Read Mizo_Old_version Joba 18 Bible Online

Joba 18 - Mizo_Old_version bible

Joba 18

¹Tichuan, Bildada, Suhi mi chuan a chhâng a, heti hian a ti a:

²Eng chen nge thu remchâng in dap dâwn? Ngaihtuah ula, chumi hnuah kan sawi ang.

³Eng tizia nge ran anga ngaih kan niha, I mit hmuha tenawm kan nih?

⁴Nang, mahni thinurnaa intai thlêrtu, Nangmah avângin lei kalsan a ni dâwn em ni? Lungpui pawh a hmun ata sawn a ni dâwn em ni?

⁵A ni, mi suaksual êng chu tihmih a ni ang a, A mei sî pawh a de lo vang.

⁶A puan ina êng chu a thim ang a, A kianga khâwnvâr chu tihmih a ni ang.

⁷A ke pên chakna chu a chêp ang a, Ama remruat ngeiin a paih thla ang.

⁸Ama ke ngeiin lênah a paih lût a, Hum chungah a kal a.

⁹A kerêkah thangin a hlîng ang a, Ani chu thangin a man ang.

¹⁰A tân leiah valh phûm a ni a, Kawngah a tân thang kam a ni.

¹¹Kil tinah hlauhawmin a tihlau vang a, A hnungah chuan a ûm zêl ang.

¹²A chakna a ṭâmchhâwl ang a, A kiangah chhiatna a inpeih reng.

¹³A taksa bung hrangte a ei zo vang a, Thihna fa tîrin a bung hrangte a ei zo vang.

¹⁴A rin pui puan in ata chu kar phawh a ni ang a, Hlauhawmho lal hnênah hruai a ni ang.

¹⁵A mi ni ngai lo a puan inah an chêng ang a, A chênnaah kât theh darh a ni ang.

¹⁶Chhûngrilah a zung a mawih ang a, Chung lamah a zâr a vuai bawk ang.

¹⁷Lei ata a hriat rengna a boral ang a, Kawtthlêrah hming a nei tawh lo vang.

¹⁸Êng ata thimah len luh a ni ang a, Khawvêl ata ûm chhuah a ni ang.

¹⁹A mite zîngah tu leh fa a nei lo vang a, A chênnaah châmbâng tûr a nei hek lâwng.

²⁰Thlang lama miten ani hi mak an ti ang a, Chhak lama mite an thlabâr ang.

²¹Mi fel lo chênna zawng chutiang chu a ni ngei a, Chu chu Pathian hre lotu hmun a ni e.