Read Mizo_Old_version Joba 12 Bible Online

Joba 12 - Mizo_Old_version bible

Joba 12

¹Tichuan, Joba chuan a chhâng a, heti hian a ti a:

²A ni ngei mai, mi fing zawng in lo nih hi, In rualin finna a thi ang.

³Mahse, nangni angin hriatna ka nei ve bawk, In lakah ka neu bîk lo ve, A ni, tu nge thil hetiang hi hre lo awm?

⁴Ṭhiante nuihzatbûr ka ni, Kei, Pathian kova, a chhâna ngei hi Mi fel, mi famkim si, nuihzatbûr ka ni.

⁵Mi nuamsa rilruah chuan vânduai hmuhsitna a awm; Rahbi tleute a châng reng a ni.

⁶Suamhmang puan in a hmuingîl a, Pathian tithinurtute an him a, An kuta an pathian rawn kengtute chu.

⁷Rante pawh zâwt teh khai, an zirtîr ang che, Chunglêng savate pawh zâwt la, an hrilh ang che;

⁸Lei pawh bia la, a zirtîr ang che, Luipui sanghate chuan i hnênah an puang ang.

⁹Hêng thil zawng zawngah hian tu nge hre lo awm, LALPA kut chuan hei hi a ti a ni tih hi?

¹⁰A kutah thil nung tin nunna leh Mihring chi zawng zawng thlarau a awm.

¹¹Bengin thu a chian lo vem ni, Kâin ei tûr a tem ang hian?

¹²Upa hnênah finna a awm a, Khuareiah hriat thiamna.

¹³A hnênah finna leh chakna a awm a, Remhriatna leh hriat thiamna a nei a.

¹⁴Ngai rawh, a ṭhiat a, sak leh rual a ni lo, Mi a khâr hnan a, hawn rual a ni lo.

¹⁵Ngai rawh, tuite chu a chelh a, an lo kang a, A rawn tîr chhuak leh a, leilung an tuam.

¹⁶A hnênah chakna leh finna a awm a, Bum leh bumtu a ta an ni.

¹⁷Remruattute ruakin a hruai bo va, Rorêltute a tiâ a.

¹⁸Lalte phuarna chu a phelh a, An kâwng chu kâwnghrênin a hrêng a.

¹⁹Puithiamte ruakin a hruai bo va, Mi chakte a titlu a.

²⁰Mî rinte thusawi a sawn a, Upate hriatna a la bo.

²¹Mi liante chungah hmuhsitna a leihbua a, Mi chakte taihrên a phelhsak a.

²²Thim ata thil thûkte a dap chhuak a, Thihna hlim chu êngah a la chhuak.

²³Hnamte chu a tipung a, a tiral a, Hnamte chu a tilian a, a hruai bo va.

²⁴Lei mipui hotute thinlung a la bo va, Thlalêr kawng awm lohnaah a vahvaihtîr a.

²⁵Êng awm lovin thimah an dap a, Zu rui angin a paitîr a.