Read Mizo_Old_version Joba 30 Bible Online

Joba 30 - Mizo_Old_version bible

Joba 30

¹Tûnah zawng ka aia nauten mi nuihzat a, An pate ka ran rual vêngtu ui zînga Telah pawh ka duh lohte khân.

²A ni, chûng thaṭhum mite chu, An kut thahrui ka hnemhnânpui em ni?

³Tlachham leh rilṭâmin an chêr a, Ram ro leh kawlh chu an khel a.

⁴Hnimbuk hnah nêmte an thliak a, Juniper zungte an chaw a ni.

⁵Mihring zîng ata hnawh bovin an awm a, Rûkru angin an au zui a.

⁶Ruam kumkârahte an chêng a, Lei khuarkhurum leh lungpui pûkahte.

⁷Hnimbuk zîngahte an chiau va, ṭaiṭên hnuaiahte chuan an tawm khâwm a.

⁸Mi âte fa an ni, a ni, tlâktlailo ber fate; Ram ata vuak chhuah an ni.

⁹Tûnah zawng an hla ka lo ni ta; A ni, an kamchhe tleuhna mai ka ni ta.

¹⁰Min ten a, an inthiarfihlîm a; Ka hmaia chil chhâk pawh an tîm lo.

¹¹A hruihrual chu a phelha, mi nghaisak tâk avângin, Ka hmaah insûmkârna an thlah ṭhak a.

¹²Ka ding lamah mi rûrâho an lo thawk a; Ka ke an nêk per a, An tihchhiatna kawng chu ka chungah an din a.

¹³Ka kawng an tichhia a, Ka vânduaina an tizual a, Tu mân an dâl lo.

¹⁴A pawp zau laiah an lo kal a, A chim zîngah mi hual a.

¹⁵Ṭihbaiawm ka chungah a thleng a, Ka ropuina chu thlî angin an ûm bo va, Ka mi ṭhatna chu chhûm angin a rîral ta.

¹⁶Keimah ata ka thlarau leih chhuah a ni; Chhiatna nite chuan mi man ta e.

¹⁷Zânah chuan ka ruhte a kher ngut ngut a, Ka na mi fêp sup sup hi a châwl lo.

¹⁸Ka na hian ka silhfênte a tikhawlo va, Ka kawrnghâwng angin mi rêk a.

¹⁹Chirhdiakah chuan mi paih lût a, Vaivut leh vut ang mai ka ni ta e.

²⁰Nang ka au che a, mi chhâng lo va, Ka ding a, nangin mi hawi lo.

²¹Ka lakah i nun a lo râwng ta a, I kut chakin mi tiduhdah a.

²²Nangin thlîah mi chawi kâng a, a chungah mi chuantîr a; Nangin thlipuiah mi tiral ta.

²³Nangin thihna mi thlen ang tih ka hria asin, Mi nung zawng zawng tâna ruat inah chuan.

²⁴Chim chhe vûm chungah miin a kut a phar ngeiin, A vânduainaah chuan ṭanpui dîlin a au dâwn lâwm ni?

²⁵Buaina tâwkte tân ka ṭap ṭhîn lâwm ni? Chhambalte tân ka lungngai ṭhîn lâwm ni?

²⁶Thil ṭha ka zawng a, thil chhia a lo thleng a, Êng ka nghâk a, thim a lo thleng a.

²⁷Ka thin a phu hlawp hlawp a, a reh thei lo va, Tuarna nîte chu ka chungah a thleng a.

²⁸Ni em vâng ni lovin ka dum a, Pungkhâwmho zînga dingin ṭanpui ka dîl a.

²⁹Kâwl-uite tân unaupa ka ni a, Ostrich-te tân ṭhian ka ni a.

³⁰Ka vun chu a lo dum a, a khawk a, Ka ruhte chu a lum vut vut a.

³¹Chu vâng chuan ka perhkhuang ri chu sûnnaah a chang a, Ka phênglâwng chu ṭap râwlah.