Read Mizo_Old_version Joba 15 Bible Online

Joba 15 - Mizo_Old_version bible

Joba 15

¹Tichuan, Elifaza, Temani mi chuan a chhâng a, heti hian a ti a:

²Mi fingin hriatna lothlâwn hmangin a chhângin, Khawchhak thliin a pum a tipuar ang em ni?

³Ṭawng tlâktlailo hmangin emaw, Thusawi ṭhatna nei lo hmangin emaw a sawi dâwn em ni?

⁴A ni, ṭihna chu i tibo va, Pathian hmaa inhlanna i tineu va ni.

⁵I khawlohna chuan i kâ a thunun a, Fin vervêk ṭawng i thlang a nih hi.

⁶Kei ni lovin, nangma ṭawngkam ngeiin a thiam lo che a, A ni, i hmui ngeiin a hêk che a ni.

⁷Piang hmasa ber i ni em ni? A nih loh leh, tlângte awm hmain i piang tawh em ni?

⁸Pathian thurûk chu i hria em ni? Nangma tân chauh finna i khûrkhung em ni?

⁹Kan hriat loh eng nge i hriat bîk? Kan hriat thiam loh eng nge i hriat thiam bik?

¹⁰Kan hnênah hian lûa kêlsam ṭo tawhte leh upa takte, I pa aia upa daihte an awm a ni.

¹¹I tân Pathian ṭawng thlamuanna hi a neu lutuk em ni? Nêm taka a tihna thu che hi?

¹²Engah nge i thinlungin a hruai bo che? Engtizia nge i men tâl tawp tawp ni?

¹³Pathian chungah thaw i sang a, I kâa chutiang thu a chhuah kha?

¹⁴Thianghlim tûr chuan mihring hi eng nge a nih? Fel tûr chuan hmeichhe hrin hi eng nge a nih?

¹⁵Ngai teh, a mi thianghlimte chungah rinna a nghat lo va, A ni, a mit hmuhah chuan vân pawh a fai lo.

¹⁶Mi tenawm leh bawlhhlawh sa, Khawlohna, tui ina in chu a va ni lo lehzual dâwn êm!

¹⁷Mi ngaithla la, ka entîr ang che, Ka hmuh chu ka puang dâwn e

¹⁸(Mi fingten an hril ṭhina chu, An pi puten an thup loh,

¹⁹Anmahni chauh ram an lo pêk, Mi dang tu mah tel lohna chu):

²⁰Mi suaksual chuan a dam chhûng zawng nâ a tuar a, Hnehchhiahtu tâna kum tuk zâtte pawh chu.

²¹Hlauhawm thâwmte chu a bengin a hria a, A hmuingîl laiin rawktuin a rawn bei a.

²²Thim ata chhuah a inring lo va, A hmabâk chu khandaih a ni.

²³Ei tûr zawngin a vâkvai a, “Khaw nge?” tiin, Thimna ni chu a kutah ngâ sa a ni tih a hria.

²⁴Hrehawmna leh thawpikna chuan a tihlau va; Lal inpeih sain indona a hneh angin amah an hneh a;

²⁵Pathian chunga a kut a lek leh Engkimtitheia chunga chapo taka a chêt avângin;

²⁶Luhlul takin ama chungah a tlân a, A phaw lai pâwng chhah pui nên chuan;

²⁷A thauvin a hmai a tuam a, A kâwngah thau a chheng a;

²⁸Khawpui ṭiau hnuahte a chêng a, Tu ma luah loh inahte chuan.

²⁹A hausa lo vang a, a sum leh pai chu a awm hlen hek lo vang a, An neihte chu lei lamah an kûr hek lo vang.

³⁰Thim ata a chhuak lo vang a, Meialhin a zârte a hliau ro vang a, A kâa a thawah a kal bo vang.

³¹Mahni inbumin engmahlovah innghat suh se, A hmuh tûr chu engmahlo a ni dâwn si a.

³²A hun hmain a tlingtla ang a, A zâr chu a hring lo vang.

³³Grêp hrui angin a rah hel a sawi ṭîl ang a, Olive thing angin a pâr a thing thla ang.

³⁴Pathian ngaihsak lo pâwlte chu an cha dêr ang a, Thamna puan inte chu meiin a kâng ral ang.

³⁵Pawi khawih an ngaihtuah a, Khawlohna an rawn chhuah a, An pumin bumna a buatsaih a ni.