Read Mizo_Old_version Exodus 5 Bible Online

Exodus 5 - Mizo_Old_version bible

Exodus 5

¹Tin, chumi hnuah chuan Mosia leh Arona chu an va kal a, Pharaoa hnênah, “LALPA, Israel-hote Pathianin heti hian a ti, ‘Ka mite hi thlalêrah ka hnênah kût tûrin rawn kaltîr rawh,’ tiin,” an ti a.

²Tin, Pharaoa chuan, “Tu nge maw ni LALPA, a thu ka han zawma, Israel-hote ka han chhuahtîrna tûr chu ni le? LALPA chu ka hre lo ve; Israel-hote lah ka chhuahtîr hek lo vang,” a ti a.

³Tin, anni chuan, “Hebraite Pathianin min rawn tlawh ta mai a. Thlalêr ni thum kalah LALPA kan Pathian hnêna kan va inthawi theihna tûrin, khawngaih takin kan va kal ang e; chuti lo chuan, kan chungah hian hri emaw, khandaih emaw a rawn lêntîr mai dah ang e,” an ti a.

⁴Tin, Aigupta lal chuan an hnênah, “Engtizia nge nangni Mosia leh Arona hi, mipuite hnathawk lai in dâwngdahtîr ni? In hna chu va thawk reng reng tawh u,” a ti a.

⁵Tin, Pharaoa chuan, “Ngai teh u, hemi rama mite hi in lo tam ta hle mai a; tin, nangnin an phurrit phur chu in chawlhtîr mai a,” a ti a.

⁶Tin, chumi ni ngei chuan Pharaoan hnathawk vêngtute leh an hotute hnênah chuan,

⁷“Tûn achinah zawng tûn hma ang khân mite hi leirawhchana siam tûr buhpâwl in pe tûr a ni tawh lo ve, anmahni ngeiin buhpâwl chu thiar khâwm rawh se.

⁸Tin, leirawhchan tûn hmaa an siam zât bawk kha anmahni lakah chuan in phût tûr a ni a; in tihtlêmsak hlek tûr a ni lo ve. An thatchhia a nih hi; chu vâng chuan alâwm, ‘Kan Pathian hnênah kan va inthawi ang e,’ an tih ni.

⁹Mite hi hnathawh hautak lehzual tuk rawh u khai, chûng chu thawk sela, dâwt thu mai maite hi ngaisâng suh se,” tiin thu a pe a.

¹⁰Tin, hnathawk vêngtute leh an hotute chu an kal chhuak a, mite hnênah chuan, “Pharaoan, ‘Buhpâwl zawng ka pe dâwn tawh lo a che u,’ a ti a ni.

¹¹Nangmahniin buhpâwl chu in hmuh theih ang ang va thiar khâwm rawh u; in hnathawh hi an tihtlêmsak chuang dâwn hlek lo che u a nia,” an ti a.

¹²Chutichuan, mite chu Aigupta ram chhûng zawng zawngah chuan, buhpâwl aiah buh bul zawng khâwmin an vâk darh chum chum a.

¹³Tin, hnathawk vêngtute chuan, “Tûn hmaa buhpâwl awm lai ang bawk khân, in hnathawh, in ni tin hnathawhte hi thawk zo thuai thuai rawh u,” tiin an tur hmanhmawh chhên ṭhîn a.

¹⁴Tin, Pharaoa hnathawk vêngtute chuan Israela thlahte zînga hotu atâna an ruatte chu an vua a, “Engati nge niminah te leh vawiinah te pawh tûn hma ang bawka leirawhchan siam hi in la zawh loh ni?” tiin an chhâl a.

¹⁵Tichuan, Israela thlahte hotute chu Pharaoa hnênah an va kal a, “I chhiahhlawhte hian engati nge heti taka min tih le?

¹⁶I chhiahhlawhte hi buhpâwl rêng rêng min pe ta lo va, anni chuan, ‘Leirawhchan siam rawh u,’ min ti mai si a. Tin, ngai teh, i chhiahhlawhte hi min vua a; nimahsela, nangma mite ngei thiam loh a ni zâwk a ni,” tiin an mangan thu an va sawi a.

¹⁷Nimahsela, ani chuan, “In thatchhia a ni, in thatchhia a ni! Chu vâng chuan a ni, ‘LALPA hnênah kan va inthawi ang e,’ in tih ni?

¹⁸Chuvângin, kal ula, va thawk rawh u; buhpâwl zawng kan pêk dâwn loh che u hi; amaherawhchu, leirawhchan an tuk zât che u chu in siam rêng rêng tûr a ni,” a ti a.

¹⁹Tin, “In ni tin hnathawh, in leirawhchan siam hi in titlêm chuang hlei lo vang e,” an tih veleh chuan Israela thlahte hotute chuan an chan a chhe êm êm a ni tih an lo inhre ta a.

²⁰Tin, Pharaoa hnên aṭanga an lo chhuak chuan Mosia leh Arona, kawnga lo ding chu an rawn hmu a;

²¹tin, an hnênah, “LALPAN en che u sela, rorêlsak che u rawh se; keimahni min thahna tûra an kuta khandaih kentîrin, Pharaoa mit hmuhah leh a chhiahhlawhteho lakah hian huat min phurhtîr tâk avâng hian,” an ti a.

²²Tichuan, Mosia chuan LALPA lam a hawi a, “Lalpa, engtizia nge he mite hi ṭha lo taka i tih le? Eng vângin nge mi tirh ni?

²³Pharaoa hnêna i hminga thusawi tûra ka kal achinah he mite hi ṭha lo takin a ti a; nang lah chuan i mite hi i la chhanchhuak hauh si lo va,” a ti a.