Read Mizo_Old_version Joba 20 Bible Online

Joba 20 - Mizo_Old_version bible

Joba 20

¹Tin, Zofara, Naamathi mi chuan a chhâng a, heti hian a ti a:

²Hei vâng hian ka ngaihtuahnate chuan chhânna mi siam a, Ka chhûnga hmanhmawhna a awm avâng hian.

³Zilhna mi tizaktu chu ka hre ta a, Ka hriat thiamna rilru chuan mi chhâng a ni.

⁴Hmasâng ata leia mihring awm achin, Hei hi i hre lo vem ni?

⁵Mi suaksual hlimna chu a tawi a, Pathian hre lo mi lâwmna chu Mit khap kâr chauh a ni, tih hi?

⁶A ropuina chuan vânte thleng chhovin, A lû chuan chhûmte tawng mah se,

⁷Ama zun êk angin a boral vang vang ang; Amah hmu tawhte chuan, “Khawiah nge a awm tâk?” an ti ang.

⁸Mumang ang maiin a thlâwk bo vang a, Hmuh a ni lo vang; A ni, zân inlârna anga ûm bo a ni ang.

⁹Amah hmu ṭhîn mit khân a hmu tawh ngai lo vang a, A hmun pawhin a hmu ngai tawh hek lo vang.

¹⁰A faten mi retheite khawngaihna an dîl ang a, A kutin a sum leh pai chu a theh kîr ang.

¹¹A ruhte chu a tleirâwl sualnain a khat a; Mahse, vaivutah a mutpui ang.

¹²Suahsualna hi a kâah thlum mah se, A lei hnuaiah thukru mah se,

¹³Zuat hliauvin thlah phal lo mah se, A kam chhûngah hmuam reng zâwk mah sela,

¹⁴A pum chhûngah a lo danglam a, A chhûngah rûl tûr kha tak a ni ta a.

¹⁵Hausaknate chu a lem a, a law chhuak leh a, Pathianin a pum ata a paih chhuak a.

¹⁶Rûl chu a fâwp ang a, Rûlrial tûr chuan amah a that ang.

¹⁷Luipuite chu a thlîr lo vang a, Khawizû leh bâwnghnutekhala luang luite chu.

¹⁸A thawh chhuah chu a theh kîr ang a, Hrawk tlai nân a hmang lo vang; A lâk khâwmte chu a chên lo vang.

¹⁹Retheite chu a hnehchhiahin a hawisan a, In, a sak loh chu, a chhuhsak a.

²⁰A duhâmna chu a kawchhûngah a awm hle hle thei lo va, A lâwmna thilte chu eng mah a hum lo vang.

²¹A ei zawh loh eng mah a awm lo va; Chuvângin, a sum leh pai chuan a tuar lo vang.

²²A hausak vânglai tak chu a chêp hun a ni ang a, Tlachhamte chuan a chungah kut an lên huai huai ang.

²³A pum tipuar tûrin a thinur hlauhawm tak chu A chungah a tîr ang a, A ei atân a chungah a sûrtîr ang.

²⁴Thîr hriamhrei chu a tlân bosan ang a, Dâr thalngul chuan amah a kâp tlang ang.

²⁵A han pawt phawi a, a taksa ata a lo chhuak a, A ni, a hmâwr tle tak chu a mit ata a lo chhuak a, Thil râpthlâk a chungah a thleng a ni.

²⁶A ro atân thim chhah mup khâwl khâwm a ni a, Chhêm loh mei chuan a kâng ral ang a, A puan in ata hnutchhiah awm apiang a tiral ang.

²⁷Vânte chuan a khawlohna an puang ang a, Leiin amah a do vang.

²⁸A ina thil pungte chu an bo vang a, A thinur niah chuan a bungruate an luang ral ang.

²⁹Hei hi Pathian laka mi suaksual chanpual a ni a, Ro luah tûr Pathianin a tân a ruat chu a ni.