Read Mizo_Old_version Joba 22 Bible Online

Joba 22 - Mizo_Old_version bible

Joba 22

¹Tin, Elifaza, Temani mi chuan a chhâng a, heti hian a ti a:

²Mihring hian Pathian tân ṭangkaina a nei em ni? Miin a fin chu a ṭangkaipui ngei tak e.

³Mi fel i nih chu Engkimtitheia tân a hlu em ni? I kawngte i tihfamkim chu a tân a hlâwk em ni?

⁴Amah i ṭih nân em ni a zilh che a, Rorêlnaa a luhpui che?

⁵I suahsualna a nasa a ni lo maw? I khawlohnain tâwp rêng a nei hek lo.

⁶Engmahlovan i unau hnên ata dahkham i phût a, Saruakte chu an silhfên i hlihsak a.

⁷Chaute hnênah tui in tûr i pe lo va, Rilṭâmte tân chaw i ui a.

⁸Tharum thawhin mi ram i la lui a, I duhsakzâwngte i pe a.

⁹Hmeithaite chu ruakin i tîr bo va, Pa nei lote bân chu i titliak a.

¹⁰Chu vâng chuan i vêlin thang a awm a, Hlauhna chuan a tibuai ta thut che a ni.

¹¹I hmuh theih loh thimna leh Tui tam tak chuan a khuh che.

¹²Vân sângah Pathian a awm lo vem ni? Arsi sâng berte en la, an sânzia mai chu.

¹³Pathianin eng nge a hriat? Thim chhah danah a rêl thei em ni?

¹⁴A hmuh loh nân chhûm chhah takin a khuh a, Vân kual chungah chuan a kal vêl a, i ti a.

¹⁵Kawng hlui chu i zawh dâwn em ni? Mi suaksualten an zawh ṭhina kha?

¹⁶Anni chu an hun hmaa lâk bovin an awm a, An innghahna chu lui len bovin a awm a;

¹⁷Pathian hnêna, “Min kiansan rawh, Engkimtitheia chuan eng nge min tih theih?” titute chu.

¹⁸Chuti chungin an inte thil ṭhain a tikhat - Mi suaksualte remruat chu ka lakah a hla a ni.

¹⁹Mi felte chuan an hmu a, an lâwm a, Mi pawi khawih lote chuan anmahni an nuihsan a,

²⁰“Kan chunga lo dingte tihbovin an awm a, A bâng meiin a kâng ral a,” tiin.

²¹Nangmah ngeiin amah tlawn la, remna siam rawh; Tichuan, i tân thil ṭha a lo chhuak ang.

²²A kâa chhuak dân chu dawng ngei teh aw, I thinlungah a thu dah ṭha ang che.

²³Engkimtitheia hnêna i kîr chuan tundin i ni ang a, I puan in ata fel lohna i dah bo daih phawt chuanin.

²⁴I rote chu vaivutah dah la, Ophir rangkachakte chu luite lung zîngah dah rawh.

²⁵Engkimtitheia chu i ro a ni ang a, Tangkarua hlu takte chu i ta a ni ang.

²⁶Tin, Engkimtitheiaah chuan i lâwm tawh ang a, Pathian lam chu i hawi tawh ang.

²⁷A hnênah i ṭawngṭai ang a, a ngaithla ang che; Tin, i thutiamte chu i hlen ang.

²⁸Thil i ruat ang a, i tân a ding nghet ang a; Tin, i kawngte chu êngin a chhun fo vang.

²⁹An paih thlâk che pawhin, “Din chhuahna a awm,” i ti ang a, Mi inngaitlâwm chu a chhandam ang.

³⁰Pawi khawih lo ni lo pawh a chhanchhuak ang a, A ni, i kut thianghlimna azârah chhanchhuahin a awm ang.