Read Mizo_Old_version Joba 16 Bible Online

Joba 16 - Mizo_Old_version bible

Joba 16

¹Tin, Joba chuan a chhâng a, heti hian a ti a:

²Chutiang thil chu tam tak ka hria a ni, In zain thlamuantu tuar hrehawm in ni e.

³Thu ruakin tâwp a nei ang em? A nih leh, engin nge chawk tho chia i han chhân ni?

⁴Kei pawh in ṭawng angin ka ṭawng thei a ni; Ka nih ang hi ni ula chuan, In chungah thu ka zawm khâwm chiam thei ang a, Lu ka thin khum thei ang che u.

⁵Mahse, ka kâ chuan ka tichak ang che u a, Ka hmuia thlamuanna thuin a tinuam ang che u.

⁶Sawi mah ila, ka lungngaihna a dai lo va, Ngawi mah ila, eng nge ka nawm chuanna?

⁷Mahse, Aman mi tichau va, Ka pâwlpuite zawng zawng chu i tiṭiau va.

⁸Nangin mi chelh bet a, chu chu ka chunga hretu a ni a, Ka chêrna hian mi hêk a. Chu chu ka hmaichhana hriattîrtu a ni.

⁹A thinurin mi tai thlêr a, mi tiduhdah a, Ka chungah a ha a ṭhial a, Ka khingpuiin ka chungah a mit a lên a.

¹⁰Ka chungah an kâ an âng a, Dichim takin biangah mi bêng a, Ka chungah an inhâwr khâwm a.

¹¹Pathian ngaihsak lo kutah mi hlân a, Mi suaksualte kutah chuan mi theh lût a.

¹²Nuamsa takin ka awm a, aman mi phel darh a, A ni, ka ringah mi la a, mi pawt sawm a; A tin tûr atân mi târ bawk a.

¹³A thal kâptute chuan mi hual vêl a, Ka kalte chu a ṭhen darh a, a dîm lo, Lei chungah ka mît a leih bua a.

¹⁴Chhiatna chunga chhiatnain mi tichhia a, Mi hrâng angin ka chungah a lo thawk a.

¹⁵Ka vun chungah saiip puan ka bel a, Ka ki chu vaivutah ka tâl a.

¹⁶Ṭah vângin ka hmêl a sen a, Ka mit vunah thihna hlim a awm;

¹⁷Ka kutah pâwngnêkna a awm lo va, Ka ṭawngṭaina a thianghlim chung pawhin.

¹⁸Aw leilung, ka thisen chu khuh bo suh la, Ka ṭah hian chawlh hmun nei suh se.

¹⁹Tûnah pawh, ngai rawh, ka thuhretu vânah a awm a ni e, Mi hriatpuitu chu vân sângah a awm.

²⁰Ka ṭhiante chuan mi nuihsan a; Mahse, Pathian hnênah ka mittui a sûr a.

²¹Pathian hnênah miin mihring hi ṭan teh sela aw, Mihring fapain a ṭhenawm a ṭan ang hian!

²²Kum rei lo tê a lo ral hunah Ka kîr leh lohna tûr kawng chu ka zawh dâwn si a.