Read Mizo_Old_version Joba 1 Bible Online

Joba 1 - Mizo_Old_version bible

Joba 1

¹Uz ramah chuan mi pakhat a awm a, a hming chu Joba a ni; chu mi chu mi famkim, mi ngîl tak, Pathian ṭih mi, thil ṭha lo laka insûm thei mi a ni a.

²Tin, fapa pasarih leh fanu pathum a nei a.

³A neihnunzia chu, berâm sângsarih, sanghâwngsei sângthum, bâwngpa tuak zanga, sabengtungpui zanga leh chhiahhlawh tam tak a nei a ni; tichuan, chu mi chu khawchhak fate zîngah chuan mi ropui ber a ni a.

⁴Tin, a fapate chu an inah an hun zêlah ruai inṭheh chhâwkin an kal khâwm ṭhîn a, an farnu pathumte chu an hnêna ei leh in tûrin an sâwm ṭhîn a.

⁵Tin, chutia an ruaiṭhehte an zawh hnuah chuan Joba chuan anmahni a ko va, a thian hlawm a; zîng takah a tho va, an zaa hming kimin hâlral inthawi a hlân a. Joba chuan, “Ka fapate hian thil an lo tisualin Pathian an lo sawichhia a ni mahna,” a ti a ni. Joba chuan hetiang hian a ti ziah ṭhîn a ni.

⁶Tin, Pathian fapate LALPA hmaa an inlan ni a lo awm a, Setana pawh an zîngah a lo tel ve a.

⁷Tichuan, LALPA chuan Setana hnênah chuan, “Khawi lam aṭanga lo kal nge i nih?” a ti a. Tin, Setana chuan LALPA chu a chhâng a, a hnênah, “Leia ka vahvêlna aṭang leh ka chhuk ka chhohna aṭangin,” a ti a.

⁸Tin, LALPA chuan Setana hnênah, “Ka chhiahhlawh Joba hi i ngaihtuah ngai em? Lei chungah hian amah anga famkim, mi ngîl, Pathian ṭih mi, thil ṭha lo laka insûm thei mi tu mah an awm lo asin,” a ti a.

⁹Tichuan, Setana chuan LALPA chu a chhâng a, a hnênah, “Joba chuan chhan awm lovin a ṭih em ni?

¹⁰Amah chu a in nên, a neih zawng zawng nên, kil tinah i hung vêl a ni lâwm ni? A kut hnathawh mal i sâwm a, he ramah hian a lo neinung sâwt êm êm atin a ni.

¹¹Tûnah hian i kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che,” a ti a.

¹²Tin, LALPA chuan Setana hnênah chuan, “Ngai rawh, a neih zawng zawng chu i kutah a awm e; amah tak erawh chu khawih suh ang che,” a ti a. Tichuan, Setana chu LALPA hma ata chu a chhuak ta a.

¹³Ni khat chu a fanu a fapaten an u ber inah chaw an eia uain an in laiin,

¹⁴Joba hnênah chuan zualko a lo tlân a, “Bâwngpate chuan lei an hrût laia sabengtungte an kianga an tlat laiin,

¹⁵Seba miten an rawn bei a, an la a, chhiahhlawhte chu khandaihin an that a, keimah chauh hi hrilh tûr chein ka lo chhuak a ni,” a rawn ti a.

¹⁶A la sawi lai mêk chuan mi dang a lo tlân leh a, “Vân aṭangin Pathian mei a lo tla a, berâmte leh chhiahhlawhte chu a kâng a, a tiral vek mai a, keimah chauh hi hrilh tûr chein ka lo chhuak a ni,” a ti a.

¹⁷A la sawi lai mêk chuan mi dang a lo tlân leh a, “Kaldai-ho pâwl thumah an insiam a, sanghâwngseite chu an rawn bei a, an la vek a; a ni, chhiahhlawhte pawh chu an that a, keimah chauh hi hrilh tûr chein ka lo chhuak a ni,” a ti a.

¹⁸A la sawi lai mêk chuan mi dang a lo tlân leh a, “I fanute leh i fapaten an u ber ina chaw an eia uain an in laiin,

¹⁹ngai teh, thlalêr aṭangin thlipui a lo thawk a, in chu kil liah a rawn nam a, nula leh tlangvâlhote chu a delh a, an thi ta vek mai a; keimah chauh hi hrilh tûr chein ka chhuak a ni,” a ti a.

²⁰Tichuan, Joba chu a tho va, a puan a pawt thlêr a, a lu a ziat kawlh a, leiah a tlu a, Pathian a bia a;

²¹“Ka nu pum ata saruakin ka lo chhuak a, saruak vêkin ka kir leh dâwn a nih hi. LALPAN a pe a, LALPAN a la leh ta a; LALPA hming chu fakin awm rawh se,” a ti a.

²²Hêng zawng zawngah hian Joba chu a sual lo va, Pathian chu a mawhchhiat hek lo.