Read Mizo_Old_version Joba 2 Bible Online

Joba 2 - Mizo_Old_version bible

Joba 2

¹Pathian fapate LALPA hmaa an inlan ni a lo awm leh a, Setana pawh LALPA hmaa inlan tûrin an zîngah a lo kal ve a.

²Tin, LALPA chuan Setana hnênah, “Khawi lam aṭanga lo kal nge i nih?” a ti a. Tin, Setana chuan LALPA chu a chhâng a, “Leia ka vah vêlna aṭang leh ka chhuk ka chhohna aṭangin,” a ti a.

³Tin, LALPA chuan Setana hnênah chuan, “Ka chhiahhlawh Joba hi i ngaihtuah ngai em? Amah anga mi famkim, mi ngîl, Pathian ṭih mi, thil ṭha lo laka insûm thei mi hi leiah tu mah an awm lo asin. Chhan awm lova mi tihchhiattîr chung pawhin a ngai reng a la ni,” a ti a.

⁴Tin, Setana chuan LALPA chu a chhâng a, “Vun aiah vun tih a ni a. A ni, miin a neih zawng zawng a nunna atân a pe phal ang chu!

⁵Tûnah i kut thawh la, a ruh leh a tisa ngei khawihsak teh, i hmaichhan ngeiah a sawichhe mai ang che,” a ti a.

⁶Tin, LALPA chuan Setana hnênah, “Ngai rawh, i kutah a awm e, a nunna erawh chu zuah ang che,” a ti a.

⁷Chutichuan, Setana chu LALPA hma ata chu a chhuak a, Joba chu a kephah hnuai aṭangin a lu thlengin pânchhia a veitîr a.

⁸A inhiah nân lampei a la a, vut zîngah a ṭhu a.

⁹Tichuan, a nupui chuan a hnênah, “I ngai rengin em ni i awm dâwn? Pathian chu sawichhia la, thi la a ni mai,” a ti a.

¹⁰Mahse, ani chuan a hnênah, “Nang hi hmeichhe â ṭawngin i ṭawng a nih hi. Eng nge, Pathian hnên ata thil ṭha kan hmu a, thil ṭha lo pawh kan hmu lo vang em ni?” a ti a. Hêng zawng zawngah hian Joba chuan thu sual a sawi lo.

¹¹Tin, Joba ṭhian pathumte chuan hêng thil ṭha lo a chunga lo thleng zawng zawng hi an hriat chuan, mahni hmun ṭheuh aṭangin an lo kal a; Elifaza, Temani mi leh Bildada, Suhi mi leh Zofara, Naamathi mite chu. Amah tuarpui tûr leh thlamuan tûra a hnêna lo kal hun an ruat tlâng a.

¹²Hla deuh aṭanga an han en chuan an hre lo va, an râwl an chhuah a, an ṭap a; an puante an pawt thlêr a, an lu chungah vaivut an vânvawrh a.

¹³Chutichuan, ni sarih leh zan sarih leiah an ṭhutpui a, tu mahin a hnênah thu kam khat mah an sawi lo; a natna chu na êmin an hria a ni.