fel diam a, LALPAN Mosia thu a pêk ang khân.

²⁴Khâwnvâr dahna chu inbiakna puan in chhûng biakbûk chhim lampang dawhkân epah chuan a dah a;

²⁵tin, khâwnvârte chu LALPA hmaah chuan a dah a, LALPAN Mosia thu a pêk ang khân.

²⁶Rangkachak maichâm chu inbiakna puan in chhûng puanzâr hmaah chuan a dah a;

²⁷tin, a chungah chuan englo rimtui tak hâl tûr rimtui a hâl a; LALPAN Mosia thu a pêk ang khân.

²⁸Biakbûk kawngka puanzâr a zâr a.

²⁹Tin, inbiakna puan in biakbûk kawngka bulah chuan hâlrala thilhlanna maichâm a hûng a, a chungah chuan hâlral thilhlan leh ei tûr thilhlan a hlân a, LALPAN Mosia thu a pêk ang khân.

³⁰Tin, maihûn chu inbiakna puan in leh maichâm inkârah chuan a hûng a, insilna tûrin tui a chhûng a;

³¹tin, Mosia leh Arona leh a fapate chuan chutah chuan an kut leh an kete an sil a.

³²Inbiakna puan ina an luh dâwn leh maichâm bula an kal dâwnin an insil a ni, LALPAN Mosia thu a pêk ang khân.

³³Tin, biakbûk leh maichâm vêl chuan hung chhûng kawtlai chu a siam a, a hung chhûng kawtlai kawngka puanzâr chu a zâr a. Chutichuan, Mosia chuan hna chu a zo ta a.

³⁴Tichuan, inbiakna puan in chu chhûmin a rawn tuam ta mup a, biakbûk chu LALPA ropuinain a lo khat ta a.

³⁵Tin, chutia chhûm a lo zîn tâk mupa, LALPA ropuinaa biakbûk chu a lo khah tâk avângin, Mosia chu inbiakna puan in chhûngah chuan a lût thei ta lo va.

³⁶Tin, chhûm chuan biakbûk chu a kian chhohsan veleh Israela thlahte chu an insawn zêl a, an kalna tûr lama a kal chhûng zawng chuan.

³⁷Chhûm chuan a kian chhohsan loh erawh chuan a kian chhohsan hma loh zawng insawn lovin an awm reng ṭhîn.

³⁸Chhûnah chuan LALPA chhûm chu biakbûk chungah a zîng a, chutah chuan zânah mei a lo awm ṭhîn a, Israel-ho zawng zawng chuan an kalna tûr lama an kal chhûng zawng chuan chu chu an hmu zêl ṭhîn a ni.