Read Mizo_Old_version Joba 3 Bible Online

Joba 3 - Mizo_Old_version bible

Joba 3

¹Hetih hnu hian Joba chuan a ka a âng a, a pian ni chu ânchhia a lawh ta a.

²Tichuan, Joba chuan heti hian a sawi a:

³Ka pian ni chu boral rawh se, Mipa fa a pai ta e, tihna zân nên chuan.

⁴Chu ni chu thim lo ni se; Chung lam aṭangin Pathianin ngaihsak lo se, Eng pawh chu a chungah êng suh se;

⁵Thim leh thihna hlim chuan an ta atân chuh se, Chhûmin bawh reng mai sela; Chhûn tithimtu zawng zawng khân tihlau rawh se.

⁶Chu zân chu zawng thimin chelh reng mai sela, Chu kuma nite zîngah chuan him ve lo sela; Thla chhiarna zîngah pawh lo tel suh se.

⁷Chu zân chu zân khawhar lo ni se, Tah chuan hlim thâwm lêng suh se.

⁸Ni ânchhe lawh thiamte chuan ânchhia lawh rawh se, Leviathan chawh thawh thiamte chuan.

⁹A vârṭian arsi chu thim sela; Eng lo nghâk se, hmu si lo sela, Zîng khawfîngchat pawh hmu hek suh se;

¹⁰Ka nu chhûl kawngka a lo khâr loh avâng leh Ka mit hmuha buaina a thup hek loh avângin.

¹¹Engati nge chhûla ka lo thih loh? Engati nge pum ata ka chhuaha ka thaw a lo tâwp loh?

¹²Engah nge mal chunga mi lo chawi? Engah nge ka hnêk tûr hnutêin mi lo hmuah?

¹³Chutin ka mu ang a, ka reh riai tawh tûr, Ka muhîl ang a, ka châwl tawh tûr;

¹⁴Lei lalte leh remruatpuitute, Hmun ram lo indinsaktute nên chuan.

¹⁵A nih loh leh hotute, rangkachak sum neia, Tangkaruaa an in tikhattute nên chuan;

¹⁶A nih loh leh, a hun lova piang thup bo ang ka ni tawh tûr, Nausên êng hmu ngai lote ang mai hian.

¹⁷Tah chuan mi suaksualten chawhbuai an bâng a, Tah chuan mi chaute pawh an châwl a.

¹⁸Tah chuan mi tângte an châwl hahdam hlawm a, Vêngtu aw pawh an hre lo.

¹⁹Tah chuan mi lian mi tê an awm za a, Chhiahhlawh pawh a pu lakah a fihlîm.

²⁰Engah nge hrehawm tuar hnênah êng pêk a niha, Engah nge rilrua mangang hnênah nunna pêk a nih?

²¹Thih châk êm êma hmu si lo, Ro phûm zawn aia nasaa zawngtu,

²²Thlân an hmuha lâwma, Nasa taka hlim êm êm tûr hnênah chuan?

²³Mi a kawng thup bosaka hnênah engati nge êng pêk a nih, Pathianin huang a hung hnan hnênah chuan?

²⁴Ka ei dâwn pawhin ka thaw a pik a, Ka rûm chu tui angin a luang chhuak a.

²⁵Ka ṭihzâwng tak ka chungah a lo thleng a, Ka hlauh zâwng tak ka hnênah a lo thleng.

²⁶Ka hahdam lo va, ka awm hle hle thei lo va, Ka châwl thei hek lo; buaina a lo thleng zâwk a ni.