Read Mizo_Old_version Exodus 9 Bible Online

Exodus 9 - Mizo_Old_version bible

Exodus 9

¹Chutichuan, LALPAN Mosia hnênah, “Pharaoa hnênah va lût la, ‘LALPA, Hebraite Pathianin, “Ka mite hian ka rawng an bâwl theih nân chhuahtîr rawh.

²I chhuahtîr phal lohva, i la hrên reng zawngin,

³ngai teh, phûla i rante chungah chuan LALPA kut a awm dâwn a ni, sakawr chungah te, sabengtung chungah te, sanghâwngsei chungah te, bâwng rual chungah te, berâm rual chungah te chuan hri nasa tak mai a lo lêng ang.

⁴Tin, LALPAN Israel-ho ran leh Aigupta mite ran chu a tihrang ang a; tichuan, Israela thlahte ta chu pakhat mah a thi lo vang,” a ti e,’ tiin hrilh rawh,” a ti a.

⁵Tin, LALPA chuan, “Naktûkah LALPAN he ramah hian chutiang chu a ti dâwn e,” tiin hun a ruat ta a.

⁶Tin, LALPA chuan a tûkah chutiang chuan a ti ta a, Aigupta mite ran zawng zawng chu a thi ta vek a; nimahsela, Israela thlahte ran chu pakhat mah a thi ve lo va.

⁷Tin, Pharaoa chuan mi a tîr a; ngai teh, Israel mite ran chu pakhat mah a lo thi ve lo va. Nimahsela, Pharaoa thinlung chu tihluhlulin a awm a, mite chu a chhuahtîr phal ta lo va.

⁸Tin, LALPAN Mosia leh Arona hnênah, “Rawhtuina meia mi vut va ṭhûm ula, Pharaoa mit hmuhah Mosian vân lamah theh chiam rawh se.

⁹Tin, Aigupta ram zawng zawng chungah hian vut dip takah a lo chang ang a; tin, chu chuan Aigupta ram chhung zawng zawnga mi leh sa chu khawihli a veitîr ṭheuh ang a, a durh leu chiam ang,” a ti a.

¹⁰Tin, rawh tuina meia vut chu an la a, Pharaoa hmaah chuan an va ding a; tin, Mosia chuan vân lamah a han theh chiam a; tichuan, mi tin leh sa tinin khawihli durh leu an lo vei ta vek a.

¹¹Tin, khawihli avâng chuan mitlâk dawithiamte chuan Mosia chu an chelh ta lo va; mitlâk dawithiamte leh Aigupta mi zawng zawngte chuan khawihli chu an vei vek si a.

¹²Tin, LALPAN Pharaoa thinlung chu a tikhauh va; tichuan, an thu chu a ngaithla duh ta lo va, LALPAN Mosia hnêna a sawi tawh ang khân.

¹³Tin, LALPAN Mosia hnênah, “Zîng takah tho la, Pharaoa hmaah va ding la; tin, a hnênah, ‘LALPA, Hebraite Pathianin, “Ka miten ka rawng an bâwl theih nân chhuahtîr rawh.

¹⁴Tûn ṭumah zawng i chungah leh i chhiahhlawhte chungah leh, i mite chungah hian ka hri zawng zawngte hi ka lêntîr dâwn e; tichuan, khawvêl zawng zawngah hian keimah ang rêng rêng hi tu mah an awm lo tih i hria ang.

¹⁵Chuti ni suh sela, ka kut ka thawh ang a, nang leh i mite hi hriin ka hrem ang a, khawvêl ata hi ka tiboral daih tawh tûr che a ni.

¹⁶Nimahsela, hemi avâng ngawt hian ka tungding chia, ka thiltihtheihna entîr tûr che leh khawvêl zawng zawnga ka hming a lo than theih nân.

¹⁷Ka mite lakah hian i la induh cheuvin, i la chhuahtîr lo vang maw?

