Read Mizo_Old_version Joba 29 Bible Online

Joba 29 - Mizo_Old_version bible

Joba 29

¹Tin, Joba chuan a thusawi a chhunzawm a, heti hian a ti a:

²Aw, tûn hma thla ral taahte khân awm ni ila, Pathianin mi vên lai niahte khân,

³A khâwnvâr ka lu chungah a êng ṭhîn a, Thimah pawh a êng ringin ka kal tlang a,

⁴Ka vânglai nite ka hman laia, Pathian pâwlna ka puan ina a awm lai khân,

⁵Engkimtitheia ka hnêna a awm ṭhin laia, Ka fate ka vêla an awm lai khân,

⁶Ka kalnate hnutekhala chulh a nih laia, Lungpuiin ka tân hriak a luan chhuahtîr dûl dûl lai khân!

⁷Khawpui kawngka pana ka kala, Kawtthlêra ṭhutna ka buatsaih laite khân.

⁸Tlangvâlten mi hmu a, an biru a, Upate an tho va, an ding a;

⁹Hotute chu an ṭawng lai an châwl a, An kutin an kâ an hup a;

¹⁰Mi liante aw a reh a, An dang chungah an lei a bet a.

¹¹Benga hriaten nihlawh mi ti a. Mita hmuten mi hriatpui a;

¹²Mi rethei ṭap ka chhanchhuah ṭhin avângin. Pa nei lo, puitu nei lote pawh.

¹³Boral dâwn ṭêpte malsâwmna ka chungah a thleng a, Hmeithai thinlung pawh hlimin ka zaitîr a.

¹⁴Felna chu ka inbel a, mi tuam vêl a, Ka tihdik ṭhinzia hi kawrfual leh lukhum ang a ni.

¹⁵Mitdel tân mit ka ni a, Kebai tân ke ka ni a.

¹⁶Tlachham tân pa ka ni a, Ka hmêlhriat lohte pawh an thu ka buaipui a.

¹⁷Mi fel lo ngho chu ka titliak a, A haa a thil seh chu ka pawt chhuak a.

¹⁸Tichuan, “Ka bu zâwlah ka thi ang a, Ka nite chu ṭiauvut angin ka tipung ang a,

¹⁹Tui lamahte ka zung a zâm darh ang a, Zankhuain ka zârah dai a châm reng ang a,

²⁰Ka ropuina hi keimahah a thar reng ang a, Ka kutah ka thalngul pawh a thar reng,” ka ti rilru a.

²¹Ka lamah miten beng an dawh a, an ngaithla a, Ka thu nghâkin an ngawi ṭhap ṭhîn.

²²Ka sawi zawhah an ṭawng ve tawh ngai lo; Ka thusawi chu an chungah a tla.

²³Ruahtui angin mi nghâk reng ṭhîn, Ruah hnuhnûng châk angin an ka an lo âng a.

²⁴An inrinhlelh laiin ka nuihpui a, Ka hmêl hlim chu an tihnual lo.

²⁵An kawng ka thlang a, hotuah ka ṭhu a, Sipai rual zîngah lalber angin ka awm a, Lusûnte thlamuantu angin.