Read Mizo_Old_version Joba 13 Bible Online

Joba 13 - Mizo_Old_version bible

Joba 13

¹En ta che u, hêng zawng zawng hi ka mitin a hmu a, Ka bengin a hria a, a hre thiam a ni.

²In hriat chu ka hre ve bawk e, In lakah ka neu bîk lo ve.

³Mahse, Engkimtitheia hnênah chuan sawi ngei ka duh a, Pathian nêna ngaihtuah dun ka châk a ni.

⁴Nangni, dâwt phuahchawptu in ni a, In zain dâktawr hlu lo in ni e.

⁵Ngawi hmiah mai teh ula aw! Fin in hlawh zâwk tûr.

⁶Ka ngaihtuah dân ngaithla ula, Ka dîlna kamchhuak bengkhawn rawh u.

⁷Pathian tân khawlo takin in ṭawng ang maw? A tân dâwtin in ṭawng ang maw?

⁸Amah ṭanin hleih in neih ang maw? Pathian tân in pâwng ṭan dâwn em ni?

⁹Zawng chhuak che u sela, a ṭha dâwn em ni? Miin mihring a bum angin amah in bum dâwn em ni?

¹⁰A rûka hleih in neih chuan A zilhhau ngei ang che u.

¹¹A ropuina chuan a tihlau lo vang che u maw? A ṭihbaiawmna chu in chungah a tla lo vang maw?

¹²In upa thute chu thufing vaivut mai a ni a, In invênnate chu invênna hlum mai a ni.

¹³Ka ṭawng theih nân lo ngawi teh u, Ka chungah eng pawh lo thleng ang hmiang.

¹⁴Ka tisa hi ka hâin ka pet ang a, Ka nun hi ka kutah ka dah em ni ang?

¹⁵Mi tihlum hial mah sela, amah chu ka nghâk cheu vang; Mahse, a hmaah ka kawng chu ka ṭan ang.

¹⁶Hei hi ka chhandamna a ni a, A hmaah Pathian hre lo mi an lo kal dâwn loh hi.

¹⁷Ka sawi hi ngun takin ngai ula, Ka puan chhuah hi in bengah lût rawh se.

¹⁸Ngai teh u, ka thu ka rem fel tawh a, Thiam ka chang ang tih ka hria.

¹⁹Tu nge mi hnialtu tûr awm? Tichuan, ka ngawi ang a, thlarau ka thlah mai ang.

²⁰Ka chungah thil pahnih hi ti lo phawt la; Tichuan, i hmêl lakah ka inthup lo vang:

²¹Ka hnên ata i kut la kîr daih la, I ṭihbaiawmna hian mi tihlau suh se.

²²Tichuan, mi ko la, ka chhâng ang che, A nih loh leh, kei ṭawng ila, mi chhâng thung ang che.

²³Ka khawlohna leh sualnate engtia tam nge ni? Ka bawhchhiatna leh ka sualna mi hriattîr rawh.

²⁴Engah nge i hmêl i thupa, I hmêlmaa mi ngaih le?

²⁵Hnahthel lêng chu i chhaih buai dâwn em ni? Buhpâwl ro chu i ûm dâwn em ni?

²⁶Ka chungah na takin i ziak a, Ka tleirâwl lai khawlohnate mi phurhtîr a.

²⁷Ka keah kawl mi buntîr a, Ka kawng zawng zawng i chhinchhiah a, Ka kephah hualin ramri i kham a,

²⁸Thil mawih ṭawih ral mai ang leh, Silhfên thîm ei ang lek ka ni chung hian.