Read Mizo_Old_version Joba 24 Bible Online

Joba 24 - Mizo_Old_version bible

Joba 24

¹Engkimtitheian engah nge hun a ruat loh? Amah hretuten engah nge a nite an hmuh loh?

²Ri sawn chîngte an awm a, Ran rual an man lui a, an vulh a.

³Pa nei lote sabengtung an ûm bosak a, Hmeithai bâwngpa, dahkham atân an lâksak a,

⁴Tlachhamte kawng an botîr a, Leia retheite an biru a.

⁵Ngai teh, thlalêra ramsabengtungte angin, Taima taka ei tûr zawngin an hna an va thawk a, An fate tân thlalêrin chaw a tum a.

⁶An chaw tûr ram ata an ât a, Mi sual grêp huan hmaiṭhelh an vai.

⁷Silhfên lovin zankhuain an mu a, Khaw vâwtah inkhuhna an nei lo.

⁸Tlânga ruahpuiin a nan huh a, Phen tûr nei lovin lungpui an bêl a.

⁹Pa nei lo hnute hne lai pawh thlâksak chîngte an awm a, Retheite hnên ata dahkhamah an la a.

¹⁰Silhfên lovin saruakin an vâkvai a, Rilṭâm chungin buhphalte an pu a;

¹¹Hriak an siam a, chûng mite hung chhûngah chuan, Uain sâwrna an chîl a, tuihâl chungin.

¹²Khawpui bit takah mite an rûm a, Mi hliam rilru chu a au chhuak a; Pathian lahin thil dik lo chu a bengkhawn hek lo.

¹³Êng laka helte an awm a, A kawngte lah an hre lo va, A kawng takah pawh an awm lo.

¹⁴Vârṭianah tualthattu chu a tho va, Rethei leh tlachhamte a that a, Zânah chuan rûkru ang mai a ni.

¹⁵Uirepa mitin thimhmul a thlîr a, “Tu mân mi hmu lo vang,” tiin. Hmai khuhnain a hmai a tuam a.

¹⁶Thimah inte an lai pawp a, Chhûnah an inkhâr khung a, Êng rêng an hre lo.

¹⁷An za atân zîng chu thihna daihlim ang a ni a, Thihna daihlim ṭihbaiawm chu an nêl a.

¹⁸Tui chungah chuan chak taka len an ni a, Leiah hian an chanvo chu ânchhedawng a ni. Grêp huan kawng lam a hawi lo ve.

¹⁹Khaw ro leh lumin vûrtui a tiral a, Seol-in thil tisualte.

²⁰Chhûlin a theihnghilh a, changpâtin tui takin a ei a, Hriat reng a ni tawh lo vang a, Suahsualna chu thing angin a tliak ang.

²¹Ching, fa hring lo chu a ei a, Hmeithai thil ṭha a tihsak lo.

²²Pathian chuan a chaknain thiltitheite nun chu a tisei a, Dam an beisei loh hnu pawhin an tho chhuak a.

²³Himna a siamsak a, tah chuan an châwl a, An kawngah chuan a mitte a fu reng a.

²⁴Chawisân an ni a, rei lo têan an ral a; Mi dang angin an vuai a, an chuai a, Buh vui anga ah chhumin an awm ta a.

²⁵Tûnah chuti ni suh sela, tu nge daw mi ti thei anga, Ka ṭawng kha engmahlovah sawi thei ang?