¹⁸Ngai teh, naktûk hetih hunah hian rial tam pui, Aigupta ram a lo awm tirh ata, tûn thleng pawha la tla ngai lo chu ka tlâktîr ang.

¹⁹Chutichuan, phûla i rante leh i neih apiangte chu khungtîr thuai rawh khai; mi tin leh sa tin phûla awm, ina khung loh tawh phawt chu, rialin a dêng ang a, an thi ang,” a ti e,’ ti rawh,” a ti a.

²⁰Pharaoa chhiahhlawhte zînga LALPA thu pawisa apiang chuan, an chhiahhlawhte leh an rante chu in chhûngah an tlân luhtîr a;

²¹LALPA thu ngaisâng lo apiang chuan, an chhiahhlawhte leh an rante chu phûlah chuan an awmtîr mai a.

²²Tin, LALPA chuan Mosia hnênah, “Vân lamah i kut han lek rawh, Aigupta ram zawng zawngah hian mihring chungah te, sa chungah te, Aigupta ram chhûnga lova thlai tinrêng chungah te chuan rial a lo tlâk nân,” a ti a.

²³Tin, Mosia chuan a tiang chu vân lamah a han lek a; tin, LALPA chuan khawpui ri leh rial a zuk tîr a, leiah chuan meite a lo tla a; tichuan, LALPAN Aigupta ram chungah chuan rial a tlâktîr ta chiam a.

²⁴Chutichuan, rial, mei leh riala inpawlh, nasa êm êm mai, Aigupta ram zawng zawngah chuan, Aigupta hnam lo awm achin chutiang rêng rêng la awm ngai lo chu a lo awm ta a.

²⁵Tin, rial chuan Aigupta ram zawng zawnga phûla awm zawng zawng, mihringte leh sate chu a dêng a; tin, rial chuan lova thlai tinrêngte chu a dêng a, phûla thing tinrêngte chu a titliak vek a.

²⁶Gosen ram, Israela thlahte awmnaah chauh chuan rial a tla ve lo va.

²⁷Tin, Pharaoa chuan Mosia leh Arona chu a kohtîr a, an hnênah, “Tûn ṭum zawng thil ka tisual ta a ni e. LALPA chu mi fel a ni a, kei leh ka mite hi kan sual a ni e.

²⁸LALPA hnênah ngên rawh u, hêng khawpui ri dur durte leh rialte hi a tâwk tawh e; tichuan, ka chhuahtîr ang che u a, in awm tawh lo vang e,” a ti a.

²⁹Tin, Mosian a hnênah, “Khua ata hi ka chhuah veleh LALPA lamah ka kut ka phar ang a, khawpui rite chu a reh ang a, rial pawh a awm tawh hek lo vang; tichuan, lei hi LALPA ta a ni tih i hria ang.

³⁰Nimahsela, nang leh i chhiahhlawhteho hi zawngin, LALPA Pathian hi in la ṭih chuang lo tih ka hria a ni,” a ti a.

³¹Tin, la leh barli chu a dêng chhia a; barli chu a vuih lai mêk a ni a, la chu a rah lai mêk a ni.

³²Nimahsela, buh leh vai buhtun chu a dêng chhe lo, a la ṭo rih loh avângin.

³³Tin, Mosia chu Pharaoa hnên aṭangin khua ata chu a chhuak a, LALPA lamah a kut a phar a; tichuan, khawpui rite leh rial tla chu a lo bâng ta a, lei chungah chuan ruah pawh chu a baw tlâwrh tlâwrh ta lo va.

³⁴Tin, Pharaoa chu ruah leh rial leh khawpui rite chu a bâng ta tih a hriat veleh a sual leh ta sauh va, amah leh a chhiahhlawhte nên an thinlung an tikhauh ta a.

³⁵Tin, Pharaoa thinlung chu tihkhauhvin a awm a; tichuan, Israela thlahte chu a chhuahtîr phal ta lo va, LALPAN Mosia hmanga a lo sawi tawh ang khân.