Read Mizo_Old_version Joba 21 Bible Online

Joba 21 - Mizo_Old_version bible

Joba 21

¹Tin, Joba chuan a chhâng a, heti hian a ti a:

²Ka thusawi hi ngun takin ngaithla teh u, Hei hi in thlamuanna thu chu ni rawh se.

³Mi ngaichâng ula, ka han sawi phawt ang a, Ka sawi zawhah la nuihsan ang che u.

⁴Keia phunnawina hi mihring chungah em ni? Dawhthei rual ka ni em ni?

⁵Mi en ula, mak ti ula, kutin in kâ hup rawh u.

⁶Ka han ngaihtuahin ka mang a ang a, Hlauhnain ka thauvah mi a man ṭhîn.

⁷Engtizia nge mi suaksualte chu an nuna, An lo upata, a ni, an lo hmuingîl theih ni?

⁸An chi thlahte chu an hnênah an mit hmuhah a tinghet a, An rîla rahte chu an hmai hmaah.

⁹An in lote chu hlauhawm lakah a him a, Pathian tiang chu an chungah a tla hek lo.

¹⁰An bâwngpain chi a thlah a, a pelh ngai lo va, An bâwngpuiin no a nei a, a chhiat ngai lo.

¹¹Ran rual angin an fanaute an chhuahtîr a, An fate chu an tualchai a.

¹²An perhkhuang leh ṭingṭang remin an zai a, An phênglâwng thâwmah an hlim za a.

¹³An nite chu neinung takin an khawh ral a, Seol-ah chuan thlamuang takin an liam a.

¹⁴Tin, Pathian hnênah, “Min kalsan rawh, I kawngte hriat hi kan châk lo ve.

¹⁵Engkimtitheia chu tu nge a nih, a rawng kan bâwlna tûr chu? A hnênah kan ṭawngṭaiin hlâwkna eng nge kan hmuh ang?” an ti a.

¹⁶A! An sum leh pai chu an kuta awm a lo ni lo, Mi suaksualte remruatna chu ka lakah a hla a ni.

¹⁷Mi suaksual meichher chu vawi eng zât meuh nge a miha, Vânduaina an chunga a thlena, A thinurnain Pathianin lungngaihna a pêk hlawm?

¹⁸Vawi eng zât nge buhpâwl, thliin a chhêm ang an niha, Favai, thlipui len bo ang an nih?

¹⁹“Pathianin khawlohna an fate tân a dah,” in ti a, Anmahni chungah thlentîr ang hmiang, an hriat theih nân.

²⁰Anmahni mit ngeiin an chhiatna chu hmu se, Engkimtitheia thinurna chu in ang hmiang.

²¹A bo hnuah a in chu a tân eng nge a nih, A thla zât tihtâwp a nih hun chuan?

²²Pathian tu nge hriatna zirtîr ang, Mi chungnungte pawh rorêlsaktu chu?

²³A vânglai takin mi a thi a, Muang tak leh nuam taka awmin.

²⁴A taksa chu thauvin a khat a, A ruh thlîng pawh a hnâwng a ni.

²⁵Tin, mi dang lungngai takin a thi a, Ṭhatna rêng rêng tem ngai lovin.

²⁶Vaivutah angkhatin an mu a, Changpâtin a bâwm khat hlawm a.

²⁷Ngai teh, in ngaihtuahte zawng ka hria alâwm, Dik lo taka ka chunga in phiarte chu.

²⁸“Khaw nge hotu in chu a awm? Mi suaksual chên kualna puan in chu khaw nge?” in ti a.

²⁹Zin vêl mite in zâwt ngai lo vem ni? An sawite chu in pawm lo vem ni?

³⁰Mi sual chu vânduai niah zuahin a awm a, Thinur niah hruai chhuah an ni, tih hi.

³¹Tu nge a hmai hmaah a kawng chu puang ang a, Tu nge a thiltih chu thungrûl ang?

³²Thlânah kalpui a ni a, A thlân chu vên a ni a.

³³Lei tlang pawhin a delh na lo. Mi zawng zawngin a hnu an chhui a, A hmaa chhiar sên loh lo awm tawhte ang khân.

³⁴Tichuan, engtin nge thu engmahlo takmeuhva mi thlamuan dâwn? In chhânnaah hian dâwt mai lo chu eng mah a awm lo.