Read Mizo_Old_version Joba 26 Bible Online

Joba 26 - Mizo_Old_version bible

Joba 26

¹Tichuan, Joba chuan a chhâng a, heti hian a ti a:

²Chakna nei lo mi chu i va han pui ve le! Thahrui nei lo bân chu i va han chhan ve le!

³Finna nei lo chu i han zilh fing a, Hriatna ṭha tak i sawi hnem teh e!

⁴Tu hnênah nge thu i chhâk chhuaha, Tu thlarau nge i hnên ata lo chhuak ni?

⁵Thi tawhte an khûr a, Tuite leh a chhûnga chêngte hnuaiah chuan.

⁶A hmaah chuan Seol chu saruak a ni a, Abadon chuan khuhna a nei lo.

⁷Hmun ruakah chuan hmâr a tipharh a, Lei chu engmahlovah a khai kâng a.

⁸A chhûm chhah tak chuan tuite a fûn khâwm a, A hnuaia chhûm chu a keh lo va.

⁹A lalṭhutthlêng hma chu a khuh a, A chungah chhûm a zîntîr a.

¹⁰Tui ramri a siam a, Thim leh êng thlen chinte nên.

¹¹Vân dona bante chu a nghîng dur dur a, A zilhhauna chu mak an ti a.

¹²A thiltihtheihnain tuipui a tingawi a, A hriat thiamnain Rahab chu a tan chhum a.

¹³A thawin vân chu a tithiang a, A kutin rûlpui tlân chak chu a thil tlang a.

¹⁴Ngai teh, hêng hi a kawng pâwn lam lek a ni, A chanchin kan hriat hi a va beitham êm! A thiltihtheihna ri thâwm chu tu nge hre zo thei ang?