Read Mizo_Old_version Joba 31 Bible Online

Joba 31 - Mizo_Old_version bible

Joba 31

¹Ka mit tân thuthlung ka siam a; Engah nge nula ka melh ang?

²Chunga Pathian laka chanvo leh Chungnung ber Engkimtitheia laka ro chan tûr chu eng nge ni?

³Mi fel lo tâna vânduaina leh, Khawlohna titute tâna chhiatna a ni lo vem ni?

⁴Ka kawngte chu a hmuin, Ka ke pên zawng zawng a chhiar lo vem ni?

⁵Dâwt lama kal ka niha, Bumna lama ka ke pên rang ṭhîn ka nih chuan.

⁶(Bûkna dik taka tehin awm ila, Ka dikna hi Pathianin a hriat nân.)

⁷Tin, kawng lova pêng ka lo niha, Ka mit hmuh ang maia thinlung pu ka lo niha, Ka kutah hian kaidum rêng a bei phawt chuan,

⁸Ka tuh chu mi dangin ei mai ang hmiang; Ka chîn zawng pawh kar chhuah ni rawh se.

⁹Ka thinlung hian hmeichhia a îta, Ka ṭhenawm kawngkâah châng te ka nih chuan,

¹⁰Ka nupui chuan mi dang sum dêng sela, Mi dangte chuan tlâwm rawh se.

¹¹Chu chu sual hnuatthlala tak, Khawlohna, rorêltuten an hrem ngei tûr chu a ni si a.

¹²Ral dêr khawpa kângtu mei a ni bawk a, Ka sum neih zawng zawng pawh a khawrh fai vek dâwn a ni.

¹³Ka chhiahhlawhnu emaw, ka chhiahhlawhpa emaw, Ka chunga an vuivaina thu thlen ka ngaihsak loh luih chuan,

¹⁴Pathian a lo thawh hunah eng nge ka tih tâk ang le? A rawn zawh chian hunah engtin nge ka chhân ang?

¹⁵Pum chhûnga kei mi siamtu khân ani pawh a siam lo vem ni? Pum chhûnga mi dintu chu thuhmun a ni lâwm ni?

¹⁶Tlachhamte duh zâwng ka sûm bosaka, Hmeithaite bei ka tihdawna,

¹⁷Ka chaw keimah maia ka eia, Fahrahin a ei ve loh chuan,

¹⁸(A naupan lai aṭangin pa angin ka châwm lian a, A nu pum aṭangin ka kaihhruai a ni tawh si.)

¹⁹Tu pawh silhfên lova boral emaw, Rethei intuamhlâwmna nei lo emaw hmu ka niha,

²⁰A kâwngin mal mi sâwm lo a nih chuan, Ka berâm hmula tuam lum a nih loh chuan;

²¹Kawngkâah chuan ṭanpuitu ka hmuh avânga, Fahrah chunga kut lek ka nih chuan,

²²Ka koki hi ka dâr saiphêng nên phawk hlawk sela, Ka bân hi khingkhangruh aṭangin thlawn hlauh rawh se.

²³Pathian lak ata vânduaina chu ka ṭihzâwng tak a ni si a. A ropuina avângin eng ti rual ka ni lo.

²⁴Rangkachak chu ka nghahfâka ka hmana, Rangkachak ṭha mi chu ka rinchhana ka ngaiha,

²⁵Ka hausakna a nasat avâng leh Ka kutin a thawh chhuah nasat avânga lâwm ka lo niha,

²⁶Nî khi a ên lai leh Thla kal ruau ruau lam ka hawia,

²⁷Ka thinlung hi a rûk têa hîp bo a niha, Ka kut pawhin ka kâ a hup chuan,

²⁸Chu pawh chu rorêltute hrem ngei tûr khawlohna a ni a, Chunga Pathian hnêna daw ka nih dâwn avângin.

²⁹Mi hawtu chhiatna chunga lâwm ka nih emawa, Thil ṭha lovin a tlâkbuak laia lâwm hlut ka nih emaw chuan,

³⁰(A ni, a nunna ânchhe lawh khawpa Sual ti tûrin ka kâ ka phal lo.)

³¹Ka puan ina mite chuan, “A buhbâla inhnangfâk lo tu nge awm?” an tih loh chuan,

³²(Mikhualte kawtthlêrah an riak lo va, Mi zin vâkte tân ka kawng ka hawng ṭhîn.)

³³Mite tih dân anga ka bawhchhiatna zêpa, Mahni âwm chhûnga khawlohna thukruin.

³⁴Mipui tam takte hlauh avâng leh Chhûngkuate hmuhsit hlauh avânga Ngawi reng leh lêng chhuak ngam lo ka nih chuan -

³⁵Aw, mi bengkhawntu nei teh ila aw! (En teh u, hei ka chhinchhiahna ka dah e, Engkimtitheian mi chhâng teh se.) Ka khingpuipan mi hêkna a ziak chu nei teh ila aw!

³⁶Ka kokîah ka pu ang a, Lallukhum angin ka inbel tûr a!

³⁷Ka pheikhai zât pawh ka hrilh ang a, Mi lian ni ve angin amah ka pan tûr.

³⁸Ka ram chu mi duh lova au chhuak a niha, A lei rûtkhuarte an ṭap hlawm a nih chuan,

³⁹Man pe lova a rah chhuahte ei ka lo niha, A neitute nun hlohtîr emaw ka lo nih chuan,

⁴⁰Buh aiah hlîng ṭo zâwk sela, ṭai aiah hlo har ṭo rawh se. Joba thu chu a tâwp ta.