Read Mizo_Old_version Joba 27 Bible Online

Joba 27 - Mizo_Old_version bible

Joba 27

¹Tin, Joba chuan a thusawi a chhunzawm a, heti hian a ti a:

²Ka thiamna thu la botu, ka thlarau tilungngaitu, Pathian, Engkimtitheia chu nung na pui!

³(Keimahah hian ka thaw a la kim a, Ka hnârah Pathian thaw a la châm;)

⁴Ka hmuiin fel lohna thu a phuh chhuak tawp lo vang, Ka leiin bumna thu a sawi hek lo vang.

⁵Thiam ka chantîr dâwn teuh lo mai che u, Ka thih thlengin ka dikna ka dah bo lo vang.

⁶Ka felna chu ka chelh tlat ang a, ka thlah lo vang; Ka nun chhûng hian ka thinlungin mi dem lo ve.

⁷Ka hmêlma chu mi suaksual ni sela, Mi beitu chu mi fel lo lo ni teh se.

⁸Pathian ngaihsak lo tân beiseina eng nge awm, Pathianin a sah chhuma a thlarau a lâk si chuan?

⁹Buainain a nan laiin Pathianin a au thâwm a ngaithla ang em?

¹⁰Engkimtitheiaah chuan a lâwm ang em? Pathian chu eng lai pawhin a ko vang em?

¹¹Pathian kut chungchâng ka zirtîr ang che u, Engkimtitheia hnêna awm chu ka zêp lo vang.

¹²Ngai ru, nangni ngeiin in vaiin in hmu a, Engtiziaa khawlo cheu nge in nih?

¹³Pathian hnêna mi suaksual chanvo chu hei hi a ni, Hnehchhiahtute ro chan, Engkimtitheia hnên aṭanga an dawn chu:

¹⁴A fate an pun chuan khandaih tuar tûr lekfang an ni; A rîla rahten chaw khamkhawp pawh an nei lo vang.

¹⁵A hnua dam chhunte chu hriin a phûm ang a, An nupuite pawhin an sûn lo vang.

¹⁶Tangkaruate vaivut angin a khâwl a, Hlum ang maiin a silhfênte a tiang khâwm na a;

¹⁷Tiang khâwm mah se, mi fel chuan a sinsak ang a, Pawi khawih lote chuan tangkarua chu an insem ang.

¹⁸Maimawm angin a in chu a sa a, Vêngtuin chhâwlbûk a siam ang lekin.

¹⁹Hausain a mu a; mahse, a tho tawh lâwng; A mit a han meng a, a awm tawh lo.

²⁰Tui lian angin hlauhawmin a nang a, Zânah thlipuiin a la a.

²¹Khawchhak thliin a lên bo va, a bo ta a, A hmun ata a nuai bo ta.

²²Zahngai lovin a nuai ang a, A thiltihtheihna hmaah chuan a kat rawk rawk ang.

²³A kut a ben khum ang a, A chek khum ang a, a hmun ata a ûm chhuak ang.