Read Mizo_Old_version Exodus 8 Bible Online

Exodus 8 - Mizo_Old_version bible

Exodus 8

¹Tin, LALPAN Mosia chu a bia a, a hnênah, “Pharaoa hnênah va lût la, a hnênah, ‘LALPAN, “Ka mite hian ka rawng an bâwl theih nân chhuahtîr rawh.

²I chhuahtîr phal loh zawngin, ngai teh, i ram chin zawng zawng hi chunguin ka hrem ang.

³Tin, lui chu chunguin a khat mur mur ang a, chungute chu i inah hian an lo lût chho vang a, i mutna pindanah te, i khumah te, i chhiahhlawhte in chhûngah te, i mite zîngah te, i thukah te, i chhang hmehna thlêng chhûngah te an awm noh noh vang.

⁴Tichuan, chungute chu nangmah leh i mite leh i chhiahhlawhte chungah chuan an vâk noh noh mai ang,” a ti e,’ ti ang che,” a ti a.

⁵Tin, LALPAN Mosia hnênah, “Arona hnênah, ‘I tiang kha i kutin lui chungah te, luite chungah te leh tui tlinna chungah te lek langin, Aigupta ramah hian chungu rawn lêntîr chiam ang che,’ ti rawh,” a ti a.

⁶Tin, Arona chuan Aigupta ram lui chungahte chuan a kut a han phar a; tichuan, chungu chu an lo chhuak a, Aigupta ram khahin a khat zo ta a.

⁷Tin, mitlâk dawithiamte pawh chuan an dawi hmangin chutiang bawk chuan an han ti ve a, Aigupta ramah chuan chungute chu an han tichhuak ve a.

⁸Chutichuan, Pharaoa chuan Mosia leh Arona chu a kohtîr a, an hnênah, “Ka hnên aṭang leh ka mite hnên aṭanga chungu hi la bo tûrin LALPA hnênah ngên teh u; tichuan, LALPA hnêna an inthawi theihna tûrin mite hi ka chhuahtîr ang e,” a ti a.

⁹Tin, Mosia chuan Pharaoa hnênah, “I hnên aṭang leh i in aṭanga chungute chu tihborala a awma, luiah chauh a awmna tûrin, nangmah leh i chhiahhlawhte leh i mite tân chuan eng tik atân nge ka ngen ang?” a ti a.

¹⁰Tin, ani chuan, “Naktûk atân le,” a ti a. Tin, ani chuan, “I thu ang chuan ni ang hmiang; tichuan, LALPA kan Pathian ang rêng rêng hi tu mah an awm lo tih i hria ang.

¹¹Tin, chungute chuan nangmah leh i inte leh i chhiahhlawhte leh i mite chu an chhuahsan vek ang che u a; luiah chauh an awm tawh ang,” a ti a.

¹²Tin, Mosia leh Arona chu Pharaoa hnên ata an chhuak ta a; tin, Mosia chuan Pharaoa chunga chungu a rawn lêntîr chungchâng thu-ah chuan LALPA hnênah a ngên a.

¹³Tin, LALPA chuan Mosia thu ang chuan a ti a; tin, in chhûnga mite, in hung chhûng kawtlaia mite leh lova mi chungute chu an thi fai ta vek a.

¹⁴Tin, an chhar khâwm a, an dah vûm thûr mai a; tichuan, a ram uihin a lo uih ta a.

¹⁵Nimahsela, Pharaoa chuan engthâwlna a lo awm ta tih a hriat veleh a thinlung a tikhauh va; tichuan, an thu chu a ngaithla duh ta lo va, LALPAN a lo sawi tawh ang khân.

¹⁶Tin, LALPAN Mosia hnênah, “Arona hnênah, ‘I tiang kha lek la, leia vaivut hi vaw rawh, Aigupta ram zawng zawnga vaivut hi thosia a lo chan theih nân,’ ti ang che,” a ti a.

¹⁷Tin, chutiang chuan an han ti a. Arona chuan a tiang chu a kutin a han lek a, leia vaivut chu a han vua a; tin, mihring chungah leh sa chungah chuan thosi a lo awm ta mur mur a; Aigupta ram chhûng zawng zawnga leia vaivut zawng zawng chu thosiah a chang zo ta vek a.

