Read Mizo_Old_version Joba 23 Bible Online

Joba 23 - Mizo_Old_version bible

Joba 23

¹Tichuan, Joba chuan a chhâng a, heti hian a ti a:

²Vawiin pawh ka vuina hi a nasa e, Ka rûm chung pawhin kut chu a rit a ni.

³Aw, amah ka hmuh theihna tûr lam chu hria ila, A ṭhuthmunah chuan ka kal tûr a!

⁴Ka thu chu a hmaah ka thlen ang a, Ka kâ ṭanfungin a khat ang.

⁵A mi chhânna tûr thute ka hre duh a, Ka hnêna a sawi tûr chu hriat thiam ka duh.

⁶A thiltihtheihna ropui chuan mi khing dâwn em ni? Hnai lo ve, mi bengkhawn zâwk ang.

⁷Tichuan, mi fel chuan a hnênah a ngên ang a, Mi ngaihtuahtu hnên ata chu ka chhuak vang vang ang.

⁸Ngai teh, hma lam ka han pan a, amah a awm si lo, Hnung lam ka han pan a, amah ka hmu thei chuang lo.

⁹Vei lama a thawh lai pawhin ka hmu thei chuang lo va, Ding lamah a nih leh, a biru a, ka hmu thei lo.

¹⁰Ka kawng zawh chu a hria a, Mi fiah hunah rangkachak angin ka chhuak dâwn si.

¹¹Ka ke hian a hniakhnung tak a dai zêl a, A kawng ka zawh a, ka pêng lo ve.

¹²A kamchhuak thupêk chu ka pênsan lo va, A kaa thute chu ka dân aiin ka roh zâwk a.

¹³Mi nghet a ni a, tu nge khawih her thei ang? A duh zâwng chu a ti mai a ni.

¹⁴Ka chana ruat chu a ti a, A rilruah chutiang chu a awm ṭeuh a ni.

¹⁵Chu vâng chuan a hmaah ka buai a, Ka ngaihtuahin amah ka hlau.

¹⁶Pathianin ka thinlung chu a tichau va, Engkimtitheia chuan mi tibuai a.

¹⁷Thimna chuan mi hual vêl a, Thim chhah pui chuan ka hmai a khuh a.