Read Mizo_Old_version Joba 10 Bible Online

Joba 10 - Mizo_Old_version bible

Joba 10

¹Ka thlain a ning e, ka nun hi; Ka nawmmâkin ka phunnawi dâwn e, Rilru na êm êm chungin ka ṭawng dâwn hi.

²Pathian hnênah heti hian ka ti dâwn: “Mi thiam lo suh, i mi demna mi entîr zâwk rawh.

³Mi hnehchhiaha, i kut hnathawh hmuhsita, Mi suaksual remruat tihên hi ṭha i ti em ni?

⁴Tisa mitte chu i nei vein Mihring hmuh angin i hmu em ni?

⁵I nite chu mihring nite ang em ni? I kumte pawh mihring kumte ang em nia,

⁶Ka khawlohnate i chhui tehchiama, Ka sualna pawh i zawn tehchiam ni?

⁷Mi suaksual ka ni lo tih i hria, I kut ata chhanchhuak tûr lah chu an awm lo.

⁸“I kutin mi din a, mi siam a, kim biaiin; Mahse, nangin mi tiboral a.

⁹Nangin hlum angin mi siam tih hre reng teh aw; Vaivutah mi chantîr leh dâwn em ni?

¹⁰Nangin hnutetui angin mi leih chhuakin, Hnutekhal angin mi hlâwm a ni lâwm ni?

¹¹Vun leh tisain mi tuam a, Ruh leh thatein mi phuar khâwm a.

¹²Nangin nunna leh duhsakna mi pe a, I mi enkawlna chuan ka thlarau a zuah a.

¹³Mahse, hêng hi i thinlungan i lo thup a, Nangmahah hei hi a awm tih ka hria.

¹⁴Lo sual ila, nangin mi chhinchhiah ang a, Ka khawlohna ata mi tichhuak lo vang.

¹⁵Mi suaksual lo ni ta ila, ka chung a pik ang; Mi fel ni ila, ka inluling lo vang; Mualpho let dêr chungin leh ka hrehawm enin.

¹⁶Lo indah sâng ila, nangin sakeibaknei pêlin mi pêl a, Ka chungah mak takin i inentîr leh a.

¹⁷Ka chungah i thu i tharthawh a, Ka chungah i thinur i tipung a, A hlawp hlawpin mi bei a.

¹⁸“Eng vânga chhûl ata mi la chhuak nge i nih? Tu ma hmuh hmain lo thi tawh ila,

¹⁹Awm lo ang mai ka lo ni ang a, Chhûl ata thlâna lâk ka lo ni mai tûr.

²⁰Ka nite hi rei lo tê a ni lâwm ni? Châwl se, mi ngawihsan se, thâw han la hlek teh ila.

²¹Kîr tawh lohna tûr hmuna ka kal hma hian, Thimna leh thihna daihlim ramah chuan,

²²Thim chhah mup ram, thim tak mai chu. Thihna daihlim, kawngzâwng awm lo, Êng pawh thim a nihna hmunah chuan.”