¹⁸Tin, mitlâk dawithiamte chuan an dawi hmangin thosi tihchhuah an han tum ve a; nimahsela, an thei lo. Tin, mihring chungah leh sa chungah chuan thosi chu a awm ta mur mur a.

¹⁹Chutichuan, mitlâk dawithiamte chuan Pharaoa hnênah, “Hei hi Pathian kutzungtang a nih hi,” an ti a; tichuan, Pharaoa thinlung chu tihkhauhvin a awm a, an thu chu a ngaithla duh lo va, LALPAN a lo sawi ang khân.

²⁰Tin, LALPAN Mosia hnênah, “Zîng takah tho la, Pharaoa hmaah va ding ang che; ngai teh, tuiah a lo kal ṭhîn a. Tin, a hnênah, ‘LALPAN, “Ka mite hian ka rawng an bâwl theih nân chhuahtîr rawh.

²¹Chuti lo zawng, ka mite i chhuahtîr phal loh zawngin, ngai teh, i chungah leh i chhiahhlawhte chungah leh, i mite chungah leh i in chhûngahte chuan tho tam tak ka rawn tîr chiam ang a; tichuan, Aigupta mite inte leh an chênna lei zawng zawngte pawh chu tho hlîrin a khat ang.

²²Tin, chumi ni chuan ka mite awmna Gosen ram chu ka tihrang ang, chutah chuan tho rêng rêng a awm ve loh nân; tichuan, lei chungah hian kei hi LALPA chu ka ni tih in lo hre thei ang.

²³Tin, ka mite leh i mite chu ka thliar ang a; naktûkah he chhinchhiahna hi a lo awm ang,” a ti e,’ ti ang che,” a ti a.

²⁴Tin, LALPAN chutiang chuan a ti a; tichuan, Pharaoa inah leh a chhiahhlawhte inah leh, Aigupta ram zawng zawngah chuan tho tam pui mai chu an lût ta chiam a; tho tam tak chuan ram chu a tichhe chiam a.

²⁵Tin, Pharaoa chuan Mosia leh Arona a kohtîr a, an hnênah, “Kal ta ula, he ramah hian in Pathian hnênah chuan va inthawi mai tawh u,” a ti a.

²⁶Tin, Mosia chuan, “Chutiang tih chu a fel hlei nêm, Aigupta miten thiang lo an tihte chuan LALPA kan Pathian hnênah kan inthawi dâwn zuk nia! Ngai teh, Aigupta mite mit hmuhah hian thiang lo an tihte chuan kan inthawi dâwn em ni ang? Lungin min dêng mai dâwn lâwm ni?

²⁷Thlalêr ni thum kalah chuan kan va kal ang a, LALPA kan Pathianin tih tûra min pêk ang angin a hnênah kan va inthawi ang e,” a ti a.

²⁸Tin, Pharaoa chuan, “Thlalêra LALPA in Pathian hnêna in inthawi theihna tûrin ka kaltîr ang che u; amaherawhchu, in kal hla vak tûr a ni lo ve. Mi ngensak ang che,” a ti a.

²⁹Tin, Mosia chuan, “Ngai teh, i hnên aṭang chuan ka chhuak dâwn a ni a, naktûkah hian Pharaoa leh a chhiahhlawhte leh a mite chu tho tam pui hian a chhuahsan theihna tûrin LALPA hnênah ka ngên ang e; amaherawhchu, mite LALPA hnêna an inthawi chu Pharaoa hian phal lovin, tihder leh tawh lul suh se,” a ti a.

³⁰Tin, Mosia chu Pharaoa hnên ata a chhuak a; tichuan, LALPA hnênah a ngên ta a.

³¹Tin, LALPAN Mosia thu ang chuan a ti a; tichuan, Pharaoa hnên ata leh a chhiahhlawhte hnên ata leh a mite hnên ata tho tam pui chu a tikiang ta a, pakhat mah a awm ta lo va.

³²Tin, Pharaoa chuan chumi ṭum pawh chuan a thinlung a tikhauh leh a; tichuan, mite chu a chhuahtîr phal ta lo va.